Каля 60 чалавек сабралася 7 лістапада пад помнікам Леніну ў Гродне, каб адзначыць 106-ю гадавіну Кастрычніцкай рэвалюцыі. У руках былі не толькі сцягі СССР, камсамолу, сучасны чырвона-зялёны дзяржаўны сцяг, але і сцяг умоўных «ліберальных дэмакратаў» Гайдукевіча.
Удзельнікі мітынгу склалі кветкі да ног кіраўніка сусветнага пралетрыяту і падзяліліся меркаваннямі наконт свята. Прыводзім іх ніжэй, каб чытачы Hrodna.life разумелі, як і пра што думаюць удзельнікі такіх святаў.
«Зламалі хрыбет капіталізму»
— Да дня Кастрычніцкай рэвалюцыі ў Гродзенскай вобласці і па ўсёй краіне адкрыта шмат сацыяльна значных аб’ектаў. Гродна атрымаў у падарунак новую транспартную развязку і паліклініку, — адзначыла першы сакратар Гродзенскага абласнога камітэта Камуністычнай партыі Беларусі Жанна Грыцкевіч.
Насамрэч, гэта нельга назваць падарункам, бо ніхто развязку і паліклініку не дарыў: іх пабудавалі самі гродзенцы за падаткі, заплачаныя самімі гродзенцамі.
— Я ўступіла ў Камуністычную партыю ў 1980 годзе. Для мяне гэта была вельмі важная падзея, бо гэта наша сямейная традыцыя — мой бацька таксама быў чальцом партыі. Хачу адзначыць, што ідэалы, якія абвясціла Кастрычніцкая рэвалюцыя 1917 гады, актуальныя і сёння. Менавіта тады сталі нормай такія паняцці, як сацыяльная справядлівасць, роўнасць, бясплатная адукацыя і медыцына. Усё гэта частка нашага сучаснага жыцця, а значыць, камунізм заклаў моцны падмурак для развіцця нашай дзяржаўнасці ва ўсіх кірунках, — сказала першы сакратар Гродзенскага гарадскога камітэта Камуністычнай партыі Беларусі Лілія Кашанкова.
— Дзякуючы ўсталяванню савецкай улады мы пабудавалі першую ў свеце і, мабыць, адзіную сацыяльна справядлівую дзяржаву. Быў зламаны хрыбет капіталізму, за што нас зненавідзелі і праз два дзесяцігоддзі прыйшлі на нашу зямлю з вайной. Але мы выстаялі і сталі мацней: мы стварылі перадавую навуку, прыручылі мірны атам, асвоілі космас. Нашымі творамі мастацтва захапляўся і захапляецца ўвесь свет. Трэба адзначыць, што мы стварылі таксама незалежную фінансавую сістэму. Усё гэта дагэтуль выклікае зайздрасць у прыхільнікаў аднапалярнага міру і гонар у народаў, якія сталі спадчыннікамі Савецкага Саюза. Таму сёння мы бачым, як тыя, хто ва ўгоду ўласным інтарэсам здрадзіў гэты велічны праект, расказваюць нашай моладзі, што СССР быў нежыццяздольнай дзяржавай. Але гэта няпраўда. І захаваныя ў наш час пастулаты і традыцыі сацыялізму — гэтаму пацвярджэнне, — падзяліўся сваім меркаваннем Арцём Макарэвіч, першы сакратар Гродзенскай гарадской арганізацыі БРСМ.
Насамрэч, цяжка сказаць, што «быў зламаны хрыбет капіталізму», бо Савецкі Саюз аказаўся нежыццяздольным, заўсёды быў у ролі даганяючага і так і не змог дагнаць капіталістычныя краіны паводле ўзроўню жыцця, развіцця навукі, медыцыны і іншых сфераў. Краіны-сатэліты СССР часта жылі лепей, чым сам Саюз, але перадусім дзякуючы больш актыўным кантактам з Захадам, гандлю і заходнім крэдытам.
Удзельнікаў мітынгу робіцца болей
У Гродзенскай гарадской арганізацыі Камуністычнай партыі Беларусі - каля 140 членаў. Калі параўноўваць з фотаздымкамі з мітынгаў мінулых гадоў, то выглядае, што прыхільнікаў Леніна стала ў Гродне крыху больш.
Чытайце таксама:
