І мова, і інтэграцыя. Гродзенскі дзіцячы хоспіс пачаў серыю мультпраглядаў

Так арганізатары забіваюць адразу трох зайцоў: расказваюць пра хоспіс і правы дзяцей з інваліднасцю, глядзяць цікавыя мультфільмы і папулярызуюць беларускую мову.

— Мы запусцілі форму працы — паказ мульцікаў па-беларуску для школьнікаў, каб расказваць пра хоспіс і правы дзяцей з інваліднасцю. Такім чынам і інфармацыя засвойваецца, і папулярызуецца мова, і пра інваліднасць як сацыяльны працэс расказваецца, — кажа Вольга Вялічка, дырэктарка хоспіса.

[irp posts="61 756″ name="Бальнічных клоўнаў упершыню будуць вучыць у Гродне"]

На першы прагляд запрасілі навучэнцаў са школы № 34, а паказалі на ім «Вэрхал у галаве» («Inside Out») у агучцы студыі Gavarun_by.

Паводле сюжэту, у галаве ў кожнага чалавека жывуць асноўныя эмоцыі: Радасць, Страх, Агіда, Гнеў і Маркота. Яны па чарзе кіруюць паводзінамі чалавека. Мы бачым гэта на прыкладзе галоўнай гераіні Райлі Андэрсан — 11-гадовай школьніцы, якая пераязджае са сваімі бацькамі ў Сан-Францыска і спрабуе прыстасавацца да новага жыцця ў шумным мегаполісе.

Безбар’ерны кінатэатр працуе ў Гродзенскім дзіцячым хоспісе з сакавіка мінулага года. Калі паказаў тут няма, тут збіраюцца валанцёры хоспіса, праводзяцца творчыя заняткі і інтэграцыйныя сустрэчы. Зараз тут знялі яшчэ адзін бар’ер — у доступе да беларускай мовы.