Прысуд Соф'і Сапезе, затрыманне шаурміста, гімн у дзіцячых садках. Як прайшоў тыдзень у Гродне і вобласці

Палітзняволенай Соф'і Сапезе прысудзілі шэсць гадоў пазбаўлення волі з адбываннем пакарання ў калоніі агульнага рэжыму. Пакуль яна будзе знаходзіцца ў СІЗА турмы № 1 Гродна. У Гродне ГУБАЗ затрымаў шаурміста — проста на працоўным месцы. У дзіцячых садах Гродна будуць уключаць дзяржаўны гімн — гэта пройдзе ў рамках «актывізацыі» патрыятычнага выхавання. Рэдакцыя Hrodna. life вывучыла, што адбылося ў вобласці ў першы тыдзень траўня.

Юрыста Дзмітрыя Салаша з Гродна ўлады прымусілі звольніцца з працы з-за яго грамадзянскай пазіцыі

Дзмітрый Салаш быў затрыманы падчас антываеннай акцыі ў лютым 2022 года. На яго склалі пратакол аб адміністрацыйным правапарушэнні. Кіраўніцтву на працы Салаша быў дадзены загад: альбо арганізацыя зачыняецца, альбо юрыст не застаецца працаваць, сцвярджае «Гарадзенская праваабарона». У якой арганізацыі ён працаваў, не ўдакладнілі.

Дзмітрый быў адным з аўтараў звароту да дэпутата Ліліі Кір'як аб змене арт. 23.34 КаАП, па якім судзілі ўдзельнікаў пікету.

Суды ў Гродне

Затрыманую ў Гродне 16 лютага Наталлю Малец пачалі судзіць па двух артыкулах Крымінальнага кодэксу — 368 «Абраза Прэзідэнта Рэспублікі Беларусь» і 369 «Абраза прадстаўніка ўлады». Пасяджэння пачаліся 12 траўня ў судзе Кастрычніцкага раёна Гродна. Суддзя — Уладзімір Пазняк.

Яўгена Блахінскага затрымалі 18 студзеня, калі ён прыехаў у Гродна з Германіі. На камеру сілавікам Яўген сказаў, што ў 2020-м годзе знаходзіўся ў чатах, прызнаных экстрэмісцкімі, дзе заклікаў «да масавых беспарадкаў, забойстваў міліцыіі, спальванню «Табакерок». Яго судзяць за:

• 342 ч. 1 — Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх,
• 293 ч. 1 — Масавыя беспарадкі,
• 368 ч. 1 — Абраза прэзідэнта Рэспублікі Беларусь,
• 130 ч. 1 — Распальванне расавай, нацыянальнай, рэлігійнай альбо іншай сацыяльнай варожасці або варажнечы.

Пасяджэнні пачаліся 4 траўня ў Гродзенскім абласным судзе. Суддзя — Мікалай Рачынскі.

Сяргея Ліцкевіча ў Гродне пачалі судзіць за:

• 370 КК — Здзек з дзяржаўных сімвалаў;
• 368 ч. 1 КК — Абраза прэзідэнта Рэспублікі Беларусь;
• 369 КК — Абраза прадстаўніка ўлады.

Інфармацыю пра Ліцкевіча знайсці не ўдалося. Дадзеныя артыкулы лідзіруюць як прычына для затрымання. Як правіла, падставай для ўзбуджэння крымінальных спраў па гэтых артыкулах з’яўляецца каментар.

Мастака і палітвязня Алеся Пушкіна ўключылі ў спіс фізічных асоб, якія маюць дачыненне да экстрэмісцкай дзейнасці

Міністэрства ўнутраных спраў Беларусі абнавіла спіс. 29 красавіка ў яго ўключылі яшчэ 29 чалавек, сярод іх — Алесь Пушкін. Усяго ў спісе 219 чалавек, паведаміла «Гарадзенская праваабарона».

Андрэй Ханевіч — на волі

Чакаецца суд. Па якім артыкуле і ў чым яго абвінавачваюць, пакуль невядома.

Андрэя Ханевіча, старшыню Першаснай арганізацыі Беларускага Незалежнага прафсаюза ААТ «Гродна Азот», затрымалі раніцай 29 красавіка. Абставіны затрымання былі невядомыя.

На тыдні прызначылі пасяджэнне аб прызнанні незалежнага прафсаюза «Гродна Азот» экстрэмісцкай арганізацыяй, забароне яе дзейнасці і яе ліквідацыі.

