Мастак Уладзімір Качан звярнуўся да прадстаўнікоў хрысціянскіх канфесій Гродзеншчыны з прапановай паставіць ля драмтэатра крыж-абярэг, які дапаможа абараніць гродзенцаў у барацьбе з пандэміяй каранавіруса і будучымі захворваннямі.
Уладзімір Качан упэўнены, што прыйшоў час для такога помніка ў Гродне. Мастак прапануе яго паставіць недалёка ад драмтэатра, дзе раней стаяў храм, які ў розны час быў каталіцкім манастыром бэрнардынак і праваслаўным Свята-Барысаглебскім манастыром.
«Раней падчас чумы нашы продкі ставілі такія крыжы-абярэгі, – распавядае Уладзімір Качан. – Яны верылі, што абаронай іх дамоў ад усякай нечысці і эпідэмій з’яўляўся ўсталяваны і асвечаны на бачным месцы крыж-абярэг. Мы перажываем цяпер падобную сітуацыю і пік эпідэміі няўхільна набліжаецца да парога нашых дамоў, да нашых сем’яў”.
Мастак кажа, што праект прайшоў усе неабходныя ўзгадненні для ўстаноўкі ў гістарычным цэнтры горада. На крыжы ён прапануе размясціць малітву “Ойча наш” на стараславянскай мове і на латыні.
“Гэта самая моцная абарона і магутны сімвал, які аб’ядноўвае”, – кажа Качан.
Па словах Уладзіміра Качана, папярэдняя адміністрацыя горада праводзіла конкурс і яго праект крыжа даўно павінен быў быць рэалізаваны. Але да гэтага часу праблема ў фінансаванні. Новая адміністрацыя, па словах Качана, не выконвае абавязацельстваў папярэдняй.
“У ідэале, тут лепш не бюджэтныя грошы выкарыстоўваць, а сродкі іншых інвестараў”, – кажа мастак.
Чытайце таксама: Художник гродненских героев и легенд Владимир Качан отметил 60-летие юбилейной выставкой
