Гродна актыўна рыхтуюць да фестывалю нацыянальных культур, які пройдзе 1−2 чэрвеня. Частка новых арт-аб'ектаў мастакі скончаць да канца мая, астатнія працы будуць здаваць пазней.
Да фестывалю маладыя мастакі падрыхтавалі вялікую выяву Гродна на падпорнай сцяне Замкавай гары, рыхтуецца гравюра старога горада ў дворыку гандлёвага цэнтра ABC, таксама сімволікай фестывалю упрыгожваюцца будаўнічыя агароджы у цэнтры горада.
У планах маладых мастакоў намаляваць і знакавых персон гісторыі Гродна — Вітаўта, Элізу Ажэшка і Максіма Багдановіча.
«Мы ўжо некалькі гадоў займаемся роспісам сцен, фасадаў, памяшканняў і іншага. Распісвалі дзіцячы хоспіс,"Карону» на Горкага, зараз актыўна працуем на сцяне ў дворыку АВС. Там хутка з’явіцца старая гравюра Гродна, — распавядае мастак Максім Карповіч. — Вось будаўнічы плот у цэнтры горада таксама рыхтуем да фестывалю. А ўжо ў пачатку лета будзем прыступаць да яшчэ адной цікавай працы — хочам намаляваць вядомых жыхароў нашага горада: Вітаўта, Элізу Ажэшка, Максіма Багдановіча і іншых. Малюнкі будуць у поўны рост у самым цэнтры Гродна".
