Гродзенец Павел Кулік звярнуўся ў рэдакцыю Hrodna.life з пытаннем: куды дзелася скульптура Алесі на ўездзе ў Гродна? Аказалася, помнік забралі адтуль яшчэ перад прыездам Аляксандра Лукашэнкі ў Гродна і абяцаюць вярнуць вясной у новым строі.
Павел распавядае, што штодня праязджае праз галоўны ўезд у Гродна. Ён здзівіўся, калі аднойчы не ўбачыў скульптуры на месцы.
«Кожны дзень па шляху з працы я праязджаю там. За некалькі месяцаў Алеся стала звыклай часткай пейзажу. І наогул, ідэя ўстаноўкі такой скульптуры нядрэнная. Навошта яе трэба было прыбіраць усяго праз некалькі месяцаў пасля ўстаноўкі, пры тым, што ў самым цэнтры горада ўсталявалі некалькі неадназначных кампазіцый?»
«З дапамогай Алесі мы паказваем гасцям, што мы — беларусы, мы цэнім сваю гісторыю і традыцыі», — дадаў Павел.
Скульптура — сезонная
Як аказалася, Алесю забралі супрацоўнікі «Зелянбуда» яшчэ за некалькі дзён да прыезду Аляксандра Лукашэнкі ў Гродна.
«Скульптуру пакуль прыбралі. Калі будуць далейшыя ўказанні, мы яе вернем. Яна ж у нас сезонная — спадніца складаецца з зеляніны», — распавялі Hrodna.life у «Зелянбудзе».
Нагадаем, трохмятровую скульптуру жанчыны пад назвай Алеся-Гараднічанка ўсталявалі 30 мая на ўездзе ў Гродна з боку трасы М6. Такі падарунак напярэдадні Фестывалю нацыянальных культур падрыхтавалі гораду «Зелянбуд» і мясцовы бізнесмэн Генадзь Бергер.
Скульптура складаецца з двух частак: верхняя гэта сілуэт, зроблены са штучнага каменя, які важыць больш за 120 кг, а ніжняя гэта металічная спадніца, напоўненая кветкамі.
