Виталия Наумик с дочкой Лизой. Фото: Руслан Кулевич
«Мая пазіцыя — пазіцыя праўды. Я ні ў чым не вінаваты, я ў гэтым упэўнены на 100%», — піша жонцы з мінскага СІЗА № 1 гродзенец Уладзімір Навумік. Мужчыну затрымалі ў Гродне 29 траўня разам з блогерам Сяргеем Ціханоўскім. Яму прад’яўлена абвінавачванне.
Першы ліст ад Уладзіміра прыйшоў яго жонцы Віталіі 19 чэрвеня. Праз пяць дзён ёй перадалі яшчэ пяць штук. Уладзімір піша, што з ім усё добра і ён ні ў чым не вінаваты. Ён гатовы да канца адстойваць сваю правату.
«Проста фатальная выпадковая несправядлівасць. Нічога супрацьзаконнага я не здзяйсняў, вы павінны гэта ведаць. Проста крыўдна за такую несправядлівасць. Людзі сядзяць тут і ведаюць за што, а я не ўяўляю, чаму я тут увогуле павінен знаходзіцца», — піша Уладзімір.
Віталя Навумік кажа, што вельмі ўдзячная гродзенцам, якія пастаянна пішуць ёй словы падтрымкі. Таксама яны дапамаглі са сродкамі на адваката.
«Гэта натхніла мяне змагацца за мужа. Спачатку я баялася расказваць сваю гісторыю, але менавіта агалоска і дапамагае. Мы будзем да канца змагацца, каб выцягнуць мужа адтуль», — распавяла Hrodna.life Віталія.
Віталія кажа, што муж трапіў у гушчу падзей 29 траўня на Савецкай плошчы выпадкова — ішоў у краму па торт і падарункі. Гродзенцу прад’яўленае абвінавачванне па ч. 1 арт. 342 КК (Арганізацыя і падрыхтоўка дзеянняў, што груба парушаюць грамадскі парадак). Таксама ён падазраваны па арт. 364 КК (Гвалт альбо пагроза ўжывання гвалту ў дачыненні да супрацоўніка органаў унутраных спраў). Уладзімір застаецца, як і іншыя затрыманыя ў той дзень, у мінскім СІЗА № 1.
Да сям'і Навумік прыходзілі дадому з ператрусам. Таксама прыходзілі прадстаўнікі дзіцячага сада, каб праверыць умовы пражывання пяцігадовай дачкі Лізы. Віталія палічыла гэта ціскам на яе. Пасля таго, як гісторыя стала публічнай, у адрас загадчыцы сада пачалі паступаць абразы і пагрозы.
Віталія кажа, што яна ўжо заключыла дамову з адвакатам і сабрала ўсе характарыстыкі. Уладзімір просіць дапамогі ў грамадскасці, каб сабраць як мага больш інфармацыі па інцыдэнце 29 траўня.
«Ён папрасіў звязацца з праваабаронцамі і расказаць яго гісторыю, каб тыя звярнуліся ў СМІ для прадастаўлення відэа падзеяў у той дзень. Гэта ўсё трэба для яго абароны», — дадае Віталія.
«Мяркуючы па ўсім, следства будзе доўгім. Наогул да суда я магу тут праседзець аж да года. Так што рыхтуйся. Я спадзяюся, што можа і хутчэй усё прайсці, але ўсё ж… Ты павінна разумець, што я жывы і ні ў чым не вінаваты і пайду да канца, каб гэта даказаць. Проста чакай мяне. Настройся на гэта», — піша Уладзімір.
Віталя верыць, што агульнымі намаганнямі ёй удасца дамагчыся вызвалення мужа.
«Па лістах адчуваецца, што яму маральна цяжка з-за ўсёй гэтай несправядлівай сітуацыі, але ў астатнім ён трымаецца. Спадзяюся, лісты з Гродна дададуць яму сіл», — сказала Віталія.
Чытайце таксама:
У Гродне затрымалі палітычных актывістаў. Увечары 29 траўня на пікеце падчас збору подпісаў за Святлану Ціханоўскую адбыўся інцыдэнт, у выніку якога блогера Сяргея Ціханоўскага і некаторых яго прыхільнікаў затрымала міліцыя. Сярод затрыманых — сябра ініцыятыўнай групы Дзмітрый Фурманаў. Удзельніцу верагоднай правакацыі супраць Ціханоўскага апазналі ў сацсетках.
Затрыманні працягнуліся на наступны дзень. 30 траўня затрымалі актывіста Мікалая Саляніка, які днём раней вёў перамовы з кіраўніцтвам міліцыі і спрабаваў даведацца, за што быў затрыманы і дзе знаходзіцца Ціханоўскі. Праваабарончы цэнтр «Вясна» склаў спіс затрыманых у Гродне. Частку з іх перавезлі ў Мінск.
Гэта не спыніла ініцыятыўную групу Ціханоўскай. Афіцыйна было заяўлена, што падчас інцыдэнту пацярпеў міліцыянт. Узбуджаная крымінальная справа па факце гвалту ў адносінах да супрацоўнікаў органаў унутраных справаў. Нягледзячы на гэта, на наступныя дні да пікету Святланы Ціханоўскай выстраіліся чэргі — людзі стаялі, каб аддаць подпіс, нават пад дажджом.
Праваабаронцы прызналі Сяргея Ціханоўскага і іншых затрыманых у Гродне палітычнымі вязьнямі.
У выніку пад удар патрапілі і выпадковыя людзі. Увечары 29 траўня ў сацсетках пачалося цкаванне выпадковага чалавека, якога прынялі за супрацоўніка органаў у цывільным, які ўдзельнічаў у затрыманні ў Гродне. У дзяржаўных СМІ з другога боку пачалося цкаванне 81-гадовай пенсіянеркі Галіны Філіпаўны, якая падчас стрыму з Савецкай плошчы выказалася супраць Лукашэнкі і ў падтрымку Ціханоўскіх. Пенсіянерку Станіславу Дамшэль, якая 29 траўня таксама была на Савецкай, абвінавацілі ў дробным хуліганстве, але яна не пусціла міліцыю да сябе дадому. Выпадковыя людзі былі і сярод затрыманых на плошчы.
“Каб цябе пярун забіў!” - адзін з найбольш вядомых беларускіх праклёнаў. У 1934 і 1935…
З надыходам цяпла ў заходніх рэгіёнах Беларусі - Гродзенскай і Брэсцкай абласцях - сталі з'яўляцца…
Змяшаць два знаёмыя спосабы афарбоўкі яек і атрымаць аліўкавы колер, знайсці спосаб з дапамогай хімічнай…
Яніна Міхайлаўна Земба нарадзілася ў Гродне ў 1934 годзе. Падчас нямецкай акупацыі яе маму вывезлі…
«Еўрасаюз нам не патрэбен!» Гэты наратыў папулярны не толькі ў беларускай прапаганды, але і ў…
У пошуках лепшага жыцця тысячы людзей выязджалі з беларускіх зямель больш за сто год таму.…
