Куртка будаўніка АЭС, дакументы Дубко і пальчаткі з «Акцэнта». У Новым замку адкрылі новую экспазіцыю

У Гродзенскім дзяржаўным гісторыка-археалагічным музеі, што размяшчаецца ў Новым замку, адкрылі новую пастаянную экспазіцыю. Над яе стварэннем працавалі на працягу 2023 года. Яна атрымала назву «Пасляваенны Гродна. Гродзеншчына ў ХХ-ХХI ст.».

Пра што можна даведацца з экспазіцыі

Перыяд, які ахоплівае экспазіцыя — ад вызвалення Гродна ад нямецкіх войскаў у ліпені 1944 года да сённяшніх дзён. Там можна даведацца пра развіццё сельскай гаспадаркі, прамысловасці і культуры пасля Другой сусветнай вайны.

Таксама там ёсць экспанаты, прысвечаныя звязаным з Гродна дзяржаўным дзеячам — Аляксандру Дубко і Віталю Крамко. Там можна ўбачыць фотаздымкі, архіўныя запісы, прыватныя рэчы і прадукцыю разнастайных прадпрыемстваў.

Размясцілі куртку студатрадаўца, які будаваў АЭС

Сярод экспанатаў у музеі размясцілі бот, які выпускала Гродзенская абутковая фабрыка ў 1951 годзе, прадукцыю шклозавода «Нёман» у Бярозаўцы, пяльчаткі фабрыкі «Акцэнт», фільтры прадпрыемства «ДИФА», машынкі з фабрыкі забавак, а таксама саламянае сонца і сапоцкінскія пісанкі.

Асобна ў экспазіцыі вылучылі будаўніцтва Беларускай АЭС. У музеі размясцілі куртку байца студэнцкага атрада, які ўдзельнічаў у будаўніцтве атамнай станцыі.

У будучыні экспазіцыю плануюць пашырыць тэмай спорта ў рэгіёне

Яшчэ адна з галоўных тэмаў экспазіцыі - Фестываль нацыянальных культур. Можна ўбачыць фотаздымкі, узнагароды і ўнікальныя дэкаратыўныя прадметы. Для наведвальнікаў усталявалі інфакіёскі з фотаздымкамі і архіўнымі зводкамі, прысвечанымі развіццю Гродзенскай вобласці.

Чытайце таксама: Гродзенскі музей хоча купіць сабе калоду карт Лапіных. Вось колькі яны гатовыя заплаціць