Паглядзець, як смажаць каву і пакаштаваць выпечку з печы: на Найдуса адкрылі кавярню ў амерыканскім стылі

Кавярню-пякарню «The Big Easy» адкрылі ў Гродне на вуліцы Найдуса, 1 на першым паверсе гандлёвага цэнтра ABC. Яе пазіцыянуюць як «кавярню Новага Арлеана» — з джазам і свежаабсмажанай кавай.

Кавярня-пякарня «The Big Easy. Coffee Roasters» працуе ў тэставым рэжыме з 15 ліпеня 2023 года. Там можна паглядзець, як абсмажваюць каву і набыць зерне дадому, прадэгуставаць розныя гатункі кавы і віды абсмажвання, а таксама пакаштаваць выпечку з печы.

Уладальнік кавярні - амерыканец. Ён стварыў установу з канцэпцыяй «кавярня Новага Арлеана». Адна з частак гэтай канцэпцыі - джазавая музыка ў фоне.

Кавярня працуе з панядзелка па нядзелю з 10:00 да 22:00.

Што ёсць у меню і колькі гэта каштуе

У меню ёсць аўтарская кава The Big Easy і Lafayette — яна каштуе 7,95 рублёў. Калі набываць каву з выпечкай, то цана будзе ніжэй — 6,95. Аўтарская кава Black Beard — 8,96 рублёў і 7,95 рублёў з выпечкай. Сярод выпечкі прапануюць маффіны, круасаны, пальм’ё, эскарго, а таксама брыёш.

Кава на аснове малака альбо чорная кава каштуе ад 4,96 да 6,95 рублёў. Дадаткова можна папрасіць кляновы сіроп за два рублі ці какосавае альбо міндальнае малако за 1,5 рублі.

Таксама ў кавярні прапануюць гарбаты, какавы, фрэшы, халодную каву і мілкшэйкі. У будучыні меню плануюць пашырыць — дадаць абеды.

Якія яшчэ ўстановы адкрылі ў Гродне ў ліпені

У ліпені 2023 года на вуліцы Дзяржынскага, 12, насупраць Цэнтра занятасці, адкрылі шаўрмічную Vgorode. Асноўны акцэнт установы — на халялі.

У сярэдзіне месяца адкрылі новы рэстаран «Наше дело» ў дворыку на Вялікай Траецкай, 37. Установу адкрылі стваральнікі PUNK ROLL і «Лаўка шэфа» — Сяргей Махаўцоў і калегі. Новае месца спецыялізуецца на італьянскай кухні.

Якія бары і рэстараны рыхтуюць да адкрыцця

На вуліцы Савецкай, 25 рыхтуюць да адкрыцця марціні бар Mama Cherry Martini Bar. Ён будзе размяшчацца ў суседнім памяшканні з кафэ «Поляна City» — ва ўстановаў адзін уласнік. У марціні бары Mama Cherry можна будзе паесці, выпіць кактэйль і пакурыць кальян. Таксама абяцаюць DJ-сэты.

На Замкавай плануюць адкрыць рэстаран у фларэнтыйскай стылістыцы Boboli. Уласнікі пазіцыянуюць месца як нэабістро. Зараз у памяшканні ідзе рамонт і падрыхтоўка персанала.