«Усе людзі - з асаблівасцямі ў развіцці». Дзеці з хоспіса і іх мамы прадэманстравалі калекцыю адзення «Святаяннік»

Незвычайны паказ мод, прымеркаваны да Дня маці, адбыўся 14 кастрычніка ў актавай зале заводакіравання «Гродна Азот». У якасці мадэляў выступілі падапечныя Гродзенскага дзіцячага хоспіса і іх матулі.

Праект «Святаяннік» стартаваў тры месяцы таму. Дызайнер Святлана Пінчук распрацавала індывідуальныя вобразы для 14 мам і іх дзяцей, падапечных хоспіса. Для кожнага сшылі індывідуальнае адзенне на традыцыйныя беларускія матывы. Дызайнер выкарыстоўвала ў асноўным матэрыялы беларускіх вытворцаў. На мерапрыемстве дзеці і іх мамы прэзентавалі частку калекцыі. Дырэктар Гродзенскага дзіцячага хоспіса Вольга Шульга так сфармулявала асноўную ідэю мерапрыемства: «Сёння дзень маці. І мы віншуем жанчын, якія маюць дзяцей. Мы б хацелі зрабіць акцэнт на тым, што няважна, колькі дзяцей ёсць, няважна, які стан здароўя дзяцей. А важна тое, што быць матуляй натуральна. І не толькі тады, калі дзіця здаровае і здольнае, а ў любым выпадку — толькі па той простай прычыне, што ты яго маеш».

Вольга Шульга адзначыла, што ёй не падабаецца само паняцце «асаблівасці ў развіцці», таму што «ўсе людзі з асаблівасцямі ў развіцці. Ва ўсіх здароўе рознае, і таму нельга па стане здароўя ацэньваць чалавека. Неабходна выпрацоўваць такія нормы, каб нам усім у гэтым вялікім свеце было камфортна».

Таццяна, мама дзяўчынкі Карыны, падапечнай хоспісу, дзеліцца ўражаннямі: «Мы рэдка недзе бываем, таму ўдзел у паказе мод стаў для нас цікавай і незвычайнай падзеяй. Гэта першае мерапрыемства, якое мы ўвогуле наведалі. Добра, што з’явілася такая магчымасць. Бо ў асноўным мы знаходзімся дома».

Наведнікі мелі магчымасць пазнаёміцца з фотавыставай «Быць з мамай». Выстава стала завяршэннем праекту, які стартаваў на Дзень маці ў мінулым годзе. На фота — падапечныя дзіцячага хоспіса і іх мамы. Мэта фотапраекту — паказаць, што мамы асаблівых дзяцей таксама прыгожыя і таксама хочуць сябе паказаць.