Вайна і грошы: што адбываецца з банкамі і іх карткамі ў Беларусі на другі дзень пасля нападу Расіі на Украіну

У сувязі з наступам Расіі на тэрыторыю Украіны расійскія банкі трапілі пад замежныя санкцыі. Абмежаванні закранулі і беларускія банкі, праблемы з’явіліся ў «дачок» расійскіх банкаў у Беларусі. Найбольш праблем зазнаў ВТБ-банк, МТБ перапыніў валютныя аперацыі, а Альфа-банк паведамляе, што кліенты нічога не заўважаць.

«З пятага разу заходзіла»

Гродзенцы назіраюць праблемы ў працы некаторых банкаў. Праз тэрміналы ў крамах не праходзіць аплата Белінвестбанка, Беларусбанка і Белгазпрамбанка, расказалі Hrodna.life чытачы. У некаторых крамах не праходзяць карткі Альфа-банка. Такую ж сітуацыю назіралі і ў некалькіх кавярнях. Магчымасць аперацыі ў такіх выпадках залежыць не толькі ад банка, чыёй карткай плоцяць, але і ад таго, які банк прадастаўляе эквайрынг [прыём грошай і перавод іх гандлёвай кампаніі. — Заўв. Hrodna.life] канкрэтнаму тэрміналу. Вядома, што праблемы былі ў тэрміналаў Белінвестбанка.

Раніцай 25 лютага аплату па картках не праводзіў Прыёрбанк, 24-га дадатак таксама не адкрываўся, але банкаматы банка працавалі спраўна, расказаў чытач. Іншы ж ўдакладніў, што 24 лютага дадатак адкрываўся, але з пятага разу. Праблемы ўзніклі з карткамі Visa. У 11:30 банк паведаміў, што праца картак Visa адноўлена.

Іншая чытачка Hrodna.life сведчыла, што праблем са здыманнем грошай і карыстаннем дадаткам не было. Часова ёсць праблемы з карыстаннем картамі Visa, паведамілі адной з гродзенак на інфалініі Альфа-банка раніцай 25 лютага.

Чытачка таксама паведамляла пра праблемы 25 лютага з расійскімі карткамі Альфа-банка, «Тинькофф» и карткай Райффайзен-банка.

Праблемы ў БелВЭБа, у ВТБ усё штатна. Як рэагуюць банкі ў Беларусі

БелВЭБ, «дачка» расійскага ВЭБ.РФ, 23 лютага паабяцаў трымацца стратэгіі свайго развіцця, нягледзячы на санкцыі. 24 ужо папярэдзіў пра магчымыя збоі пры разліках карткамі Visa і MasterCard за мяжой і перабоі з разлікамі Visa ў Беларусі.

З 24 лютага БелВЭБ перапыніў крэдытаванне карпаратыўных кліентаў па сервісах «Файныя грошы анлайн» і «Анлайн-факторынг», з 25 лютага перапыніў і крэдытаванне фізічных асобаў. Таксама 25 лютага банк паведаміў пра спыненне аперацый па гандлёвым эквайрынгу ў замежнай валюце і аперацый з выкарыстаннем карт, эмітаваных банкамі-нерэзідэнтамі Беларусі. У тэрміналах і банкаматах БелВЭБ ёсць праблемы з карткамі Visa іншых банкаў.

«Да цяперашняга моманту даступныя ўсе аперацыі па картках Visa, за выключэннем плацяжоў у замежных анлайн-сэрвісах („Яндэкс“, Wildberries, AIiExpress, Ozon і інш.), а таксама з выкарыстаннем сэрвісу Apple Pay», — патлумачылі ў банку. Таксама банк увеў абмежаванні на куплю замежнай валюты ў дадатку і інтэрнэт-банку.

