Першае захворванне на воспу малпаў пацвердзілі ў Польшчы. Пра гэта 10 чэрвеня сказаў міністр аховы здароўя краіны Адам Недзельскі. Таксама не менш за два выпадкі захворвання выявілі ў Латвіі.
«У нас было каля 10 падазрэнняў на воспу малпаў, зараз яны праходзяць праверку. 10 чэрвеня — дзень, калі ў нас першы выпадак», — сказаў міністр аховы здароўя Польшчы Адам Недзельскі.
Зараз пацыент з пацверджаным вірусам знаходзіцца ў бальніцы. Інфармацыю пра яго стан не паведамляюць.
Што адбываецца ў Латвіі і Літве
Вірус малпаў 3 чэрвеня выявілі ў двух чалавек у Латвіі, паведаміла выданне delfi.lv. Абодва захварэўшыя — мужчыны да 50 гадоў. Першы з іх заразіўся за мяжой. У абодвух хвароба праходзіць лёгка.
У Літве ўжо робяць тэсты на выяўленне хваробы. «На гэтым тыдні мы нават атрымалі першы прыклад з падазрэннем на гэта віруснае захворванне. Аднак вынік тэста адмоўны, таму зараз зафіксаваных выпадкаў воспы малпаў у Літве няма», — піша delfi.lt са спасылкай на нацыянальную лабараторыю грамадскай аховы здароўя.
Чытайце таксама: Гродно готовится бороться с оспой обезьян. Что это за болезнь и чем она опасна (8 карточек)
Ці рыхтуюцца да віруса ў Беларусі
Міністэрства аховы здароўя Беларусі ацэньвала верагоднасць завоза хваробы як нізкую. Гэта звязана з адсутнасцю авіазлучэння з большасцю краін.
У канцы траўня стала вядома, што ў Гродне хочуць правесці навучальную трэніроўку на выпадак, калі ў Беларусь увязуць воспу малпаў. Яна павінна адбыцца на памежнай заставе. Пра гэта сказаў намеснік міністра аховы здароўя - галоўны дзяржаўны санітарны лекар Аляксандр Тарасенка.
Чытайце таксама: 2700 рублёў гатовыя плаціць медсястры ў Гродне. У вобласці шукаюць сотні лекараў - якія раёны ў лідарах па недахопе
Што такое воспа малпаў?
Воспа малпаў - інфекцыйнае захворванне, крыніцай якой з’яўляюцца малпы. Хвароба не мае вялікай заразнасці, але можа перадавацца ад чалавека да чалавека пры доўгатэрміновым кантакце. Таксама можа перадавацца паветрана-капельным шляхам і палавым шляхам. Інкубацыйны перыяд цягнецца ад 5 да 21 дня.
Пачынаецца хвароба з павышэння тэмпературы цела, галаўной і мышачнай болі, магчыма галавакружэнне, ванітаванне. Далейшыя сімптомы падобны да натуральнай воспы — на целе з’яўляецца сып.
Хвароба можа працякаць у лёгкай і сярэдней ступені цяжкасці.
