18 чэрвеня на сцяне дома № 45 па вуліцы Ажэшкі адкрылі шыльду, прысвечаную заслужанаму лекару БССР Генадзю Обухаву. У гэтым доме ён жыў з 1962 па 2010 гады.

Шыльду адкрылі напярэдадні дня медыцынскага работніка, у дзень нараджэння Генадзя Обухава — у 2020 годзе яму споўнілася б 96 гадоў. На цырымоніі прысутнічалі прадстаўнікі Гродзенскага гарвыканкама, былыя калегі і сябры заслужанага медыка.

Генадзь Обухаў (1924−2010) быў у час Вялікай Айчыннай вайны радыстам. У пасляваенныя гады арганізоўваў псіхіятрычную службу Гродзенскай вобласці. Атрымаў званні прафесара і заслужанага ўрача БССР. Апублікаваў больш за 120 навуковых прац, пад яго кіраўніцтвам абаронены 4 кандыдацкія дысертацыі.

Шыльду стварыў гродзенскі скульптар Уладзімір Панцялееў. На тым жа доме ўжо вісіць іншая яго праца — шыльда прысвечаная пісьменніку Аляксею Карпюку. Наступнай там павінна з’явіцца памятная шыльда краязнаўцу Віктару Саяпіну, распавёў Панцялееў.

Рэпарцёр, фатограф, краязнаўца. Самы хуткі журналіст Гродна на ровары. Руслана і яго ровар ведаюць многія гараджане: ад чыноўнікаў да бамжоў. Падчас службы ў войску быў разведчыкам, а цяпер даказвае, што выведнік былым не бывае. Працуе ў Hrodna.life з 2013 года, калі сайт яшчэ працаваў пад брэндам «Твой стыль». У канцы 2018 выдаў кнігу «Горад адзін, успаміны розныя», дзе сабраў успаміны гродзенцаў пра 1930−40-я гады.