Стужка пра абарону Гродна ад Чырвонай арміі ў верасні 1939 года выйдзе ў польскі пракат 9 верасня 2022 года. “Orlęta. Grodno ’39” – першы мастацкі фільм пра агрэсію савецкіх войскаў супраць Польшчы ў 1939 годзе.
“Гродна, ўсходнія межы даваеннай Польшчы. 1 верасня 1939 года нямецкія самалёты бамбяць горад. Адна з бомбаў трапляе ў школу Леося, Эвэліны і Тадэка. Літаральна і сімвалічна сканчаецца свет бесклапотнага дзяцінства, весялосці, першых захапленняў. Леосю 12 гадоў, ён яўрэйскі хлопчык, які захапляецца польскай незалежніцкай традыцыяй”, – напісана ў апісанні фільма на сайце Фестывалю польскіх мастацкіх фільмаў у Гдыні. Фестываль адбудзецца ў верасні 2022 года, а фільм “Orlęta. Grodno ’39” удзельнічае ў галоўным конкурсе.
17 верасня 1939 года, паводле таемных савецка-германскіх пагадненняў, Чырвоная Армія пападае на Польшчу. Горад пачынае безнадзейную барацьбу. “Менавіта дзеці і моладзь гераічна абараняюць горад, становячыся ахвярамі незвычайнай жорсткасці акупантаў”, – напісана ў апісанні стужкі.
Рэжысёр ужо здымаў фільм, звязаны з Беларуссю
Працягласць стужкі – 1 гадзіна 44 хвіліны. Рэжысёр і сцэнарыст фільма – Кшыштаф Лукашэвіч. У галоўных ролях Ёвіта Буднік, Фелікс Матэцкі, Альміра Наврот, Бартломей Топа.
У фільме “Арляняты”, разам са сваёй жонкай Таццянай, здымаўся гродзенскі журналіст Руслан Кулевіч.
У 2011 годзе Кшыштаф Лукашэвіч зняў фільм “Жыве Беларусь”. Стужка была заснавана на рэальных падзеях: гісторыі маладога апазіцыянера Франака Вячоркі, якога адлічылі з універсітэту і ў пакаранне прызвалі ў войска.
Фільм “Orlęta. Grodno ’39” фінансаваў Польскі інстытут кіно і Міністэрства культуры і нацыянальнай спадчыны Польшчы. На рэкламу стужкі выдаткуюць 540 тыс. злотых (€115 тыс).
Дзе і калі здымалі кіно
Сцэнар быў гатовы ў 2018 годзе. Кшыштаф Лукашэвіч планаваў выпусціць фільм яшчэ ў 2019 годзе – да 80-годдзя савецкага ўварвання ў Польшчу. Але здымкі пачаліся толькі ў верасні 2020 года.
Фільм здымалі ў некалькіх гарадах Польшчы. Але для асноўных сцэнаў фільма абралі Радом. Кінастудыя аднавіла вуліцу Дамініканскую [сучасная Савецкая – Hrodna.life] і іншыя вуліцы Гродна.
Усе героі фільма – выдуманыя. Але іх стварылі на аснове ўзгадак удзельнікаў і сведак абароны Гродна. Напрыклад, абаронца Гродна Тадзік Ясінскі з’явіцца ў фільме як Тадзік Ясюкевіч.
Чытайце таксама:
В Польше снимают фильм про Гродно 1939 года. Hrodna.life побывал на съемках
