Будаўнічыя работы на месцы будучага футбольнага манежа ў Пышках вядуцца з усіх сіл, бо здаць яго плануюць да канца 2016 года. Яшчэ нядаўна будаўнікі рассцілалі газон на бетоне, а цяпер ужо накрываюць яго вялікім белым купалам.
Сімвалічна, што накрылі газон менавіта ў той дзень, калі год таму на месцы будаўніцтва быў закладзены першы камень.
«Трэніравацца ўжо можна, газон у добрым стане. Вось толькі адна праблема — святла няма. Камунікацыі былі праведзены раней, таму гэта пытанне вырашым хутка. Плануем скончыць працы да Новага года», — кажуць будаўнікі.
Будаўніцтва амаль штодня кантралююць гарадскія ўлады. Сыходзячы ў адпачынак, старшыня гарвыканкама Мечыслаў Гой вызначыў адказнага, каб той сачыў за будаўніцтвам.
Побач з футбольным манежам будзе адміністрацыйны будынак з кафэ, медпунктам, распранальнямі, трэнерскай i класам для заняткаў юных футбалістаў. Але iх здадуць пазней.
Манеж у Пышках планавалі здаць яшчэ ў пачатку лета. Тэрміны будаўніцтва зацягнуліся з-за ўзгадненняў з МНС і іншымі структурамі. Сурьёзныя працы пачалiся тут толькi ў канцы жніўня. Па праекце гродзенскага манежа будуць планаваць будаўніцтва спартыўных аб’ектаў і ў іншых гарадах.
Праект манежа ў Пышках рэалізуе АБФФ пры падтрымцы Гродзенскага аблвыканкама. Манеж з’явіцца на тэрыторыі былога дзіцячага летніка «Юныя касманаўты», побач з крытым лядовым катком Гродзенскага цэнтра алімпійскага рэзерву па хакеі з шайбай.
Гатовы манеж мае перайсці ва ўласнасць ФК «Нёман». Ён будзе круглы год служыць для падрыхтоўкі юных і дасведчаных футбалістаў, а ў перспектыве таксама для правядзення збораў розных каманд. Улетку пры неабходнасці ён можа выкарыстоўвацца і як выставачны цэнтр. Магчыма, побач з лядовым і футбольным манежамі з’явіцца стаянка на 1000 месцаў.
