Каля кас кінатэатраў настаў час чэргаў. З грашыма ў руках тоўпяцца пераважна дзяўчынкі - малодшага і не вельмі ўзросту. Прычына ў адной з самых чаканых прэм’ер 2019 года — «Халоднае сэрца 2».

Шматлікія задаваліся пытаннем: чаму самы касавы мультфільм усіх часоў так доўга не можа атрымаць працяг? Цэлых шэсць гадоў прыйшлося чакаць яго аматарам. Гэта таго каштавала, бо многія дыснэеўскія сіквелы пра прынцэс часцей за ўсё наогул абмінулі кінатэатры. Ніхто не памятае працягу «Покахонтас» або «Русалачкі», якія выходзілі адразу на відэа. Рэжысёры-стваральнікі «Халоднага сэрца» Крыс Бак і Джэніфер Лі казалі, што ні ў якім разе не хацелі выкарыстоўваць рэцэпты поспеху першай часткі, а абавязкова хацелі прыўнесці нешта арыгінальнае ў сюжэт.

Сюжэт не далёка сышоў ад першай часткі

Для тысяч прыхільнікаў рознага ўзросту вяртанне любімых персанажаў стала сапраўднай падзеяй. Для мэтавай аўдыторыі «Халоднага сэрца» працяг запомніцца практычна ідэальным творам. Калі ж паглядзець вачыма больш сталага чалавека, вы заўважыце, што аўтары вырашылі не прасоўваць сюжэт занадта далёка ад падзей першага фільма, а шмат у чым яго ж і паўтарыць.

Прайшло тры гады, сёстры Эльза і Ганна кіруюць Эрэндэлам у любові і стабільнасці. Гераіні, у адрозненне ад сваіх глядачак, за мінулы час ну ніяк не змяніліся. У адзін выдатны момант скандынаўскую ідылію псуе загадкавы голас, які чуе Эльза. Ён становіцца прадвеснікам таямнічых падзей, звязаных з цёмным мінулым сясцёр.

Пейзажы Скандынавіі і неверагодная анімацыя

Стваральнікі не прыдумалі нешта новае, а вырашылі маштабнымі дзеяннямі пашырыць сюжэтныя рамкі і геаграфію падзей. Глядач можа акунуцца ў мінулае Эрэндэла і даведацца, адкуль пайшлі такія глабальныя адрозненні паміж сёстрамі. Дапамогуць у гэтым прадстаўнікі дзівоснага паўночнага народа, у дакладнасці спісаныя з жыхароў паўночнай Скандынавіі - лапландцаў.

Frozen 2, Холодное сердце 2

Візуальную аўтэнтычнасць паўночнай Еўропы падкрэсляць дзівосныя пейзажы нарвежскіх фіёрдаў, сярод якіх раскінулася казачнае каралеўства. Неверагодную камп’ютарную анімацыю я прапаную ўвогуле не абмяркоўваць, таму што яна ідэальная, асабліва ў моманты чароўнага ледзянога вядзьмарства Эльзы. У кінатэатры на вялікім экране гэтыя эпізоды непаўторныя і ўнікальныя.

Музычная казка пра моцных жанчын

Аўтары фільма працягваюць развіваць тэму жаночай незалежнасці. У другім фільме не гераіні думаюць пра замужжа, а высмейваецца Крыстоф са сваімі імкненнем заручыцца з Ганнай. Пакуль дзяўчыны вырашаюць лёс роднай краіны, Крыстоф з усяго экраннага часу выдаў толькі запамінальную песенную рок-кампазіцыю з стылі 1980-х. У астатні час у «Халоднае сэрца 2» перамагаюць прынцыпы фемінізму і жаночай эмансіпацыі. Упершыню «Дысней» выдае твор, дзе прынцэсы думаюць спачатку аб асабістым дабрабыце, а ўжо потым пра мужчын.


Чытайце таксама: «Малефисента 2»: как внести в «Спящую красавицу» фашизм, «Игру престолов» и индийскую мелодраму


І вядома, «Халоднае сэрца 2» гэта яшчэ і мюзікл, дзе персанажы праз кожныя пяць хвілін не прагаворваюць, а спяваюць уласныя дыялогі і маналогі. Мне цяжка выступаць суддзёй на песенным конкурсе, але другая частка прыкметна прайграе арыгінальнаму фільму па наборы кампазіцый. У першым фільме ўсіх уразіла выкананне «Let it go» («Адпусці і забудзь»), але цяпер усё яшчэ пад пытаннем, ці будуць фанаты навагоднімі вечарамі слухаць «Into the unknown» («Скрозь за гарызонт»). Час рассудзіць.

Лепш скончыць зараз

«Халоднае сэрца 2» цяпер радуе мільёны дзіцячых сэрцаў, узбагачаючы карпарацыю «Дысней» на сотні мільёнаў долараў. Хацелася б пажадаць «Халоднаму сэрцу» скончыцца у 2019 годзе, каб у будучыні не разгубіць сваё казачнае зачараванне.