Яркі фудтрак з надпісам «Ружовая пантэра»  меў папулярнасць сярод гасцей веламарафона «Суседзі». Адны ўсміхаліся, узгадваючы культавы мульцік, другія – у адказ на ўсмешкі дзяўчат з фудтрака і прапановы падсілкавацца. Hrodna.life распытаў гаспадынь фургона, адкуль ён узяўся і ці плануе надалей частаваць гродзенцаў.

Наўпрост з мульціка

Ідэя зрабіць яркі фудтрак і назваць яго ў гонар героя знакамітага мульціка прыйшла на думку аднаму з сяброў  Крысціны Гарсіа Алвес.  Дзяўчына прапанавала аб’яднаць намаганні і рабіць бізнес разам. “Яго унёскам быў трак, а я адказваю за харчаванне” – расказала яна. Дапамагае Крысціне гатаваць і прадаваць сяброўка, Ірына Уліда. Абедзьве расказваюць, што ў дзяцінстве (як хіба кожнае дзіця) марылі гандляваць марозівам. А тут усё здарылася, як у марах!

Дзіцячая мара прывяла ў бізнес. Фудтрак  «Ружовая пантэра» частавала «Суседзяў» марозівам і не толькі

Зараз ружовы фудтрак прапануе наведвальнікам хот-догі, канверцікі з начыннем, марозіва і розныя напоі – тое, што не трэба доўга чакаць і можна ўзяць з сабой.

“Гэта больш хобі”

Ружовы фургончык можна ўбачыць на розных гарадскіх мерапрыемствах. Нядаўна “Пантэра” карміла гасцей арт-пікніка ў Велесе, а ў бліжэйшых планах – паўдзельнічаць ў Біг-Міні фестывалі вулічных мастацтваў у Гродне. Штодзень вывозіць фудтрак у горад гаспадары пакуль не плануюць. “Гэта больш хобі, чым бізнес.”

Дзіцячая мара прывяла ў бізнес. Фудтрак  «Ружовая пантэра» частавала «Суседзяў» марозівам і не толькі

Затое для кожнага мерапрыемства стараюцца падабраць свой фармат  ежы. Па словах Крысціны,  на “Суседзях” добра ідзе хуткая ежа, на дзяцячым арт-пікніку на ўра пайшлі ажно 300 порцый марозіва, а для фестываля вулічных мастацтваў плануюцца эксперыменты з сырамі  – запечанымі, з грушай ці з рукалай, а таксама са  свежымі ягадамі да марозіва.