З 25 лютага плацежная сістэма Visa ўвяла абмежаванні па картках Visa, паведаміў банк РРБ. Трымальнікам картак Visa банка РРБ часова недаступныя аперацыі за межамі Беларусі (у тым ліку ў замежных анлайн-сэрвісах (Яндэкс, Wildberries, AIlExpress, Ozon і інш.)) і аперацыі ў сэрвісах для р2р-пераводаў для картак. Банк тлумачыць гэта санкцыямі ў дачыненні банка-спонсара ААТ «Банк БелВЭБ». З аплатай карткамі ў гандлёвых аб’ектах і здыманнем грошай у банкаматах праблем быць не павінна. Аналагічная сітуацыя ў Тэхнабанка. Банк паведаміў, што зараз мяняе спонсара.

ВТБ-банк у Беларусі працуе ў звычайным рэжыме. «Усе нашы прадукты і сервісы даступныя ў поўным аб’ёме. Інфраструктура банка, у тым ліку аддзялені, банкаматы і анлайн-сервісы функцыянуюць штатна», — такое паведамленне разаслаў банк сваім кліентам.

«Сбербанк», усе яго сістэмы і офісы працуюць у штатным рэжыме. Фізічным і юрыдычным асобам — кліентам банка сродкі даступныя ў поўным аб’ёме, ніякія абмежаванні не ўводзяцца, а «банк вывучае новыя ўмовы працы», паведамляе сайт беларускай «дачкі» расійскага банка.

Альфа-банк паведаміў, што плацяжы па картах Visa і Mastercard даступныя па ўсім свеце, валютныя пераводы праходзяць без абмежаванняў, як звычайна, працуюць мабільны дадатак і аддзяленні. Санкцыйныя абмежаванні банка ў Расіі звязаныя з тым, што «банк часова не зможа выпускаць новыя еўрааблігацыі або размяшчаць выпускі акцый». Абмежаванне на зняцце наяўных грошай уводзіць не плануюць. У банку ўдакладнілі, што проста часам не паспявалі завозіць валюту ў банкаматы. Абмежаванні, уведзеныя ў дачыненні да рускага Альфа-банка, не закранулі беларускую «дачку» і не ўплываюць на яе кліентаў, піша Onliner.

«Дабрабыт» з 25 лютага падняў працэнтныя стаўкі па новых тэрміновых безадзыўных банкаўскіх укладах.

МТБанк часова прыпыніў магчымасць аперацый з валютнымі банкаўскімі картамі ў прыладах cash-in. Уведзеныя і абмежаванні па рахунках без выкарыстання картак: цягам сутак можна набываць валюты не больш чым на 1500 рублёў. Безнаяўныя расходныя аперацыі ў сістэмах дыстанцыйнага банкаўскага абслугоўвання абмежаваныя 10 тысячамі рублёў за суткі. Абмежаванні не датычаць выкарыстання картак за мяжой.

Чытачка Hrodna.life, супрацоўніца Беларусбанка, расказала, што банк працуе ў звычайным рэжыме. 24 лютага некаторыя абменнікі гэтага банка не працавалі - высветлялі курс.

Чытайце таксама: Першы дзень расійска-украінскай вайны: абстрэл аэрадромаў, адмена авіярэйсаў і абвал рубля

Спыняюцца пераводы грошай

Папулярная ў Літве плацёжная сістэма PaySera спыніла пераводы грошай у Беларусь і Расію. Сістэма мае карткі, рахункі, ёй карыстаюцца шмат беларусаў у Літве.

Нацбанк Украіны забараніў валютныя аперацыі з расійскімі і беларускімі рублямі. Менавіта праз гэта расіяне і беларусы не могуць карыстацца карткамі і рахункамі украінскага аддзялення аўстрыйскага Райффайзен-банка. Раней жа паведамлялі, што банк заблакаваў гэтыя рахункі.

Перапыненне працы з расійскімі банкамі і блакаванне рахункаў расіян, якія трапілі пад санкцыі, паабяцала Францыя.

Чытайце таксама:

• Смотрите все! Как «мирное небо на головой» беларусов сменилось войной у границ
• Рух, дыханне і размовы: псіхалагіні параілі, як справіцца з душэўнымі перажываннямі і адчуваннем небяспекі