Памілаванне асуджанай, звароты супраць вайны, затрыманні ў судзе. Як прайшоў тыдзень у Гродне і вобласці

Сяргея Нялепка затрымаў ГУБАЗ Гродзенскай вобласці за рэгістрацыю ў плане «Перамога». 20-гадовую Насту Ярашэвіч з Ліды памілаваў Аляксандр Лукашэнка. Калектыўныя звароты супраць вайны ў Украіне з’явіліся на сайтах «Молочного мира» і дзіцячых садоў Гродна. Рэдакцыя Hrodna.life вывучыла, што адбылося ў вобласці з 7 па 13 сакавіка.

Палітвязня Арцёма Баярскага этапавалі ў шклоўскую калонію

У Мінгарсудзе 9 снежня 2021 года Арцёму Баярскаму прысудзілі пяць гадоў калоніі ва ўмовах ўзмоцненага рэжыму. Сам суд праходзіў у закрытым рэжыме. Вядома толькі, што Арцёма абвінавачвалі ў адміністраванні Telegram-канала «Мая краіна Беларусь» і Telegram-чата «Я выхожу/МКБ», а таксама ва ўдзеле ў маршы «Народнага ультыматуму» 25 кастрычніка 2020 года, паведамляе «Вясна».

Днямі палітвязня перавялі з магілёўскай турмы ў папраўчую калонію ў Шклове.

Затрыманні ў Гродзенскай вобласці

• 32-гадовага Нялепка Сяргея Алегавіча затрымаў ГУБАЗ Гродзенскай вобласці. На камеру ён сказаў, што яго затрымалі за рэгістрацыю ў плане «Перамога» і ўдзел у «дэструктыўных» чатах. У іх ён заклікаў да гвалту над праваахоўнікамі. Паводле інфармацыі сілавікоў, мужчыну прыцягнуць да адказнасці паводле артыкулаў 130, 361−1, 366 і 367 КК.

• Сярод затрыманых за пікеты пасля рэферэндуму — Сяргей Чарнецкі з Ліды, паведамляе «Вясна». Што з ім было пасля затрымання, не паведамляецца.

• У судзе Ленінскага раёна на тыдні прайшлі пасяджэнні па арт. 24.23 і 24.3 КаАП. Напэўна, судзілі затрыманых у дзень рэферэндума. Тады ў Гродне затрымалі і даставілі ў ізалятар на Кірава, 1 каля 50 чалавек.

Звароты супраць вайны

Калектыўныя звароты супраць вайны ва Украіне з’явіліся на сайтах «Молочного мира» і дзіцячых садоў Гродна. Іх ужо выдалілі.

20-гадовую Насту Ярашэвіч з Ліды памілаваў Аляксандр Лукашэнка

Анастасія — асуджаная да двух гадоў калоніі за «гвалт у дачыненні да супрацоўніка міліцыі» (арт. 364 КК). Яна адбывала пакаранне ў гомельскай калоніі. Паводле абвінавачвання, дзяўчына хацела перашкодзіць міліцыянтам затрымаць невядомага мужчыну: Анастасія сарвала пагоны ў двух міліцыянтаў, а аднаму яшчэ і нанесла ўдар у галаву, паведамляе «Вясна».

8 сакавіка памілавалі яшчэ мінімум трох жанчын з гомельскай калоніі. У Telegram-канале «Пул первого» гэта назвалі «актам гуманізму».

Санкцыі, абмежаванні і адмены

Замежныя кампаніі масава сыходзяць з рынкаў Беларусі і Расіі або прыпыняюць працу. Hrodna.life збірае інфармацыю аб усіх таварах і паслугах, якіх пазбаўляюцца беларусы з-за вайны ва Украіне. Матэрыял абнаўляецца штодня. Акрамя таго, аўстрыйская кампанія Telekom Austria, якая валодае мабільным аператарам А1, разважае пра сыход з беларускага рынку. А ў Беларусі прапанавалі заблакаваць Facebook.

Віна выжыўшага і калектыўная адказнасць

Беларусы ў вайне Расіі з Украінай апынуліся назіральнікамі і сутыкнуліся з цкаваннем з боку ўкраінцаў, еўрапейцаў і сваіх жа суайчыннікаў. Яны выказваліся супраць вайны ў сацсетках і папракалі іншых за занадта жыццярадасныя пасты. Многія адчулі страх, бездапаможнасць і жах. Сацыёлаг, дырэктар Школы маладых мэнэджэраў публічнага адміністравання SYMPA Наталля Рабава і псіхолаг Таццяна Петушок з Гродна па просьбе Hrodna.life паразважалі пра пачуццё віны і сораму ў беларусаў і распавялі, што з імі рабіць.

Судзяць мастака Алеся Пушкіна. Затрыманым у першы дзень суда наведнікам даюць суткі

Дваім з затрыманых 10 сакавіка на судзе над Пушкіным прысудзілі па 15 сутак адміністрацыйнага арышту. Аднаго з іх абвінавацілі ў пікетаванні вокладкай пашпарта з Пагоняй. Агулам 10 сакавіка затрымалі трох чалавек.

Беларускія добраахвотнікі збіраюцца абараняць Украіну ад расійскіх акупантаў

Вайна Расіі супраць Украіны станам на 14 сакавіка доўжыцца 19 дзён. На дапамогу ўкраінскім вайскоўцам ужо запісаліся каля 22 тысячы чалавек з 52 краін. Сярод іх ёсць і беларускія добраахвотнікі. Яны расказалі журналісту Руслану Кулевічу, чаму вырашылі адправіцца на дапамогу ўкраінскаму войску. Hrodna.life паглядзеў відэа і выбраў самае цікавае.

Ліквідавалі «Таварыства польскай культуры на Лідчыне»

Грамадскае аб’яднанне «Таварыства польскай культуры на Лідчыне» знаходзіцца ў працэсе ліквідацыі з 1 сакавіка 2022 паводле рашэння Гродзенскага абласнога суда. Інфармацыю пра гэта размясцілі на сайце Адзінага дзяржаўнага рэестра. Арганізацыя займалася захаваннем гістарычнай памяці ў рэгіёне. Яе члены ўсталёўвалі мемарыяльныя дошкі ў памяць аб удзельніках паўстання 1863 года і даглядалі магілы польскіх салдат розных часоў.