Дадаць навіну
Чацвер, 23 лістапада 2017, 09:58

“Сярод пяці вядомых загінулых – тры прадстаўнікі Гродзеншчыны”. Выстава “Праўда пра Курапаты” адкрылася ў Гродне

Дакументальна-мастацкая выстава “Праўда пра Курапаты” адкрылася ў Цэнтры гарадскога жыцця ўвечары 12 кастрычніка. Яе мэта – пазнаёміць гродзенцаў з трагедыяй у Курапатах, а таксама распавесцi пра тое, як сёння актывісты змагаюцца за захаванне гэтага месца.

Выставу хацелі прывезці ў Гродна яшчэ ў лютым, але даехала яна толькі ў кастрычніку. Гродна стаў першым пасля Мінска горадам, куды адправілася экспазіцыя. Арганізатары – грамадская ініцыятыва «Эксперты ў абарону Курапатаў» – ставяць перад сабой задачу данесці да грамадскасці праўду аб масавым знішчэнні беларускага народа пад Мінскам.

Навошта выстава

Арганізатары тлумачаць, што, па-першае, выстава створана для таго, каб беларускі народ зразумеў, што такое Курапаты і пазначыў месца масавых палiтычных рэпрэсій якім-небудзь высокамастацкім аб’ектам. Па-другое, каб беларусы ўсвядомілі тыя страшныя падзеі і прайшоў бы грамадзянскі працэс над сістэмай, якая панавала ў 1930-40 гадах. Па-трэцяе, каб людзi, даведаўшыся пра ўсе факты звертсва ў Курапатах, асэнсавалi іх і прыйшлi да пакаяння.

Гісторык, актывіст грамадскай кампаніі „Эксперты ў абарону Курапатаў” Марат Гаравы распавядаю пра выставу «Праўда пра Курапаты»

Сама выстава складаецца з некалькіх стэндаў, падзеленых на сэнсавыя зоны: «Адкрыццё», «Ушанаванне», «Абарона», «Каты», «Ахвяры», «Экспертызы», «Мінскія галгофы», «Даследаванні», Жыццё каля плоту«, «Тэрыторыя», «Наведнікі». Кожная з іх утрымлівае дакументы, мапы і фатаздымкі.

«Ужо сёння мы ведаем дакладна пяць імёнаў забітых у Курапатах людзей. Парэшткі ідэнтыфікаваныя, бо былі знойдзеныя дакументы. Сярод пяці вядомых нам чалавек – тры прадстаўнікі Гродзеншчыны. Гэта яўрэі. Менавіта таму мы і прыехалі перш за ўсё ў Гродна. Далей нас чакае яшчэ 13 гарадоў.

А ў зямлі ў Курапатах яшчэ дзясяткі, а то і сотні тысяч забітых. Мы звяртаемся ва ўсе структуры і просім даць нам імёны, але адказ адзiн – гэта дзяржаўны сакрэт. Таму мы і пачалі распавядаць грамадскасці пра Курапаты, хадзіць у суды, рабіць выставы, праводзіць міжнародныя конкурсы па афармленні народнага мемарыяла і іншае. Сёння мы ведаем многае, але ў будучыні трэба будзе даведацца яшчэ больш”, – распавёў гісторык, актывіст грамадскай кампаніі „Эксперты ў абарону Курапатаў” Марат Гаравы.

Выстава «Праўда пра Курапаты» будзе дзейнічаць да 26 кастрычніка.

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.

comments powered by HyperComments

Раім пачытаць

Каментары

0

Spelling error report

The following text will be sent to our editors: