Кнігі «Мифы о Беларуси» Вадзіма Дзеружынскага і «Welcome to Belarus» Алеся Гутоўскага знялі з продажу ў гродзенскай краме «Green». Кіраўніцтва гіпермаркета правяло разбіральніцтва пасля звароту актывісткі Вольгі Бондаравай. Адказ загадчыка крамы ад 15 чэрвеня Вольга размясціла ў сваім Telegram-канале.
Ёй прынеслі прабачэнні за «дастаўленыя нязручнасці». Звярнулася Вольга з просьбай прыбраць кнігі 31 траўня.
Аб чым кнігі?
У кнізе «Мифы о Беларуси» разглядаюцца найбольш распаўсюджаныя міфы аб народзе і краіне. «Беларусы — адзіны ў свеце народ, уяўленні якіх пра саміх сябе поўныя міфаў і памылак, часам вельмі дзіўных і нават недарэчных. Якую сферу жыцця ні вазьмі, усюды гэтыя міфы. Парадокс у тым, што да іх усе прывыклі, іх амаль ніхто не заўважае, не ўсведамляе», — піша у анатацыі аўтар.
«Беларусь — неверагодна прыгожая краіна, багатая сваёй чароўнай прыродай. Нашая прырода разнастайная, а кожная паравіна года адметная і непаўторная. Лес і вада — нашая найвялікшая каштоўнасць, якой мы ганарымся. Але, на жаль, не кожны можа ўбачыць гэтую красу, асабліва жыхары вялікіх гарадоў, якім будзе даспадобы наш альбом. Фатограф чулым і пільным позіркам углядаўся ў беларускія краявіды і здолеў па-майстэрску перадаць іх магію. Альбом адрасаваны беларусам і шаноўным гасцям нашай краіны», — піша пра кнігу «Welcome to Belarus» аўтар.
Бондарава адзначыла, што абедзве кнігі - выдавецтва «Харвест», якое выпускала таксама кнігі Віктара Ляхора. Кнігу Віктара Ляхора «Военная история Беларуси. Герои, символы, цвета» 18 красавіка прызнаў экстрэмісцкімі матэрыяламі суд Ленінскага раёна Гродна.
Барацьба з кнігамі ў Беларусі
У краме «OZ» ў Гродне пасля звароту Бондаравай прыбралі кнігу «Лето в пионерском галстуке». Яна распавядае пра аднаполае каханне ў савецкім піянерлагеры. Раней у дзяржаўныя кнігарні паступіла распараджэнне: зняць з продажу раман Джорджа Оруэла «1984».
