Міжнародны фестываль дакументальнага кіно аб правах чалавека WATCH DOCS Belarus запрашае жыхароў Гродна на прагляд лепшай дакументалістыкі, а таксама на дыскусіі і сустрэчы з цікавымі гасцямі. На 4 дні, ад 28 лістапада да 1 снежня, ў нас ёсць годны план: будзем глядзець адборныя кінастужкі рэжысёраў з усяго свету і абмяркоўваць праблемы з экспертамі. Таксама нас чакае сустрэча з беларускім рэжысёрам-дакументалістам Андрэем Куцілам.

Кранальныя, натхняльныя, правакацыйныя і захапляльныя — усе фільмы пакідаюць моцныя эмоцыі і прапануюць няпростыя развагі пра тое, што чалавек робіць з чалавекам.

Праз рэальныя чалавечыя гісторыі, адкрытыя факты, шчырасць, мы падымаем тэму свабоды і яе межаў, правоў і чалавечай годнасці. У нас няма кепскіх і добрых персанажаў, правільных адказаў і абавязковага хэпі энду. Мы шукаем межы сваёй (не) свабоды і гатовыя сказаць «What the f !!!» усяму, што яе абмяжоўвае!

Разам з рэжысёрамі-дакументалістамі усяго свету прапануем адарвацца ад серыяльнай жуйкі і паспрачацца аб свабодзе, задумацца пра тое, што і чаму нас абурае.

Сустракайце фільмы, сюжэт якіх па напале і неверагоднасці нашмат пераўзыходзіць баевікі і трылеры. Бо гаворка пра рэальных людзей і падзеі!

У Гродне пройдзе фестываль дакументальнага кіно WATCH DOCS

Праграма фестывалю

(Месца: Цэнтр гарадскога жыцця Гродна, вул. Кірава, 3)

28 ЛІСТАПАДА, чацвер

Пачатак: 18:30

Фільм «Сустрэча выпускнікоў» (Швецыя) рэж. Ганна Одэлл

Госця: мінскі псіхолаг Наталля Масюкевіч.

Першым фільмам нашага кінамарафона стане праца скандальнай шведскай актрысы і рэжысёра Ганны Одэл «Сустрэча выпускнікоў».

«Сустрэча выпускнікоў» — выбітная праца аб праблеме булінга ў школьным асяроддзі. Пасля таго, як аднакласнікі Ганны не запрасілі яе на вечар сустрэчы выпускнікоў, мастачка зняла фільм пра тое, наколькі эксцэнтрычнай гэтая сустрэча магла б стаць, калі б Одэл ўсё ж яе наведала і зрабіла б усё, чаго яе аднакласнікі імкнуліся пазбегнуць. Другая, дакументальная частка фільма ставіць пытанні пра чалавечую гатоўнасць глядзець у вочы праўдзе, памяці аб зробленым у далёкім мінулым гвалце і этыцы самастойнага псіхалагічнага росту — выхаду са стану ахвяры.

Пасля прагляду фільма разам з мінскім псіхолагам Наталляй Масюкевіч абмяркуем праблему булінга.

29 ЛІСТАПАДА, пятніца

Пачатак: 18:30

Фільм «Працэс. Расійская Федэрацыя супраць Алега Сянцова»

(Польшча, Чэхія), рэж. Аскольд Куро

Госці:

Андрэй Казакевіч. Палітолаг, доктар палітычных навук (PhD in Political Science), дырэктар Інстытута палітычных даследаванняў «Палітычная сфера» (Мінск, Беларусь).

Уладзімір Мацкевіч. Філосаф і метадолаг, кіраўнік Агенцтва гуманітарных тэхналогій, заснавальнік Лятучага ўніверсітэта.

У гэты дзень паглядзім дакументальны фільм, які стаў падтрымкай украінскага кінарэжысёра з боку міжнароднай супольнасці яго калег па цэху. Стужка распавядае пра абставіны справы Алега Сянцова, які быў затрыманы ў 2014 годзе расійскімі спецслужбамі ў Крыме і незаконна прысуджаны да 20 гадоў зняволення ў Расіі.

Пасля прагляду фільма прапануем гарадзенцам паразмаўляць пра адносіны Беларусі і Расіі, пагрозах — рэальных і надуманых — адносна «паглыбленай інтэграцыі» нашых краін з двума прафесійнымі экспертамі: палітолагам Андрэем Казакевічам і мэтадолягам Уладзімірам Мацкевічам.

30 ЛІСТАПАДА, субота

Пачатак: 17:00

Фільм «Стрыптыз і вайна» (Беларусь), рэж. Андрэй Куціла

Госць: аўтар фільма, рэжысёр-дакументаліст Андрэй Куціла.

У ваенным гарадку пад Мінскам жывуць дзед і ўнук. Падпалкоўнік авіяцыі ў адстаўцы, дзед узнагароджаны медалямі, жыве актыўна, удзельнічае ў грамадскім жыцці. Свята верыць у ідэалы савецкага мінулага, сумленна распавядае пра гэта моладзі. Унук пакінуў прафесію інжынера. Офісная праца не прыносіла яму ні зарплаты, ні задавальнення. Сёння ён спрабуе рэалізаваць мару — стварыць тэатр эратычнага танца. Дзядуля не гатовы мірыцца з памкненнямі ўнука і ўсяляк спрабуе вярнуць яго да стабільнага і паўсядзённага жыцця. Канфлікт пакаленняў становіцца роздумам пра супярэчнасці постсавецкай прасторы.

Пасля прагляду фільма запрашаем на сустрэчу з аўтарам стужкі Андрэем Куцілам.

1 СНЕЖНЯ, нядзеля

Пачатак: 17:00

«Атам» (Вялікабрытанія), рэж. Марк Казінс

Эксперыментальны дакументальны фільм пра ядзерную бомбу ў Хірасіме і яе спадчыне.

Кароткаметражны фільм «Атамныя салдаты» (Нідэрланды), рэж. Морган Кніб

Праз паўстагоддзя салдаты-атамшчыкі, якіх прымушалі маўчаць, дзеляцца сваімі шакавальнымі сведчаннямі. У фільме Моргана Кнібэ апошнія жывыя сведкі амерыканскіх ядзерных выпрабаванняў 1950-х гадоў апісваюць вопыт, які назаўжды змяніў іх жыццё.

Пасля прагляду фільмаў плануецца абмеркаванне і дыскусія.

БОНУС

«Не сыходзь, Малдова» (Беларусь), pеж. Аліна Коўшык, Ужуле-Фонс Сандра

Пачатак: 19:00

Малдова — краіна маштабнай працоўнай міграцыі. Працоўныя мігранты пераводзяць у краіну каля 1 млрд. даляраў ЗША ў год. Адзін мільён малдаван, гэта значыць траціна ўсяго насельніцтва Малдовы, пакінуць краіну да 2050 года. Дакументальны фільм паказвае настроі ў грамадстве падчас парламенцкіх выбараў у Малдове, што прайшлі ў лютым 2019 г.

Гісторыя пяці жанчын дае надзею на перамены знізу ў краіне, палова насельніцтва якой вымушана да эканамічнай эміграцыі. У выніку палітычнага крызісу адна з гераінь фільма, лідэрка кааліцыі «Acum» Майя Санд, цяпер займае пасаду прэм’ер-міністра Малдовы.

Пасля прагляду абмеркаваць фільм можна будзе з адной з яго стваральніц, са-рэжысёркай Алінай Коўшык.