У раённай бальніцы Мар'інай Горкі пачалі рабіць платны экспрэс-тэст на антыцелы да каранавіруса. Вынікаў давядзецца чакаць 10−15 хвілін, піша n*.by. Праўда, праз нейкі час магчымасць тэставання там знікла.
Інфармацыя аб тэстах на сайце Мар'інагорскай ЦРБ з’явілася 7 мая.
«Аплачваеце ў касе і з гэтым чэкам прыходзіце да нас у працэдурны кабінет. Накіраванне ад доктара для здачы тэсту не патрэбна», — расказалі ў бальніцы.
Цана — 40 рублёў (для медработнікаў — 36 рублёў).
Такі тэст мусіць паказаць, ці перахварэлі вы ўжо на каранавірус. Праўда, не ва ўсіх, хто перанёс хваробу на нагах, арганізм выпрацоўвае антыцелы.
Праз нейкі час на сайце бальніцы ў раздзеле «Платныя паслугі» з’явілася абнаўленне, згодна з якім з тэстамі пакуль давядзецца пачакаць.
«У сувязі з затрымкай у атрыманні дазвольных дакументаў на правядзенне имунохромотографического тэсту на наяўнасць антыцелаў да інфекцыі COVID-19 дадзеная працэдура часова выключаная з пераліку платных паслуг» — тлумачыць абвестка.
Пра дату правядзення працэдуры адміністрацыя Мар'інагорскай ЦРБ абяцае паведаміць дадаткова і просіць прабачэння.
Пра тое, што Беларусь атрымала пробную партыю тэстаў на вызначэнне антыцелаў да COVID-19, міністр аховы здароўя Уладзімір Каранік паведаміў 17 красавіка.
«На сённяшні момант мы ведаем кошт тэсту. Улічваючы выдатковасць арганізацыі тэставання, кошт тэсту — парадку 4,2 долара», — удакладніў кіраўнік Мінздароўя 8 траўня у эфіры «БТ».
