Абласны суд пакінуў прысуд суда Кастрычніцкага раёна без зменаў. Ён не задаволіў апеляцыйныя скаргі абвінавачанай і пацярпелых, а таксама грамадзянскага адказчыка. Не задаволілі і пратэст пракурора.
Прысуд уступае ў сілу неадкладна, праз некалькі дзён абвінавачаная павінна прыбыць на месца адбывання пакарання. Абвінавачаная кажа, што будзе абскарджваць прысуд у Вярхоўным судзе. Яна не задаволена рашэннем суда. “Я думала, звернуць увагу на тое, што працэс вёўся з парушэннямі, былі змененыя дзве лічбы ў разліках”, – кажа Дар’я.
Пацярпелыя таксама не задаволеныя рашэннем суда. Яны пакуль не ведаюць, ці будуць абскарджваць рашэнне. “Калі яна (абвінавачаная – аўт.) не спыніцца, то і мы не спынімся”, – кажуць Язерскія, сям’я загінулага скутарыста.
Справе больш за тры гады
Справу аб смяротнай аварыі з удзелам скутарыста і “Мэрсэдэса” разглядаюць больш за тры гады. Прысуд суда Кастрычніцкага раёна не задаволіў абодва бакі, і яны адправілі апеляцыйныя скаргі ў абласны суд. 29 кастрычніка пачаўся разгляд.
Абвінавачаная Дар’я прасіла адмяніць прысуд і прызнаць яе невінаватай. Грамадзянскі адказчык – яе муж – прасіў падзяліць грашовую кампенсацыю паміж ім і ўладальнікам скутара, на якім перасоўваўся загінулы. Пацярпелыя прасілі даць абвінавачванай максімальны тэрмін па артыкуле – пяць гадоў. І павялічыць грашовыя кампенсацыі бацькам, удаве і дзіцяці загінулага: кожнаму заплаціць па 30 000 рублёў. Таксама яны прасілі прыбраць з матывіровачнай часткі прысуду змякчальныя абставіны – аказанне дапамогі і прызнанне сваёй віны. Апошняе таксама прасіў пракурор. Дар’я прасіла правесці комплексную экспертызу і выклікаць зноў сведку, якая змяніла паказанні. Суд хадайніцтвы не задаволіў.
Прысуд па справе аб аварыі са смяротным зыходам з удзелам скутарыста вынеслі 20 жніўня. Дзяўчына-кіроўца “Мэрсэдэса” атрымала два з паловай гады ў калоніі-пасяленні і на 5 гадоў была пазбаўленая права займацца дзейнасцю, звязанай з кіраваннем аўтамабілем.
Яе судзілі па ч.2 арт.317 КК і прызналі вінаватай у парушэнні правілаў дарожнага руху, што пацягнула па неасцярожнасці смерць чалавека. Яна павінна была заплаціць кампенсацыю пацярпелым – па 10 000 рублёў маці, бацьку, ўдаве, і 15 000 – сыну. А таксама аплаціць судовыя выдаткі і юрыдычную дапамогу, атрыманую пацярпелымі.
Што за аварыя?
Аварыя адбылася ў 2016 годзе. Як пісаў AutoGrodno.by, 22-гадовая дзяўчына за рулём “Мэрсэдэса” ехала з боку Паўднёвага рынку і паварочвала налева. Скутэрыст рухаўся з кальца Славінскага-Перамогі прама, калі яму не саступіў дарогу аўтамабіль. ДТЗ адбылося ў 10.37 на скрыжаванні Індурская шаша – Кабяка. 32-гадовы кіроўца скутэра быў у шлеме, аднак ад атрыманых траўмаў памёр на месцы аварыі.
Справу спынілі за адсутнасцю складу злачынства, потым зноў аднавілі. Праз тры гады пракуратура распачала крымінальную справу ў дачыненні да кіроўцы “Мэрсэдэса”. Ёй прад’яўленае абвінавачванне па артыкуле 317 КК. Бацька загінулага ў свой час шукаў сведкаў, стоячы на месцы аварыі з плакатам. Сям’я загінулага казала пра тое, што віноўніцу аварыі “крышуюць”, пра адсутнасць следчых эксперыментаў і недастатковы пошук сведак. Дзяўчына да мая 2019 года не размаўляла з журналістамі, а потым расказала сваю версію падзей Hrodna.life.
