У дзяржаўныя кнігарні раніцай 18 траўня паступіла распараджэнне: зняць з продажу раман Джорджа Оруэла «1984». Гэту інфармацыю Hrodna. life пацвердзілі ў кнігарнях «Раніца» і «Праметэй» у Гродне, якія ўваходзяць у прадпрыемства «Белкніга».

У кнігарнях знялі з паліц “1984” Джорджа Оруэла. Прычына: “Паступіла распараджэнне”
Раман Джорджа Оруэла «1984» у перакладзе на беларускую мову. Фота: Hrodna. life

У прыватныя кнігарні такое распараджэнне не паступала, расказалі ў кнігарні OZ у Гродне. Ёсць кніга і ў дробных прыватных распаўсюднікаў. Таксама раман «1984» можна набыць у інтэрнэт-крамах і маркетплэйсах, напрыклад на Wildberries.

Хаця кніга знікла з паліц дзяржаўных крамаў, некалькі розных выданняў «1984» дагэтуль можна заказаць праз сайт «Белкнігі». У тым ліку — беларускі пераклад, выдадзены «Янушкевічам». Журналіст Hrodna. life паспрабаваў зрабіць заказ — пакуль ён застаецца ў статусе «Чакае апрацоўкі».

У дзяржаўных кнігарнях у продажы застаюцца іншыя кнігі Оруэла: «Ферма», «Англія і англічане», «Эсэ».

Пра што раман «1984»

Антыутопія Джорджа Оруэла «1984» апісвае таталітарнае грамадства. Жыхары пазбаўленыя грамадзянскіх правоў і індывідуальнасці, ідэя парадку абсалютызуецца, існуе культ асобы Вялікага Брата, ад людзей патрабуюць поўнага і некрытычнага падпарадкавання ўладам. Нават мову змяніла навамоўе. «Вайна — гэта мір», «свабода — гэта рабства» і «Вялікі Брат сочыць за табой», — гэтыя выразы з рамана сталі афарызмамі.

Раман не раз выходзіў у Беларусі

Сяргей Шупа пераклаў раман на беларускую мову ў 1992 годзе. Тады выйшла першае выданне. У 2020 годзе кнігу перавыдала выдавецтва «Янушкевіч». У 2021 годзе выйшаў дадатковы наклад.

У траўні 2021-га кіраўнік «Белкнігі» Аляксандр Вашкевіч расказваў, што «1984» займаў 4 месца сярод найбольш прадаваных кніг у кнігарнях сеткі.