«Падпісанты выбралі Нёман, я і паплыў», — кажа Стас Вулканаў. Яму спатрэбілася 12 дзён, каб пераадолець на сапбордзе Нёман ад вытокаў да Гродна. Усяго хлопец праплыў 450 км, гэта адно з самых працяглых яго падарожжаў па Беларусі. Пра сапборд і падарожжа на ім Стас распавёў Hrodna.life.

Сапборд (з англійскай sup-board; stand-up padding — веславанне стоячы і board — дошка) — гэта надзіманая дошка для сёрфінгу з вяслом. У Беларусі сплаўляюцца на сапбордах па рэках і азёрах.

Стас жыве ў горадзе Любань (Мінская вобласць), зарабляе, размяшчаючы фатаграфіі на стоках. Два гады ён ужо плавае на сапборде. У 2018 годзе беларус сплаўляўся па Украіне да Чорнага мора, падарожжа доўжылася 1,5 месяца. На 2020 год у Стаса таксама былі запланаваны замежныя паездкі, але пандэмія ўсё змяніла.

«Зачыненыя межы далі магчымасць звярнуць увагу на Беларусь. Я лічу, цяпер самы ідэальны час вывучыць сваю краіну ўздоўж і папярок, — распавядае Стас. — Я спытаў у падпісчыкаў, куды плыць. На выбар было тры ракі: Сож, Свіслач і Нёман. Падпісчыкі выбралі Нёман, я і паплыў. Для мяне такое падарожжа — гэта адпачынак і трэніроўка да больш складаных трыпаў».

Ад Нёмана ў Стаса дваякае ўражанне. Выток і вярхоўе — ідэальная, чыстая вада і шмат рыбы. Другая частка Нёмана, пасля Бярозаўкі, — брудная і каламутная вада. Гэта для яго адзіны мінус, у астатнім прыроду Беларусі ён называе шыкоўнай.

Падчас падарожжа Стас рабіў фатаграфіі для сацыяльных сетак і здымаў відэа на свой канал у YouTube.

сапборд Нёман
У час сплаву па Нёмане. Фота: Руслан Кулевіч

Самае страшнае — моцны вецер

Падарожжа Стас пачаў з Лашанскага вадасховішча. Там пачынаецца рака Лоша, якая ўпадае ў Нёман. За 12 дзён хлопец прайшоў 450 км. У дзень у сярэднім ён пераадольваў па 40 км пры хуткасці 5 км/г.

«Плыву я адзін. Рыбакі вітаюць, многія пытаюцца пра сап. Даводзіцца распавядаць. Каля Бярозаўкі сустрэліся з падпісчыкам, ён запрасіў да сябе на дачу пераначаваць. А так я заўсёды ў намёце сплю».

Усе падарожжа па Нёмане Стас пераадольваў стоячы на ​​сапбордзе. Дошка з рыштункам важыць каля 12 кг.

«За паездку я ні разу не ўпаў. Нават калі дошка перавернецца, усе рэчы застануцца сухімі і будуць на месцы — яны ў мяне ў гермамяшках. А калі дождж, то ў мяне ёсць накідка і можна спакойна працягваць рух. Самае страшнае — гэта моцны вецер, які можа затармазіць і прыходзіцца выдаткоўваць шмат сіл на кіраванне».

Рух сапераў у Беларусі

Стас распавядае, што рух сапераў у Беларусі расце. У кожным абласным цэнтры ёсць хлопцы, якія сплаўляюцца на дошках па вадаёмах.

«На сапе лёгка навучыцца катацца. Можна гэта зрабіць усяго за 10 хвілін. Я ведаю, што ў Гродне ёсць рух сапераў. У мяне запланавана з імі сустрэча. Будзем абмяркоўваць сумесныя праекты».

У Гродне сапборды можна ўбачыць на Юбілейным возеры.

Рэпарцёр, фатограф, краязнаўца. Самы хуткі журналіст Гродна на ровары. Руслана і яго ровар ведаюць многія гараджане: ад чыноўнікаў да бамжоў. Падчас службы ў войску быў разведчыкам, а цяпер даказвае, што выведнік былым не бывае. Працуе ў Hrodna.life з 2013 года, калі сайт яшчэ працаваў пад брэндам «Твой стыль». У канцы 2018 выдаў кнігу «Горад адзін, успаміны розныя», дзе сабраў успаміны гродзенцаў пра 1930−40-я гады.