«Не верыцца, што дачакаліся», — пішуць у чатах, прысвечаных праходжанню мяжы, беларусы. Уначы 17 лістапада адкрылі два закрытыя раней пункты пропуску — «Брузгі» і «Бераставіцу». Рэдакцыя Hrodna.life сабрала, што вядома пра чэргі і новыя аўтобусныя рэйсы.
Увечары 16 лістапада ў пункты пропуску «Брузгі» і «Бераставіца» прыехалі першыя аўтамабілі. Зарэгістравацца ў сістэме электроннай чаргі можна было з 20.00. Каля 22.00 у «Кузніцы» польскія супрацоўнікі прыбралі агароджу. Да 23.00 16 лістапада сабраліся першыя чэргі. Рух аднавіўся ў 2 гадзіны ночы 17 лістапада.
Рух у «Брузгах» даступны толькі для легкавых аўтамабіляў - не для аўтобусаў. У пункт пропуску «Баброўнікі» першым прыехаў аўтобус «Беласток-Гродна». Ажыятажу і вялікіх чэргаў не было, паведамляюць СМІ. Першыя пасажыры ў інтэрв'ю радаваліся адкрыццю мяжы і таму, што не трэба будзе падоўгу стаяць у чэргах.
Што адбываецца цяпер у адкрытых пунктах пропуску?
На 10 раніцы 17 лістапада ў «Брузгах», паводле сайта Дзяржпагранкамітэта, нуль аўтамабіляў на выезд з Беларусі. Мяркуючы па анлайн-камеры, на выезд стаяць тры аўтамабілі, на ўезд — нікога.
Тая ж сітуацыя з электроннай чаргой у «Бераставіцы». Онлайн-камеры там пакуль не працуюць.
Перабудова аўтобусных рэйсаў
З 17 лістапада частка аўтобусаў з Гродна ў Беласток паедзе менавіта праз «Бераставіцу». Маршрут з Гродна ў Беласток стане карацейшым на некалькі сотняў кіламетраў. Час у шляху таксама скараціцца. Па раскладзе такі рэйс займае каля трох гадзін, але варта ўлічваць фактар чаргі на мяжы. Якой будзе «калейка» ў «Бераставіцы», прагназаваць пакуль складана, паведамляе сервіс «Атлас».
Цэны на аўтобусы сталі танней
Квіткі з Гродна ў Беласток ужо патаннелі. Яшчэ нядаўна яны каштавалі 150 рублёў. Цяпер квіткі на аўтобусы, якія паедуць праз «Баброўнікі», прадаюцца па 100 рублёў. Да Варшавы з Гродна можна даехаць за 130 рублёў.
На 18 лістапада на адзін з чатырох рэйсаў ужо няма месцаў, на другі - засталося апошняе.
Што абмяркоўваюць пасажыры?
Абмеркаванне ў чатах, прысвечаных мяжы, актывізавалася. Людзі цікавяцца, які час праходжання мяжы быў раней у «Бераставіцы» і ці працуе там Duty Free (спойлер — адказваюць: не працуе). А яшчэ пішуць: «Не верыцца, што дачакаліся».