Суддзя — Жанна Краўчанка. Суд пройдзе 10 траўня ў Гродзенскім абласным судзе.

Зняволенага больш за год таму журналіста Анджэя Пачобута перавялі ў СІЗА № 1 Мінска

Пра гэта паведамляе БАЖ.

Анджэй Пачобут — журналіст і адзін з лідэраў Саюза палякаў Беларусі. Працаваў у недзяржаўных беларускіх медыя і супрацоўнічаў з замежнымі выданнямі. Вывучае гісторыю Арміі Краёвай на тэрыторыі Беларусі. Журналісту прад’явілі афіцыйнае абвінавачанне па арт. 130 КК «Распальванне расавай, нацыянальнай, рэлігійнай альбо іншай сацыяльнай варожасці або варажнечы». Яму пагражае ад 5 да 12 гадоў пазбаўлення волі.

У Гродне перадумалі рабіць акцыю «Бяссмертны полк»

«Бессмяротнага палка» ў Гродне не будзе, стала вядома 5 траўня. Замест гэтага пройдзе акцыя «Беларусь памятае» на пр-це Касманаўтаў, паведаміла актывістка Вольга Бондарава.

25 красавіка яна пісала, што атрымана «прынцыповую згоду» Гродзенскага гарвыканкама на правядзенне акцыі.

Акцыя прыйшла з Расіі. Там існуюць два руху: «Бяссмертны полк» і «Бяссмертны полк Расіі». У арганізатараў былі канфлікты і раней. Але ў 2022 годзе ў калону «БПР» дазволілі ўстаць людзям з партрэтамі ваенных, якія загінулі ў час вайны Расіі ў Украіне. Стваральнікі «БП» выказаліся супраць вайны ва Украіне і папрасілі не звязваць іх з будучымі шэсцямі.

У дзіцячых садах Гродна будуць уключаць дзяржаўны гімн. Гэта пройдзе ў рамках «актывізацыі» патрыятычнага выхавання

Дзецям будуць:

• абавязкова ўключаць дзяржаўны гімн перад пачаткам навучальнага года,
• у сярэдніх і старэйшых групах яшчэ і перад пачаткам заняткаў (кожны дзень або кожны тыдзень).
• раз на месяц іх абавязкова будуць вадзіць на прагулкі і экскурсіі ў музеі і да гістарычных помнікаў.
• перад дзяржаўнымі святамі праводзіць заняткі на тэму «Наш герб. Наш сцяг. Наш гімн» і гэтак далей.

Гэта стала вядома з дакумента «Аб удасканаленні работы па патрыятычнаму выхаванню», складзенаму галоўным упраўленнем адукацыі Гродзенскага аблвыканкама. Яго даслалі ў рэдакцыю Z**kalo.io чытачы.

Галоўны спецыяліст па пытаннях дашкольнай адукацыі Анжаліка Кухта патлумачыла журналістам, што патрыятычнае выхаванне дзяцей у Гродзенскай вобласці было і раней, але яго вырашылі актывізаваць «у сувязі з апошнімі не зусім правільнымі падзеямі».

Гродзенцаў 6 траўня прызналі палітвязнямі

Гэта:

• Андрэй Сцепаненка, асуджаны па ч. 1 арт. 368 КК за абразу А. Лукашэнкі да 1 года і 6 месяцаў пазбаўлення волі ў папраўчай калоніі;

• Аляксандр Лаўрэнцьеў, зняволены пад варту за абразу А. Лукашэнкі па арт. 368 КК і прадстаўніка ўлады па арт. 369 КК;

6 траўня прызналі палітвязнямі яшчэ 30 чалавек. Зараз іх у Беларусі 1188.

Чырвона-зялёныя стужкі

У Наваградку прадаўцам раздалі чырвона-зялёныя стужкі і прымушаюць іх насіць пад пагрозай пазбаўлення прэміі, сцвярджае Б**сат. Разам са стужкамі раздалі і такія запіскі.

