У Рускай праваслаўнай царкве змянілі правілы хросту. Зараз дзяцей можна хрысціць пад імёнамі замежных святых, якія шануюцца ў любой з памесных праваслаўных цэркваў. Такое рашэнне было прынята 26 снежня на пасяджэнні Святога Сінода РПЦ, інфармуе patriarchia.ru.
З канца 2017-га над гэтым пытаннем працавала камісія, старшынёй якой быў мітрапаліт Мінскі і Заслаўскі Павал. Яе распрацоўкі былі падрыхтаваныя да сярэдзіны 2019 года. Камісія прыйшла да высновы, што месяцаслоў РПЦ не ўтрымлівае імёнаў усіх святых, праслаўленых памеснымі праваслаўнымі цэрквамі, акрамя таго паводле біблейскай традыцыі, нарачэнне імя нованароджанаму з’яўлялася прэрагатывай бацькоў.
Камісія адзначыла, што не існуе перашкод да хрышчэння імем у іншым, чым звыклае, нацыянальным гучанні (да прыкладу: Іаан — Джон; Іаана — Жанна), і да ўдзелу ў сакрамэнтах з гэтым імем, калі чалавек насіў яго да хрышчэння.
У выніку прапановы камісіі былі прынятыя. Зараз у праваслаўных цэрквах падпарадкавання РПЦ святары могуць хрысціць Джонаў і Жанн.
Праўда, гэтыя іншыя нацыянальныя гучанні імёнаў рэкамендуюць адрозніваць ад імёнаў, якія не маюць сувязі з культурай праваслаўных народаў.
