На плошчы Леніна госці свята асабліва чакалі выступ Яўгена Назарэвіча. Ён шматразовы рэкардсмен сусветных рэкордаў Гінеса ў гіравым марафоне, майстар спорту міжнароднага класа Рэспублікі Беларусь, заслужаны майстар спорту Міжнароднай федэрацыі гіравых відаў спорту. У гэты святочны дзень ён падняў гіру вагой 50 кілаграмаў 75 разоў. Выступ прысвяціў Гродна і сваёй малой радзіме — Шчучыншчыне, піша grodnonews.by.
— Сёння рэкорд атрымаўся сімвалічным, я не палепшыў час, але гэта мяне не хвалюе. Усе перамогі яшчэ наперадзе. А сённяшні выступ ад душы прысвячаю Гродну ў яго 891-ы дзень нараджэння. Падтрымка, якую аказвалі мне госці свята, парадавала, я яе сапраўды адчуваў. Зараз я рыхтуюся да чэмпіянату Еўропы па гіравым спорце, які адбудзецца праз месяц. Шчыра прызнаюся, нягледзячы на спартовы досвед, кожны раз перад выступам хвалююся, але гэта дапамагае трымаць сябе ў тонусе, — падзяліўся Яўген.
Яўген распавёў, што гіру, з якой ён выступаў, прыйшлося зрабіць на замову, таму што такія гіры не выпускаюць.