«Вясна»: Былы супрацоўнік «Гродна Азот» Андрэй Пагерыла атрымаў «хросную» сярод еўрапейскіх парламентарыяў

Юрыстка і дэпутатка Аляксандра Луі — першая прадстаўніца французскага парламента, якая ўдзельнічае ў кампаніі #WeStandBYyou. Яна з’яўляецца прадстаўніком партыі Agir у Нацыянальнай асамблеі і членам юрыдычнай камісіі. Аляксандра Луі стала «хроснай» Андрэя Пагерылы і каментуе сваё рашэнне:

«Для мяне вялікі гонар быць „хроснай маці“ Андрэя Пагерылы. Мне выпалі гонар і шчасце жыць у прававой дзяржаве, і я лічу сваім абавязкам абараняць яе каштоўнасці. У гэтай дэкларацыі я хачу выказаць сваю непахісную падтрымку справе спадара Пагерылы і ўсім палітвязням. Спадара Пагерылу абвінавачваюць у дзяржаўнай здрадзе толькі за тое, што ён проста ўдзельнічаў у дэманстрацыі; ён дагэтуль чакае суду. Я выступаю супраць усіх неправамерных арыштаў беларускіх грамадзян».

#WeStandBYyou — кампанія салідарнасці, арганізаваная «Libereco — партнёрства за правы чалавека».

На ўездзе ў Беларусь затрымалі дзяўчыну, якая публікавала ў Instagram «забаронку»

Цэлы сюжэт ёй прысвяціў тэлеканал «Гродна Плюс». Афіцыйна дзяўчыну затрымалі на мяжы за перавозку «БЧБшнай» і нацысцкай сімволікі. БЧБ яна купіла яшчэ ў 2018 годзе ў мінскай краме «Сімвал» (імаверна, маецца на ўвазе Symbalby), «нацысцкую» — на барахолках Львова і Кіева. У дзяўчыны ёсць кніга Адольфа Гітлера «Мая барацьба».

Дзяўчыну завуць Ганна Саковіч. Яна працуе ў стрыптызе і ездзіць на заробкі ў Еўропу. Яе папярэдзілі аб крымінальнай адказнасці за «хайп». Таксама на працягу сямі хвілін дзяўчына разважала пра нацыстаў, помнік Бандэру і сувязь помнікаў з вайной. Цяпер дзяўчына ў ІЧУ.

«Хацела хайпануць на гэтай сімволіцы, таму што гэта забаронена. Думала, што можна напакаваць сабе падпісчыкаў, стаць больш папулярнай у сетцы. Для Instagram — гэта для Instagram, а мая палітычная пазіцыя — абсалютна іншая. Я аддала голас за дзейнага прэзідэнта Аляксандра Лукашэнку, іншых кандыдатаў не ведала», — сказала Ганна.

Следства па справе палітвязня журналіста Дзяніса Івашына скончылася
‍

Аб гэтым паведаміла яго жонка Вольга. Верагодна, хутка прызначаць дату суда. Таксама да Дзяніса Івашына пачала даходзіць карэспандэнцыя. Прынамсі, дасланыя бацькамі лісты трапілі да адрасата.

Дзяніс Івашын — палітвязень і журналіст. Яго падазраюць па ст. 365 КК «Умяшальніцтва ў дзейнасць супрацоўніка органаў унутраных спраў» і арт. 356 КК «Здрада дзяржаве». Яго прызналі палітвязнем. Ён адмовіўся пісаць Лукашэнку ліст аб памілаванні. У сакавіку яго абвінавацілі ў супрацоўніцтве з украінскай выведкай.

Першы сакратар амбасады Крысціян Зіпман напісаў ліст Дзянісу Івашыну. У ім ён захапіўся яго адвагай, распавёў пра тое, як сочыць за судовымі працэсамі супраць СМІ і прапанаваў звярнуцца да амбасады пры неабходнасці. Ліст апублікавала жонка Дзяніса Вольга Івашына. З нагоды Сусветнага дня свабоды друку, які прайшоў 3 траўня, Амбасада Нямеччыны ў Мінску напісала лісты 24 прадстаўнікам СМІ, якія знаходзяцца ў зняволенні ў Беларусі.

У Гродне ГУБАЗ затрымаў хлопца з татуіроўкамі з нацысцкай сімволікай

На камеру гродзенец абяцаў звесці татуіроўкі. Ён прынёс прабачэнне ветэранам Вялікай Айчыннай вайны і людзям, якія пацярпелі ад дзеянняў фашыстаў.

У Гродне адмянілі канцэрт Філіпа Кіркорава

На сайце па продажы квіткоў напісана, што мерапрыемства прыпынена. Канцэрт павінен быў прайсці 20 траўня ў Гродзенскім Лядовым палацы спорту. Тое ж здарылася і ў Мінску.

