Шасцігадовы Міхаэль Якімчык сустрэўся з мамай Людмілай ранкам 10 студзеня. Напярэдадні яго знайшлі ў расійскай Анапе.
Як расказаў каардынатар пошукавага атраду «ЦэнтрСпас» Яўген Тышчанка, Міша адчувае сябе добра. Ён адразу пазнаў маці пры сустрэчы, піша «Радыё С**бода». Апошнім часам моцна сумаваў па ёй. Відэа з сустрэчай маці і дзіцяці з’явілася ў facebook Таццяны Мартынавай, якая дапамагала Людміле Якімчык з пошукамі.
Ягонага бацьку Вітальда разам з хлопчыкам, дзякуючы інфармацыі на арыентыроўках аб пошуку, пазналі мясцовыя жыхары. Яны перадалі інфармацыю ў расейскі пошукавы атрад «Надежда».
5 студзеня расейская паліцыя затрымала Вітальда і ўзяла пад варту за гвалт над былой жонкай. У Беларусі мужчына неаднаразова біў і абражаў Людмілу. Яна напісала заяву ў міліцыю. У гэтай справе ўжо праходзілі перадсудовыя сустрэчы. Менавіта ў гэты перыяд Вітальд знік разам з Мішам.
Бацьку экстрадуюць у Беларусь, дзе яго будуць судзіць за гвалт над былой жонкай.
Міша з 5 студзеня знаходзіўся ў дзіцячым прытулку. Яго ўжо перадалі маці. Увечары 10 студзеня мама і сын плануюць выехаць у Беларусь.
Чытайце таксама: «Ён мяне біў галавой аб сцяну». Мужчына здзекаваўся з жонкі, а потым знік з малым сынам
Бацька Вітальд Якімчык забраў малога Мішу з дзіцячага садку 28 кастрычніка каля 11.00. Яны ў разводзе з жонкай, але ў той дзень дамаўляліся забраць Мішу разам пазней і пагуляць з малым. Чаму Вітальд вырашыў інакш, невядома. З таго часу маці ня бачыла сына і ня ведала, дзе ён і ў якім стане. Хлопчыка з татам шукалі беларускія і расейскія праваахоўнікі і пошукавыя атрады.
Пакуль Міхаэль знаходзіўся з бацькам, ён паспеў адсвяткаваць дзень нараджэння — 29 снежня хлопчыку споўнілася 6 гадоў. Дзіця прызналася, што вельмі сумуе па маме і хоча як мага хутчэй яе ўбачыць.