Настаяцеля прыхода храма Святога Архангела Міхаіла ў вёсцы Сынкавічы Зэльвенскага раёна Гродзенскай епархіі судзілі за самавольныя пабудовы. Пакараць яго хацелі за купель і іншыя пабудовы для паломнікаў і турыстаў.
Згодна з пратаколам, прыход без дазволу і праекта пабудаваў купель і трапезную, а ў іншым годзе — склеп, дамы паломнікаў, мансарды, прыбудовы, пакрыцці, манументальныя скульптуры. Таксама кіраўніцтва самавольна рэканструявала жылы дом, узвяло прыбудовы, гаспадарны блок, агароджы і брамкі — усяго 28 адзінак.
Гэтым прыход парушыў Закон «Аб архітэктурнай, горадабудаўнічай і будаўнічай дзейнасці»
Справу паводле 22.8 КаАП разгледзелі 8 красавіка ў судзе Зэльвенскага раёна. Прадстаўнікі парафіі не прыйшлі ў суд. Яны прызналі віну і папрасілі вызваліць храм ад адміністрацыйнай адказнасці ў сувязі з малазначнасцю зробленага.
Суд так і зрабіў. Ён прыняў да ўвагі, што пабудовы не прычынілі шкоды інтарэсам, якія ахоўваюцца законам. Таксама прыход, на думку суда, не ведаў аб парушэнні закона і добраўпарадкоўваў тэрыторыю ў інтарэсах шматлікіх вернікаў, паломнікаў і турыстаў.
Царква Святога Архангела Міхаіла — адзін з самых ранніх гатычных праваслаўных храмаў Беларусі. Гэта помнік культава-абарончай познегатычна-рэнесанснай архітэктуры і адна з першых цэркваў-крэпасцяў у ВКЛ. У свой час рэстаўрацыю там праводзіць мастак-рэстаўратар Алесь Пушкін, які памёр у гродзенскай турме. Настаяцель храма — протаіерэй Арсеній Ананка.
