Загадаў пабудаваць бальніцу за два гады і пераканаў, што ўрачоў хапае. Лукашэнка ў Гродне — аб сітуацыі ў медыцыне

Падчас візіту ў Гродна Лукашэнка заклаў «капсулу часу» ў месцы, дзе пачалі будаваць новую гарадскую клінічную бальніцу. Ён загадаў пабудаваць бальніцу за два гады і зрабіць беларускую медыцыну даступнай усім — пры гэтым адзначыў, што ў Беларусі ўрачоў хапае.

Новую гарадскую бальніцу ў Гродне будуюць на праспекце Янкі Купалы. Да неабходнасці будаўніцтва прывяло тое, што дзве іншыя бальніцы — № 2 і № 3 — знаходзяцца ў старых будынках, якія не адпавядаюць сучасным патрабаванням. Новая бальніца заменіць сабой ложкавы фонд дзвюх старых бальніц. Яна будзе працаваць ва ўвязцы з бальніцай № 4. Гэта павінна дазволіць больш эфектыўна выкарыстоўваць рэсурсы і выключыць дубляванне функцый.

«Дактароў хапае» ці ўсё ж не?

У новай бальніцы ў Гродне будзе тэрапеўтычная накіраванасць. Таксама будуць кабінеты эндаваскулярнай хірургіі і дыягнастычныя аддзяленні. Бальніца разлічана на 500 з лішнім ложкаў. Паводле планаў, агульная плошча будынка складзе 43, 1 тыс. кв.м. Бальніцу пабудуюць на ўчастку ў 11 гектараў.

Лукашэнка ўпэўнены, што з кадрамі ў ахове здароўя ўсё ў парадку: «Кажуць, таго не хапае, гэтага не хапае. Урачоў, медсясцёр… Слухай, у нас усяго хапае. Толькі ў нас некаторыя катэгорыі, у тым ліку ўрачы, хочуць працаваць, як у нас, а жыць, як на Захадзе, і атрымліваць вялікія грошы. Так яны суткамі працуюць [на Захадзе], асабліва моладзь. Гэта я ведаю дакладна. Суткамі працуюць. Але яны і зарабляюць». У Беларусі ўрачы зарабляюць «вельмі прыстойныя грошы ў найлепшых клініках».

У лютым 2024 года ў Гродна не хапала 131 урача-спецыяліста. Ім прапануюць зарплату ад 156,5 рублёў за стаўку 0,25 да 3,1 тысячы за стаўку. Больш за ўсё спецыялістаў шукалі ў Ленінскім раёне — 77 вакансій, у Кастрычніцкім — 54. Усяго ў Гродзенскай вобласці шукалі амаль паўтысячы ўрачоў-спецыялістаў.

Усяго ў Беларусі на пачатак вясны не хапала 6513 урачоў-спецыялістаў, пісаў «Белсат». Лічба крыху меншая, чым была за тры месяцы да гэтага (6656 лекараў), але і год таму яна была падобнай — у снежні 2022 года шукалі 6286 спецыялістаў. Гэта значыць, праблема з дактарамі не вырашаецца ўжо больш за год. У першую чаргу адчуваецца дэфіцыт урачоў высокай кваліфікацыі - анколагі, анестэзіёлагі, хірургі, востра не хапае ўрачоў-педыятраў.

Таксама Лукашэнка паставіў міністру аховы здароўя задачу аб даступнасці медыцыны. «Трэба зрабіць медыцыну, як у нас раней казалі, народнай. Усім даступна, аднолькава».

Што напісалі ў капсуле ад Лукашэнкі ў Гродне

Цырымонія закладання капсулы на месцы будаўніцтва новай бальніцы ў Гродне была нібыта яшчэ і пасланнем суседнім з Беларуссю краінам, напісалі на афіцыйным сайце Лукашэнкі. «Мы жывем мірным і шчаслівым жыццём — будуем усе разам нашу любімую, незалежную Беларусь. Але нашае сэрца баліць. І мы пішам вам, таму што свет вакол мяняецца. Мы жывём у эпоху нябачанага ў параўнанні з мінулымі стагоддзямі навукова-тэхнічнага прагрэсу, але мільярды трацяцца на ўзбраенне і рэгіянальныя канфлікты».

«Планета палае. Цэлыя народы губляюць свой дом і спрабуюць знайсці прытулак за тысячы кіламетраў ад Радзімы. Мы дапамагаем усім, хто просіць аб дапамозе, і робім усё, каб захаваць крохкі свет на гэтай Богам падоранай зямлі. І верым, што захаваем. Таму будуем дзіцячыя сады, школы, паліклінікі, бальніцы, новыя вытворчасці, культурныя, спартыўныя і гандлёва-забаўляльныя цэнтры». У тэксце таксама згадана 80-годдзе вызвалення Беларусі ад нямецка-фашысцкіх захопнікаў, якое адзначаюць у 2024 годзе.

«За нашымі плячыма тысячагадовая гісторыя беларускага народа, і мы верым, што яна працягваецца вашымі вялікімі справамі! Верым, што рана ці позна ўся энергія чалавецтва, розум і інтэлект будуць накіраваны выключна на стварэнне, што вы ступіце далей і выйдзеце за межы Сонечнай сістэмы!».

Чытайце таксама: Новы корпус і душавыя ў палатах. Дзіцячы шпіталь у Гродна чакаюць перамены