Вяртаемся да шэрага: у дворыку былой пальчаткавай фабрыкі зафарбоўваюць яркія колеры

Зусім нядаўна мы расказвалі аб зменах ва ўнутраным дворыку былой пальчаткавай фабрыкі на Маставой. Тут планавалася стварыць новае месца для адпачынку гараджан. Нечакана ў пачатку снежня уласнікам будынка прапанавалі змяніць цікавы каляровы дызайн дворыка на больш просты – стандартны для Беларусі. З 5 снежня яркія колеру сталі знікаць са сцен былой пальчаткавай фабрыкі. У бліжэйшы час усё будзе зафарбавана ў адзін колер.

Дворык не для людзей, а для коней

Чалавек, знаёмы з сітуацыяй па работах у дворыку пальчаткавай фабрыкі, распавёў, у чым прычына такіх зменаў.

“Тут ствараўся стыльны дворык, была затрачана прыстойная сума сродкаў на стварэнне дызайну і яго рэалізацыю. Але была дадзена каманда ўсё змяніць. Усё ўпіраецца ў гістарычнае мінулае будынка, хоць ніякай каштоўнасці ён сёння не нясе. Груба кажучы – барак, у якім была вытворчасць. Але калі ў нас улады сказалі “гістарычнае”, значыць “гістарычнае”. Усё трэба ўзгадняць”.

Вяртаемся да шэрага: у дворыку былой пальчаткавай фабрыкі зафарбоўваюць яркія колеры
Так выглядалі ўнутраныя сцены былой пальчаткавай фабрыкі  на пачатку 2018 года

Суразмоўца адзначыў, што гарадскія ўлады ўпіраюцца ў рашэнне Міністэрства культуры, а тыя кажуць што 200 гадоў такога дызайну ў цэнтры Гродна не было.

“Бо 200 гадоў таму былі зусім іншыя тэхналогіі і іншыя бачанні ў людзей, ды і іншае прызначэнне двара. Тут людзі хадзілі з торбамі і з коньмі. А зараз ствараецца месца для адпачынку гараджан. І што, мы павінны зрабіць двор для коней? Атрымліваецца, для коней. Галоўнае, каб аўтэнтычна. Давядзецца рабіць, як было раней: шэра і непрыгожа. Нажаль, такое бачанне гістарычных помнікаў сёння. Ёсць паперка і на падставе яе дзейнічаюць. Усе баяцца зрабіць крок у бок. Менавіта таму ў нас тут усё так павольна рухаецца. Пасля такога знікае жаданне рабіць што-небудзь цікавае і незвычайнае”.

Вяртаемся да шэрага: у дворыку былой пальчаткавай фабрыкі зафарбоўваюць яркія колеры
Нерэалізаваны праект змянення дворыка былой пальчаткавай фабрыкі  

Праект не ўзгаднілі?

Праект ператварэння дворыка былой пальчаткавай фабрыкі распрацоўвала гродзенская дызайнерская студыя “Interio Pro”. Дырэктар Аляксей Новікаў распавёў, з-за чаго іх праект не атрымалася рэалізаваць.

“Па існуючай інфармацыі запыту ў Міністэрства культуры ніякага не было. Замоўца праекта, фабрыка” Акцэнт”, нават не паклапацілася аб рэгістрацыі эскізаў ў мясцовай архітэктуры. Вырашылі сваімі ўнутранымі сіламі ўсё зрабіць, а потым зафарбаваць. Мы расчараваныя, што такі цікавы праект не атрымалася рэалізаваць у Гродне. Ён адназначна б упрыгожыў наш цэнтр, а так мы зноў вяртаемся да шэрых сценаў”.

Вяртаемся да шэрага: у дворыку былой пальчаткавай фабрыкі зафарбоўваюць яркія колеры
Палову яркіх сценаў будаўнічая брыгада ўжо паспела зафарбаваць  

Даведка

Будынак пальчаткавай фабрыкі “Акцэнт” будаваўся першапачаткова як тытунёвая фабрыка Шэрашэўскага. Да 1880 гадоў ён ператварыўся з невялікага сямейнага прадпрыемства ў буйную вытворчасць, што займала цэлы квартал у цэнтры горада. Там працавала каля 1500 чалавек. Пасля Другой сусветнай вайны, з 1967 года, у будынку знаходзілася вытворчасць пальчатак. Зараз усе памяшканні старога будынка здаюцца ў арэнду.

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.

Перадрук матэрыялаў Hrodna.life магчымы толькі з пісьмовага дазволу рэдакцыі. Звяртайцеся info@hrodna.life

Раім пачытаць

Каментары

comments powered by HyperComments

Spelling error report

The following text will be sent to our editors: