XIII Рэспубліканскі фестываль нацыянальных культур у Гродне, які пачнецца 3 чэрвеня 2022 года, будзе трохдзённым. Трэці дзень фестывалю адбудзецца на Аўгустоўскім канале. Пра гэта перад працоўнай нарадай паведаміла кіраўнічка ўпраўлення культуры Гродзенскага аблвыканкама Алена Клімовіч.
«Мы паўтараем досвед 2018 года: у нас будзе трэці дзень фестывалю. Ён пройдзе на Аўгустоўскім канале. Яго рыхтуюць Гродзенскі райвыканкам сумесна з упраўленнем культуры аблвыканкама. Гэты вопыт вельмі добра сябе зарэкамендаваў. На канале будуць арганізаваны канцэртныя пляцоўкі, інтэрактыўныя», — сказала Алена Клімовіч БелТА.
На Аўгустоўскім канале чыноўнікі плануюць арганізаваць пляцоўку ад БРСМ. «Яна была заўсёды, але ў гэты раз ёй будзе нададзена большая ўвага», — сказала Клімовіч. Таксама арганізатары задумалі спартовую пляцоўку і прадстаўленне сілавога экстрыму. Як гэта будзе выглядаць, Клімовіч не паведаміла.
У ХІІІ Рэспубліканскім фестывалі нацыянальных культур у Гродне возьмуць удзел прадстаўнікі 31 нацыянальнасці. Гэта на пяць менш, чым было на папярэднім фестывалі. Яны размесцяцца на 17 падвор’ях. Малалікія дыяспары аб’яднаюць.
Упершыню ў фестывалі прыме ўдзел дыяспара Манголіі. У сувязі з гэтым на алеі Сяброўства ў Каложскім парку пасадзяць новае дрэва.
Беларускі падворак размесцяць на плошчы Леніна. Там прадставяць усе рэгіёны Беларусі.
У першы дзень фестывалю, 3 чэрвеня, арганізатары плануюць адкрыць Дом рыбака на вуліцы Замкавай. У другі дзень на вуліцы Тэльмана, у скверы каля культурнага цэнтра «Фестывальны» і абласнога КДБ адкрыюць тэматычную скульптуру. Яна прысвечана фестывалю.
У рамках фестывалю будуць працаваць выставы, адбудуцца канцэрты і майстар-класы. Дзяўчаты з прадстаўленых у Беларусі нацыянальных аб’яднанняў пакажуць нацыянальныя строі.
Акрамя гэтага, арганізатары запланавалі круглы стол «Беларусь — наш агульны дом: адзінства нацый і пакаленняў». Ён адбудзецца ў галерэі імя Тызенгаўза [маецца на ўвазе не даўно існуючая прыватная «Галерэя Тызенгаўза», а новая прастора ў адноўленым будынку былога архіва — Hrodna.life]. Там павінны сабрацца кіраўнікі 21 нацыянальнага аб’яднання і іншыя зацікаўленыя, хто менавіта БелТА не ўдакладніла.
Падчас круглага стала, арганізатары правядуць прэзентацыю кнігі «Сёстры Хатыні». У ёй сабралі звесткі аб 309 населеных пунктах Гродзенскай вобласці, якія пацярпелі падчас Вялікай Айчыннай Вайны.
Падчас фестывалю плануюць паказаць дзве выставы. У экспазіцыі «Беларусь наш агульны дом: адзінства нацый і пакаленняў» прадставяць фота і асабістыя рэчы «вядомых дзеячоў, якія ўнеслі ўклад у развіццё краіны ў пасляваенны перыяд». Маюцца на ўвазе палітычныя дзеячы, вайсковыя начальнікі, дзеячы культуры, адукацыі, навукі, спорта.
Фестываль нацыянальных культур традыцыйна праводзіцца ў Гродне раз на два гады з 1996 года. У фестывалі ў 2018 годзе ў Гродне ўдзельнічалі прадстаўнікі 36 нацыянальнасцяў. У той жа год адкрылі культурны цэнтр «Фестывальны» на Тэльмана. Чарговы фестываль павінен быў адбыцца ў 2020 годзе ў 13-ы раз. Яго вырашылі перанесці на год праз каранавірус. У 2021 у Гродне яго зноў вырашылі не праводзіць. Праўда, у верасні 2021 яго адкрыццё правялі на Дзень горада ў Мінску з удзелам 25 нацыянальнасцяў. Летась фестывалю споўнілася 25 гадоў.
Чытайце таксама:
Шматгадзінныя чэргі, перфаратар і два акенца на рэгістрацыю. Дзяўчына схадзіла ў Гродзенскае агенцтва па дзяржаўнай…
Прадпрыемства "Гродна Азот" 12 лютага ў Telegram-канале анансавала конкурс да Дня роднай мовы. Да самога…
Палітзняволены з Гродна Кірыл Кетурка скончыў жыццё самагубствам у Цэнтры ўтрымання пад вартай у Варшаве-Служэўцы…
Былому сенатару і дырэктару «Краснасельскбудматэрыялы» Уладзіміру Кісялёву пагражае да трох гадоў калоніі за разгалашэнне службовай…
"Малочны Мір" абавязалі змяніць назву для серыі глазураваных сыркоў. Пасля чыёсьці скаргі ў Міністэрства антыманапольнага…
На Гагарына, 25 у Гродне прадаецца двухпакаёвая кватэра з выдатна захаваным постсавецкім інтэр'ерам. Дом, у…