Двух гродзенцаў асудзілі па справе аб продажы неіснуючых турпуцёвак. Пасля гэтага ў Instagram аднаго з фігурантаў — Ігара Паўлечкі — з’явіўся ролік з прабачэннямі перад пацярпелымі. Ён заявіў, што цалкам прызнаў віну і кампенсаваў шкоду, папрасіў спыніць крытыку і ў канцы вярнуўся да прэтэнзій да былой партнёркі. Гродзенцы ў каментарыях спрачаюцца, ці можна назваць махлярства памылкай і ці дастаткова прабачэнняў.
«Магчыма, яго выкладваю не я»
Ролік з’явіўся 29 кастрычніка з подпісам: «Калі вы глядзіце гэты Reels — магчыма, яго выкладваю не я… але я сапраўды хачу, каб гэта засталося».
Мяркуючы са слоў Паўлечкі, відэа запісана да абвяшчэння прысуду. У ім ён кажа: «Сёння апошні суд, я не ведаю, чым усё скончыцца». На момант публікацыі роліка ўжо стала вядома, што яму прызначылі чатыры гады калоніі ўзмоцненага рэжыму.
У звароце Паўлечка заявіў, што цалкам прызнаў віну і кампенсаваў усю шкоду. Пры гэтым ён сцвярджае, што асноўнай часткі грошай не атрымаў, і спасылаецца на высновы следства.
«Я ўзяў усю віну на сябе, я прымаю адказнасць. І адказваю цяпер перад законам, але не перад канапавымі крытыкамі», — кажа ён.
Паводле слоў Паўлечкі, перад часткай пацярпелых ён папрасіў прабачэння асабіста, перад іншымі — завочна. У роліку ён звярнуўся да тых, да каго яго прабачэнні не дайшлі:
«Прабачце за створаныя нязручнасці, страчаны час, сапсаваны адпачынак. Шчыра прашу ў вас прабачэння».
Ён таксама сказаў, што зрабіў усё, што мог, каб загладзіць віну, і папрасіў каментатараў спыніцца. Паўлечка нагадаў, што быў прадпрымальнікам з 18 гадоў, а ў таго, што здарылася, паводле яго слоў, ёсць «пэўныя прычыны». Пра іх ён паабяцаў расказаць пры магчымасці.
«Сваю гісторыю я запісаў — хачу завяршыць тое, што пачаў, і расказаць, як усё было з майго боку, а далей — судзіць вам. Хутка выйдзе серыял у некалькіх частках, прыемнага прагляду!» — напісаў ён.
У канцы — зноў пытанне да былой партнёркі
Завяршыў зварот Паўлечка пытаннем да чалавека, у якога, паводле яго слоў, быў поўны доступ да яго тэлефона і планшэта.
«Аказваецца, нічога не ведаў пра тое, што адбывалася, але пры гэтым мог смела знайсці нейкія перапіскі пра зубкі і пра ўсё астатняе. Пытанне», — сказаў ён.
Імя ён не назваў. Аднак каментатары звязалі гэтыя словы з Кацярынай Карлатяну — заснавальніцай брэнда Krikate, з якой Паўлечка раней быў у адносінах. Яны ўжо публічна спрачаліся пра грошы і доступ да яго перапісак.
«Гэта ў канцы нібыта абвінавачанне Кацярыны, што яна не адрэагавала на вашы махлярскія перапіскі? І тут вінаватая», — напісала адна з карыстальніц Instagram.
Падобная рэакцыя з’явілася і ў Threads:
«Нейкая эпічная канцоўка з вооочень нават не намёкам… ты можаш бясконца прасіць прабачэння і несці пакаранне за зробленае, але навошта спрабаваць пацягнуць за сабой дзяўчыну, з якой быў у адносінах…»
«Нязручнасці — гэта калі дастаўка затрымліваецца»
У Instagram карыстальнікі асобна звярнулі ўвагу на слова «нязручнасці», якім Паўлечка апісаў наступствы для пацярпелых.
«Што да чаго? Нязручнасці — гэта калі дастаўка затрымліваецца ці піца халодная, а ты тых жа “канапавых крытыкаў” кінуў на грошы і адпачынак, але мы не пра гэта, дзе працяг абяцаных гісторый? Ці яны абяцаныя гэтак жа, як пуцёўкі?» — напісаў адзін з каментатараў.
Іншыя не пагадзіліся з тым, што прызнанне віны павінна спыняць грамадскае абмеркаванне.
«Тое, што Вы прызналі сваю віну, не вызваляе Вас ад усеагульнага асуджэння!» — адзначыла карыстальніца Instagram.
У Threads таксама пярэчылі супраць вызначэння таго, што здарылася, як памылкі: карыстальнікі нагадвалі, што гаворка ідзе пра сістэматычны падман, а не пра адзін неабдуманы ўчынак. Некалькі чалавек іранізавалі з «вадалазкі для прабачэнняў», у якой Паўлечка запісаў зварот, — мужчына на відэа ў чорным гольфе.
Былі і прэтэнзіі да падачы інфармацыі Ігарам — маўляў, яна такая, нібыта пацярпелыя ў яго павінны яшчэ прабачэння папрасіць. Але былі і каментарыі ў яго падтрымку. Іх аўтары заклікалі ўлічваць кампенсацыю шкоды і не ператвараць асуджэнне ўчынку ў цкаванне.
За што асудзілі Паўлечку
Паводле даных суда, Ігар Паўлечка і яго саўдзельнік з чэрвеня 2025 года па люты 2026-га прапаноўвалі ў Instagram, Telegram і Viber турпуцёўкі па заніжаных цэнах. Яны атрымлівалі перадаплату, але арганізоўваць паездкі не збіраліся. Грошы пераводзілі ў наяўныя і трацілі на сябе.
Пацярпелымі прызналі 45 чалавек, шкода перавысіла 150 тысяч рублёў. Абодва абвінавачаныя прызналі віну і кампенсавалі шкоду.
Паўлечку прызначылі чатыры гады калоніі ўзмоцненага рэжыму, яго саўдзельніку — тры гады пазбаўлення волі з адтэрміноўкай на тры гады. Кожнаму таксама прызначылі штраф у 13 500 рублёў. Агульная сума кампенсацыі маральнай шкоды пацярпелым склала 7000 рублёў. У фігурантаў справы ёсць яшчэ час абскардзіць рашэнне суда.
Пасля затрымання Паўлечкі ў сацсетках абмяркоўвалі і яго адносіны з Кацярынай Карлатяну. Яна заяўляла, што рассталася з ім 14 лютага, і пазней расказвала, што страціла ў гэтых адносінах каля $30 тыс. Паўлечка сцвярджаў, што вяртаў ёй грошы хаця б часткова.
У верасні, пасля трох месяцаў у СІЗА і выхаду адтуль, ён зрабіў прапанову новай каханай Карыне.
