У час выканання баявых абавязкаў ва Украіне загінуў баец палка Каліноўскага і Міжнароднага легіёна, грамадзянін Польшчы, Пшэмыслаў “Кордзіян” Расевіч-Кучынскі. Раней ён быў валанцёрам у Гродне і вадзіў бясплатныя экскурсіі.
Пшэмыславу было 36 гадоў. Ён меў беларускія карані, валодаў беларускай мовай і цікавіўся нашай гісторыяй і культурай. Ён лічыў Беларусь сваёй другой Бацькаўшчынай, адзначылі ў прэс-службе Палка Каліноўскага. “Кордзіян паспеў прайсці не малы баявы шлях і ўсяляк намагаўся дапамагаць беларускім добраахвотнікам ва Украіне”, – напісаў полк. Мужчына загінуў 6 жніўня. 13 жніўня на Байковых могілках у Кіеве прайшла цырымонія развітання ў суправаджэнні ганаровай варты Узброеных сіл Украіны. На ёй прысутнічала маці загінулага. Яна трымала каля труны тры сцягі: Польшчы, Украіны і Беларусі, што сімвалізавала адданасць Пшэмыслава Расевіча-Кучынскага справам гэтых краін, піша Fakt.pl. Ваяра пахавалі, згодна з ягонай апошняй воляй, на Лычакаўскіх могілках у Львове.
Як Пшэмыслаў Расевіч-Кучынскі звязаны з Гроднам
У 2018-2019 гадах Пшэмыслаў жыў у Гродне, год быў валанцёрам у адной з грамадскіх арганізацый у межах міжнароднай праграмы абмену “Еўрапейскі корпус салідарнасці”. Дапамагаў весці заняткі па польскай мове, ладзіць іншыя імпрэзы. Таксама ён праводзіў бясплатныя экскурсіі па горадзе на польскай і англійскай мовах – Free walking tour.
Чытайце таксама: Бясплатныя экскурсіі ў Гродна абурылі чыноўнікаў ад турызму: што ім не спадабалася?
Знаёмыя з Пшэмыславам успамінаюць яго па-рознаму. “Быў спакойным і ветлівым, негаваркім”, – расказаў адзін з гродзенцаў, які працаваў з ім у той час. Пасля валанцёрства ў Гродне Пшэмыслаў пераехаў у Брэст. “Менавіта там яго цікаўнасць да беларускага раскрылася найбольш ярка”, – адзначае гродзенец. Іншая калега Пшэмыслава па валанцёрству ўспамінае, што ён быў “досыць шалёны чалавек”.
Да палка Каліноўскага Пшэмыслаў далучыўся ў верасні 2022 года.
