Прагляд апошняй серыі культавага серыяла “Гульня тронаў” прайшоў у рэдакцыі Hrodna.life 20 мая. Чытачоў медыя і прыхільнікаў серыалу чакалі кава, чай і добрая кампанія аднадумцаў. Ахвотныя маглі зрабіць фота з рыцарскімі даспехамі на памяць.
Трэба сказаць, што дацярпець да 22.00, калі пачаўся прагляд, было не проста – першыя пераклады фільма з’явіліся ў сеціве ўжо ў 4 раніцы. Яшчэ больш складана было адбіцца ад ахвотных падзяліцца ведамі пра развязку. Таму – шчыра дзякуем усім, хто прыйшоў і усім, хто змог стрымацца і не здаваць апошнія таямніцы тронаў.
Мы вельмі радыя, што чытачы падтрымалі экалагічную прапанову рэдакцыі – узяць з сабой ўласныя кубкі для кавы і чаю. Так што, пакуль дзялілі троны, ніводзін пластыкавы кубак не быў скарыстаны!
Шукайце сябе ў галерэі гасцей і раскажыце нарэшце ўсё, што вы думаеце пра сканчэнне бясконцага серыялу.
Кінапрагляды ў рэдакцыі будуць працягвацца і надалей. Ёсць прапанова паглядзець разам міні-серыял “Чарнобыль” ці анталогію найгоршага кіно свету. Пішыце нам, што б вы хацелі паглядзець разам намі, і будем сустракацца!
