Якім будзе святы Губерт? У Гродне паказалі мяккую мадэль новай гарадской скульптуры

У Гродне паказалі, як будзе выглядаць новая гарадская скульптура на Савецкай — святы Губерт. Аўтар, Уладзімір Панцялееў, прадставіў Гродзенскай абласной мастацка-экспертнай радзе мяккую мадэль скульптуры. Яе плануюць паставіць каля будынку Гродзенскага абласнога аб’яднання прафсаюзаў на месцы помніка турысту, які быў тут раней.

Як распавёў скульптар Уладзімір Панцялееў тэлеканалу «Гродно Плюс», ідэя з’явілася ўжо даўно, а зараз прадставіўся выпадак рэалізаваць яе ў рамках падрыхтоўкі да Фестывалю нацыянальных культур.

Марына Загідуліна, старшыня Гродзенскага абласнога мастацка-экспертнага савета па манументальным мастацтве, распавяла, што калі ў савета будзе шмат заўваг да працы, яе будуць разглядаць да таго моманту, калі савет палічыць, што гэта ўсё гарманічна, а скульптура добра ўпісваецца ў навакольнае асяроддзе. Пакуль радыкальных заўваг не было.

Мяркуюць, што скульптура зойме сваё месца да пачатку лета. Помнік будзе каля трох з паловай метраў, яго вырабяць з граніту і бронзы.