У межах святкавання Дня горада 14 верасня на парэнчах моста ў пачатку вуліцы Горкага адкрылася выстава старых фотаздымкаў, падрыхтаваная рэдакцыяй Hrodna.life. На выявах сучасныя гродзенцы могуць убачыць тых, хто жыў у горадзе да другой сусветнай вайны, высылак і гета: як яны апраналіся, якім быў іх горад. Незвычайнае месца для выставы прапанавала кіраўніцтва Гродна, каб зрабіць яе часткай свята.

“Самае каштоўнае ў горадзе – гэта, вядома ж, людзі, і дрэнны той горад, які не памятае сваё мінулае”, – гэтымі словамі вядучы адкрыў выставу рэтра-здымкаў на мосце.

"Людзі - гэта таксама эпоха". У Гродне адкрылі выставу рэтра-здымкаў на мосце

Пара ўважліва разглядае фота: “Мы звязаныя з рэстаўрацыяй, цікава ўбачыць жыццё тых людзей. Людзі – гэта таксама эпоха, іх строі, манера фатаграфавацца” – “Тут фотаздымкі, якіх, шчыра кажучы, я не сустракаў”. Увагу наведвальнікаў таксама прыцягваў стары горад на выявах, можна было пачуць каментары аб тым, як прыгожа і багата апраналіся гараджане да прыходу саветаў.

"Людзі - гэта таксама эпоха". У Гродне адкрылі выставу рэтра-здымкаў на мосце

"Людзі - гэта таксама эпоха". У Гродне адкрылі выставу рэтра-здымкаў на мосце

“Мы мусім ведаць гісторыю. Такіх выстаў павінна быць яшчэ больш, – лічыць кіраўнік адміністрацыі Кастрычніцкага раёна Гродна Алег Бялінскі. – Пра гісторыю трэба казаць – без мінулага не будзе будучыні. Мы павінны шанаваць тых, хто жыў тут, будаваў гэты горад. Горад не быў бы такім прыгожым, калі б людзі ў тыя гады не прыклалі сваю працу, намаганні”.

"Людзі - гэта таксама эпоха". У Гродне адкрылі выставу рэтра-здымкаў на мосце
Алег Бялінскі, кіраўнік адміністрацыі Кастрычніцкага раёна

Ён даў “дабро” на тое, каб пасля Дня горада паказаць выставу ў школах Кастрычніцкага раёна.

“Стараюся не браць сямейныя фотаздымкі, бо гэта рэліквія для нашчадкаў”

Руслан Кулевіч, журналіст, збіраў калекцыю старых фотаздымкаў – менавіта жыхароў Гродна – блізу трох гадоў. Яна і стала асновай выставы. “Я збіраю ўспаміны сталых гродзенцаў, і людзі паказваюць свае здымкі, часам дораць. Разам з успамінамі я збіраў і фатаграфіі, – распавёў Руслан. – Часам фатаграфіі аддаюць родныя, калі чалавек памёр, і яны не ведаюць, што з імі рабіць. Тэлефануюць, кажуць, – ёсць цікавы архіў, прыйдзі, забяры. Ёсць такія выпадкі, але наогул я стараюся не браць сямейныя фотаздымкі, бо гэта рэліквія для нашчадкаў. Калі здымкі не патрэбныя, забіраю, каб не змарнаваліся”.

"Людзі - гэта таксама эпоха". У Гродне адкрылі выставу рэтра-здымкаў на мосце
Руслан Кулевіч

Выставу на мосце рыхтавалі ў вельмі кароткі тэрмін. Першапачаткова падобную хацелі размясціць у вокнах дамоў на Міцкевіча, 7 і Міцкевіча, 9 – тых, што выстаўлялі на аўкцыён пад знос, – каб прыцягнуць увагу да каштоўнасці будынкаў Новага Свету. Ідэю адхілілі, спаслаўшыся на аварыйны стан дамоў. Гарвыканкам прапанаваў выставу на Дзень горада як альтэрнатыву.

"Людзі - гэта таксама эпоха". У Гродне адкрылі выставу рэтра-здымкаў на мосце
Мечыслаў Гой, старшыня Гродзенскага гарадскога выканаўчага камітэта
"Людзі - гэта таксама эпоха". У Гродне адкрылі выставу рэтра-здымкаў на мосце
Справа: Віктар Лісковіч, намеснік старшыні Гродзенскага абласнога выканаўчага камітэта, на адкрыцці выставы

"Людзі - гэта таксама эпоха". У Гродне адкрылі выставу рэтра-здымкаў на мосце

"Людзі - гэта таксама эпоха". У Гродне адкрылі выставу рэтра-здымкаў на мосце

Рыхтуем другую кнігу ўспамінаў

Паводле гісторый з жыцця гродзенцаў, якія былі дзецьмі ў міжваенны час і добра яго памятаюць, у канцы мінулага года Руслан Кулевіч выпусціў кнігу “Горад адзін, успаміны розныя”. На прэзентацыі было блізу сотні слухачоў, гараджане і замежнікі і цяпер цікавяцца кнігай. Людзі самі звяртаюцца да аўтара, каб расказаць гісторыю сваёй сям’і, або, наадварот, з просьбамі дапамагчы знайсці звесткі пра сваіх родных або тых, хто ім дапамагаў у той складаны час. У працы другая кніга ўспамінаў сталых гродзенцаў, яе чакаюць да канца гэтага года.

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.