11 гадзін спатрэбілася гродзенцу Аляксандру Віненка і мінчуку Андрэю Сафроненка, каб пераадолець 83 кіламетры па фартах Гродзенскага раёна. Забег па гістарычных мясцінах яны зладзілі яшчэ ў канцы красавіка.
Мужчыны працуюць айцішнікамі ў розных гарадах, але даўно сябруюць. Вырашылі пераадолець такую дыстанцыю ў першую чаргу для сябе, а таксама паказаць, што спецыялісты ў гэтай сферы могуць не толькі добра працаваць за кампутарамі, але і пераадольваць вялікія дыстанцыі.
«Я хацеў праверыць, як будзе адчуваць сябе арганізм пасля такой вялікай дыстанцыі, — распавядае Аляксандр Віненка. — Мы з сябрамі вечна спрачаліся, ці зможа аматар больш-менш падрыхтаваны пераадолець марафон. Я да гэтага не бегаў больш, чым 30 км і мне казалі, што не прабягу. Але я вырашыў даказаць, што ўсё рэальна. Дамовіўся з Андрэем у якога ўжо быў вопыт у некалькіх марафонах. Так мы і адважыліся аббегчы фарты Гродзенскага раёна. Спецыяльна выбралі гэтыя гістарычныя месцы, можна сказаць сумясцілі прыемнае з карысным».
У выніку мужчыны ўдала фінішавалі і праклалі новы маршрут для аматараў бегу па фартах Гродзенскага раёна. Ён складае амаль 83 км.
«У нас на ўсё сышло 11 гадзін. Вядома, без невялікіх перапынкаў не абышлося, але яны былі неабходныя для харчавання і папаўнення запасаў вады. Акрамя фартоў, па шляху хапала і шмат прыгожых прыродных месцаў. Для нас самае складана было, гэта апошнія кіламетры і матывацыя, каб бегчы далей. Важна было не сысці з дыстанцыі і ў выніку мы выканалі задуманае. Спадзяюся, хто-небудзь паўторыць наш маршрут , — дадаў Аляксандр.
