У панядзелак 22 красавіка ля помніка правадыру сусветнай рэвалюцыі на плошчы яго імя ў Гродне сабраліся нешматлікія камуністы. Яны традыцыйна адзначаюць дату 22 красавіка — дзень нараджэння Леніна. У гэтым годзе прыпадае 149 гадавіна яго народзінаў.

Сёлета ля помніка сабралося чалавек 25. З кожным годам такіх людзей, верных ідэалам кампартыі, становіцца ўсё менш. Моладзь Гродзеншчыны амаль не папаўняе шэрагі партыі. Да помніка прыходзяць у асноўным пенсіянеры.

«Сёння нас не вельмі шмат — працоўны дзень. А так у Гродне ў нашай партыі 40% працуючых, трое студэнтаў. Мы па-ранейшаму застаемся вернымі ідэям Леніна — адступаць няма куды. Мы партыя, заснаваная Леніным. Таму я заклікаю ўсіх умацоўваць нашы шэрагі і шукаць новых прыхільнікаў, і прыцягваць у кампартыю», — распавяла на мітынгу першы сакратар Гродзенскага гаркама камуністычнай партыі Беларусі Лілія Кашанкова.

Перадрук матэрыялаў Hrodna.life магчымая толькі з пісьмовага дазволу рэдакцыі. Кантакт info@hrodna.life