Каля 150 прадстаўнікоў розных канфесій сабраліся ў цэнтры Гродна 16 жніўня. Яны прайшліся ад Фарнага касцёла праз сквер, дзе стаяла Фара Вітаўта, да Вялікай харальнай сінагогі. Святары і вернікі маліліся аб міры ў краіне, аб вызваленні ўсіх зняволеных і спявалі рэлігійныя песні.

«Мы гэтым займаемся з 2011 года. Апошні час вельмі часта збіраюцца розныя хрысціянскія канфесіі і прадстаўнікі яўрэйскай абшчыны Гродна. Учора ў гэты складаны момант адначасова шматлікім пастарам, святарам прыйшло разуменне, што мы павінны паказаць грамадству прыклад адзінства. Мы хочам звярнуцца да нябёсаў і да нашай улады з заклікам скончыць мірна ўсё няправільныя, злыя рэчы і вызваліць бязвінна асуджаных», — распавёў Hrodna.life арганізатар шэсця, прадстаўнік Асацыяцыі юдэя-хрысціянскага дыялогу «Shomer International» у Беларусі Яўген Калодзін.

Святары і вернікі збіраюцца каля Фарнага касцёла
Марш з удзелам католікаў, праваслаўных, пратэстантаў і іўдзеяў пачаўся ад Фарнага касцёла
Святары розных канфесій ішлі па вуліцы Замкавай
Адзін з прыпынкаў на шляху маршу — сквер на месцы Фары Вітаўта
Шэсце скончылася ля сінагогі

«Мы, прадстаўнікі царквы, заўсёды выступаем за мір. Мы вырашылі, што самае галоўнае — маліцца, каб быў мір у нашай краіне», — кажа прадстаўніца Свята-Пакроўскага кафедральнага сабора панамар Аляксандр Сегень.

У скверы на месцы Фары Вітаўта выступіў праваслаўны святар з Уладзімірскай царквы Андрэй Яварэц:

“Мы становімся на той жа шлях, калі будзем плаціць такой жа манетай. Павінна ісці размова пра адказнасць, а не пра помсту. Учора бачыў інтэрв'ю ўсімі намі любімага журналіста Руслана Кулевіча, якому зламалі дзве рукі. Ён там сказаў: “Хутчэй бы мне паправіцца, выйсці на працу і зноў працаваць на гэты горад. Але калі трэба для справы дараваць, я ні на каго не трымаю зла". Я думаю, гэта тая самая пазіцыя, якой нам усім трэба прытрымлівацца".

Святар прывёў у прыклад жанчын, чые мірныя акцыі, па яго думку, спрацавалі.

Пасля яго слоў усе святары разам з людзьмі праспявалі гімн "Магутны Божа".

Прэс-сакратар Гродзенскай курыі ксёндз Юрый Марціновіч распавёў, што католікі, праваслаўныя, лютэране і яўрэі перш за ўсё моляцца аб міры, згодзе і адзінстве. «А калі будзе згода і адзінства ў нашым асяроддзі, то тады і ўсё астатняе будзе, будзе і праца, і хлеб на стале, і іншыя рэчы».

У турме ў Гродне знаходзіцца каталіцкі святар. Яго затрымалі яшчэ да выбараў і, па інфармацыі Hrodna.life, справа не тычылася палітыкі.

Самы малады журналіст Hrodna.life. Скончыла школу сучаснай журналістыкі ў Гродне. Па адукацыі - эканаміст, але зразумела, што хоча займацца журналістыкай. Спецыялізуецца на тэкстах пра архітэктуру, падарожжы, пра людзей і для людзей.