Філіп Кіркораў у пачатку траўня звярнуўся да расійскай прапагандысткі Маргарыты Сіманьян. Ён заступіўся за Максіма Галкіна, які выступіў супраць ваенных дзеянняў Расіі ва Украіне. Сіманьян названая Галкіна «геем, які ажаніўся з пажылой жанчынай для ўзбагачэння».

За некалькі дзён да гэтага Лукашэнка павіншаваў Кіркорава з днём нараджэння. Пазней віншаванне ў Telegram-канале прэс-службы Лукашэнкі знікла.

Супраць — 40%, за — 32%, а кожны дзясяты пойдзе ў войска ў выпадку вайны ў нас. Беларусаў спыталі пра вайну ва Украіне

Амаль траціна апытаных падтрымлівае вайну ў Украіне, 40% - супраць. Пры гэтым беларусы не лічаць сябе вінаватымі ў нападах з тэрыторыі Беларусі, успрымаюць санкцыі занадта жорсткімі, і не гатовыя ўключацца ў вайну. Праз паўтара месяца ад пачатку вайны ва Украіне даследчыкі аналітычнага цэнтра Chatham House спыталі беларусаў, як яны да яе ставяцца.

Соф'і Сапезе вынеслі прысуд у Гродне

Прысуд палітвязні Соф'і Сапезе, затрыманай разам з Раманам Пратасевічам, вынеслі ў Гродзенскім абласным судзе 6 траўня. Ёй прысудзілі шэсць гадоў пазбаўлення волі з адбываннем пакарання ў калоніі агульнага рэжыму. Справу Соф'і разглядалі паўтара месяца.

Да абскарджання прысуду Сафія Сапега будзе знаходзіцца ў СІЗА турмы № 1 Гродна, распавёў яе айчым Сяргей Дудзіч блогу «Отражение». У бліжэйшыя тры дні родныя сустрэнуцца з Сафіяй у СІЗА. Ім дадуць кароткатэрміновае спатканне, і блізкія змогуць перадаць дзяўчыне патрэбныя рэчы.

Вясёлыя вавёрачкі, сінія стужачкі і вайна, якая не развітваецца з намі. Як вядуць Instagram дзіцячыя садкі Гродна

На старонках дзіцячых садоў - усё як у жыцці. Вершы пра шчаслівае дзяцінства, узнагароды педагогаў і фотачкі групаў у святы і будні. Там адзначаюць усе святы і асвятляюць усе акцыі: ад 8 сакавіка і Новага года да Вялікадня і Дня аховы працы. Hrodna. life паглядзеў, ці ёсць на гэтых старонках карысная інфармацыя для бацькоў дашкольнікаў. Спойлер — вельмі мала. Але паглядзець цікава.

Лукашэнка распавёў аб сваёй ролі ў вайне ў Украіне і аб магчымасці ядзернага ўдару

На думку Аляксандра Лукашэнкі, перамовы Расіі і Украіны пачаліся толькі дзякуючы яму, а прымяненне ядзернай зброі ва Украіне недапушчальна таму, што гэта вельмі блізка да Беларусі і «можа збіць наш зямны шар, і ён паляціць з арбіты невядома куды». Таксама ён не чакаў, што 10-тыднёвы канфлікт «зацягнецца такім чынам», але Расія «па вызначэнні не можа прайграць гэтую вайну». Hrodna. life абраў цытаты Аляксандра Лукашэнкі з яго інтэрв'ю міжнароднаму інфармацыйнаму агенцтву Associated Press 5 траўня. Вайну ва Украіне Лукашэнка называў менавіта словам «вайна». У Расіі гэта забаронена.

Генпракурор і начальнік КДБ адкрылі ў Новым замку ў Гродне выставу пра генацыд

У Гродзенскім дзяржаўным гісторыка-археалагічным музеі 5 траўня адкрылася экспазіцыя на тэму «Генацыду беларускага народа ў перыяд Вялікай Айчыннай вайны». У адкрыцці ўдзельнічалі старшыня Гродзенскага аблвыканкама Уладзімір Каранік, памочнік прэзідэнта — інспектар па Гродзенскай вобласці Юрый Караеў, генеральны пракурор Беларусі Андрэй Швед, пракурор Гродзенскай вобласці Аляксандр Жукаў і начальнік упраўлення КДБ па Гродзенскай вобласці Аляксандр Невяроўскі.

