Сёлетні Mirum Music Festival у параўнанні з мінулым годам стаў меншым па фармаце, але, напэўна, больш цёплым ды душэўным. Інакш і быць не магло, калі хэдлайнерам была Джамала са сваімі светлымі пасланнямі да публікі пра дабро і каханне. Mirum-2017 прайшоў на зялёным лузе ля Мірскага замку ў суботу 19 жніўня.
Традыцыйна паўтарыўся адзін з удзельнікаў, які ўжо выступаў на леташнім Міруме. Гэта літоўскі дуэт Beissoul & Einius, які і ў гэтым годзе не расчараваў сваімі танцамі, не горшымі за Beyonce, ды цікавымі строямі.
Naviband і Паліна Рэспубліка добра вядомыя беларускай публіцы і не любіць іх ніяк не атрымліваецца — яны проста добрыя і душэўныя.
Неверагодную энергію на сцэну прынеслі ½ Orchestra з разнастайнымі трубамі і самым шалёным саксафаністам, а таксама група БЦХ з Расіі. Калі б не яны, мы б там памерлі ад мілаты і слодычы, якія празмерна ліліся са сцэны падчас усіх астатніх выступаў.
