Увечары 9 верасня ў Белаазёрску ў саракапяцігадовым узросце памёр Генэк Лоска — польскі вакаліст і гітарыст беларускага паходжання, зорка першага польскага тэлешоў X Factor. Да гэтага ён 2,5 гады ляжаў паралізаваным, але ў прытомнасці.
Ён спяваў з дзяцінства, хадзіў у музычную школу і граў на гітары. Паступіў у Гродзенскае культасветвучылішча, дзе разам з сябрамі стварыў блюзавы гурт Seven B. У 1992 годзе каманда паехала на «Басовішча» і засталася ў Польшчы — граць на вуліцах і такім чынам зарабляць грошы, піша «Еўрарадыё». Хлопцы атрымалі польскае грамадзянства. Трыа Seven B перарасло ў моцны хард-блюзавы квінтэт, які актыўна гастраляваў па Польшчы і выпускаў альбомы.
«Яны не згубіліся на рынку польскага рок-блюза, які насычаны куды больш, чым у Беларусі, а таму прабіцца на ім у людзі куды больш складана. Тым не менш у Seven В гэта атрымалася зрабіць», — пісаў Зміцер Падбярэзскі ў часопісе «JazzКвадрат», рэцэнзуючы другі альбом каманды.
Удзел у першым сезоне польскага тэлешоў X Factor у 2011 годзе прынёс Генэку сапраўдную славу. Але музыка падкрэсліваў, што не лічыць сябе знакамітасцю і ніколі не будзе зоркай: «Я пануры, як шавец. І сацыяпат. Беларус у Польшчы і сацыяпат — выдатнае злучэнне».
Музычны аглядальнік штотыднёвіка Polityka Куба Ваяводскі пісаў пра Лоску:«Генэк — плявок у твар польскай канцэпцыі слова „зорка“. І дзякуй яму за гэта».
Сапраўднай жарсцю Лоскі заставаліся спевы на вуліцы — «менавіта там ёсць праўда жыцця», меркаваў Лоска і выходзіў пасля здымак на тэлебачанні ў цэнтр Варшавы граць і спяваць для людзей.
Генадзя Лоску знайшлі ў непрытомным стане 5 траўня 2018 года ў цэнтры Белаазёрска — ён прыехаў да мамы, каб зрабіць від на жыхарства ў Беларусі. У музыкі дыягнаставалі левабаковы інсульт і закрытую чэрапна-мазгавую траўму. Цягам 2,5 гадоў Генэк ляжаў паралізаваным у бацькоўскай кватэры, пры гэтым знаходзячыся ў прытомнасці.
Чытайце таксама: «Усім беларускім дактарам хачу дзякуй сказаць». У Белаазерску ляжыць у коме музыка Генік Лоска, які калісьці перамог на польскім «X-фактары»
У лютым 2020 года разам са спецыялістамі па альтэрнатыўнай камунікацыі Еўрарадыё наведала Генадзя — паглядзець, чым можна музыку дапамагчы. Аднак з-за каранавірусу заняткі спецыялістам з музыкам не былі магчымымі. Мы выказваем спачуванні родным і блізкім Генадзя.