Памёр першы кіраўнік незалежнай Беларусі Станіслаў Шушкевіч

У ноч з 3 на 4 траўня ў Мінску памёр Станіслаў Шушкевіч. Яму было 87 гадоў. Пра гэта паведаміла «Е…дыё» са спасылкай на жонку палітыка. Шушкевіч — першы кіраўнік незалежнай Беларусі пасля распаду Савецкага саюза.

Дзве акторкі з Гродна паставілі ў Польшчы казку для беларускіх і ўкраінскіх дзяцей

Звольненыя з Гродзенскага драматычнага тэатра акторкі Ірына Купчанка і Лізавета Мілінцэвіч арганізавалі пастаноўку для дзяцей беларускіх і ўкраінскіх уцекачоў у Сопаце. Прэм’ера казкі «Шкодная гісторыя» прайшла 1 траўня ў памяшканні Аб’яднання беларусаў Памор’я, паведамляе Telegram-канал «Тётя Ира Разрешила». Спектакль паказалі два разы цягам траўня ў зале на 50 месцаў. Білеты на другі паказ разабралі за тры дні. Акторкі плануюць і надалей рабіць пастаноўкі ў межах праекта «Тэатр без назвы».

У Гродне праз суд ліквідуюць яшчэ дзве грамадскія арганізацыі - спартыўную і экалагічную

Яшчэ дзве грамадскія арганізацыі ў Гродне збіраюцца ліквідаваць праз суд: Гродзенскі абласны спартыўны клуб па вольнай барацьбе «Мядзведзь» і сацыяльна-інфармацыйнае грамадскае аб’яднанне «Устойлівае развіццё вёскі».

У Гродне ГУБАЗ затрымаў шаурміста — проста на працоўным месцы

Актывіста Аляксандра Лаўрэнцьева затрымалі проста на працоўным месцы — у фудтраку з шаурмой побач з ГЦ «Парус» у раёне Альшанка. Пра затрыманне стала вядома 2 траўня. Затрымліваў актывіста ГУБАЗ Гродзенскай вобласці. Пост пра гэта з’явіўся ў створаным замест выдаленага шосты раз Telegram-канала «ГУБОП». Там напісалі, што Алексадра будуць судзіць па двух артыкулах КК: 368 «Абраза прэзідэнта Рэспублікі Беларусь» і 369 «Абраза прадстаўніка ўлады».

«Антыдзяржаўныя выказванні». У Гродне пасля звароту актывісткі закрылі выставу беларускай скульптуры

Адзін дзень у Гродне праіснавала выстава «СКУЛЬПТУРА». З 30 красавіка на ўваходзе ў галерэю напісана, што яна не працуе па тэхнічных прычынах. Раней з просьбай закрыць выставу да ўладаў звярнулася актывістка Вольга Бондарава. На яе думку, некаторыя мастакі, якія ўдзельнічаюць у ёй, вядомыя антыдзяржаўнымі выказваннямі. Аб закрыцці адмовіліся казаць ўсе бакі: і мастак, і гарвыканкам, і прадстаўнікі галерэі.

Міністэрства аховы здароўя прыпыніла ліцэнзію «Ладэ». Медцэнтр: працягнем працу ў штатным рэжыме

Міністэрства аховы здароўя прыпыніла з 16 траўня дзеянне ліцэнзій на меддзейнасць ТАА «Клініка А1» і ТАА «Ладэ». Да «Ладэ» прэтэнзіі ўзніклі у тым ліку пасля праверкі гродзенскага філіяла. У самым медцэнтры кажуць, што ім не прыходзіла інфармацыя аб прыпыненні ліцэнзіі, і гатовыя запісаць на любую дату.

Медцэнтры змогуць працягнуць працу, калі выправяць недахопы цягам шасці месяцаў, расказалі ў Мінздароўя. Для гэтага кампаніі мусяць звярнуцца з інфармацыяй аб ліквідацыі парушэнняў.

«Пагражалі адлічэннем». Як бюджэтнікам у Гродне прапануюць пайсці ў горад на травеньскія святы

Школьнікаў просяць схадзіць у горад, студэнтам за ненаведванне свята пагражаюць адлічэннем, работнікам дзяржпрадпрыемстваў даюць выхадны. Рэдакцыя Hrodna. life спытала ў сацсетках, ці прымушаюць бюджэтнікаў ісці на масавыя мерапрыемствы, прысвечаныя Дню Перамогі - вось якія адказы мы атрымалі.