Сквер за “тэкстылямі” перажывае апошнюю восень: там пабудуюць офісны цэнтр. Што думаюць гродзенцы?

Восень 2018 будзе, верагодна, апошняй для невялікага скверу за палацам тэкстыльшчыкаў. Ужо ў наступным годзе на гэтым месцы распачнецца будаўніцтва гандлёва-офіснага цэнтру. Ён можа як упрыгожыць, так і цалкам знішчыць адметны кавалак старога горада. Hrodna.life пагутарыў пра гэта з людзьмі на Замкавай і гісторыкам Мечыславам Супронам.

Праект на ўзгадненні

Участак за Палацам тэкстыльшчыкаў быў прададзены на аўкцыёне ў пачатку 2017 года. Яго набыў літоўскі інвестар, які мае ў Беларусі сетку піцэрый “Pizza&Coffee” ды іншыя невялікія бізнесы, напрыклад, краму “Z-маркет” на аўтавакзале ў Гродне.

Яшчэ невядома, як дакладна будзе выглядаць новы гандлёва-офісны цэнтр. Праект пакуль узгадняюць у Мінкульце. Будаўніцтва пачнецца не раней 2019 года. Уласнік не жадае дзяліцца інфармацыяй, пакуль праект канчаткова не зацверджаны.

Сквер за “тэкстылямі” перажывае апошнюю восень: там пабудуюць офісны цэнтр. Што думаюць гродзенцы?
Такі ўчастак набыў літоўскі інвестар пад забудову

Закрые “Дом быту”

Ніна [фатаграфавацца адмовілася] ўсё жыццё жыве на Замкавай, 15 і памятае, як а месцы сквера яшчэ стаялі старыя прыгожыя будынкі. “Кожны раз калі праходжу міма – узгадваю, як тут выгляда ўсё старое”.

Для карэннай гродзенкі важна, як новы будынак будзе выглядаць. “Калі ў тым жа стылі, што і ўся вуліца, то будзе вельмі прыгожа. Тым больш, новыя будынкі закрыюць від на Дом быту”, – кажа Ніна. Савецкі будынак, на думку гродзенкі, не ўпісваецца ў агульны выгляд вуліцы. Але новы офісны цэнтр можа закрыць від і на суседні манастыр, а гэта жыхарцы вуліцы зусім не падабаецца.

Хопіць забудоўваць гістарычны цэнтр?

Музыкаў Міхаіла і Ганну мы сустрэлі ў скверы. Пра тое, што тут павінен з’явіцца офісны цэнтр, яны пачулі ўпершыню ад нас.

Сквер за “тэкстылямі” перажывае апошнюю восень: там пабудуюць офісны цэнтр. Што думаюць гродзенцы?
Міхаіл і Ганна

Міхаіл лічыць, што на гэтым месцы і так усё міла выглядае, таму ідэю будаўніцтва скверу не падтрымлівае.  Ганна наогул лічыць, што ўжо хопіць забудоўваць гістарычны цэнтр. “Навошта тут нешта зменяць і “ўпісваць” нешта новае?” – пытае Ганна.

Чытайце яшчэ:  Яшчэ адна вуліца з брукаванкай. Ці можа Замкавая стаць другой пешаходнай вуліцай у Гродне?

Парковак і так не хапае

Ірына жыве на ўскраіне горада, але любіць прыехаць на шпацыр у цэнтр. Планы будаўніцтва офіснага цэнтра на месцы невялічкага сквера яе расчаравалі, бо Замкавая – адна з яе любімых вуліц.

Сквер за “тэкстылямі” перажывае апошнюю восень: там пабудуюць офісны цэнтр. Што думаюць гродзенцы?

“Гэты скверык вельмі ўтульны”, – кажа яна. Офісных цэнтраў, на думку Ірыны, у горадзе і так хапае, а зялёных зон робіцца толькі менш. “Нават не ўяўляю, як будзе выглядаць адна з любімых вуліц”.

Чытайце яшчэ:  Замкавая вуліца павінна быць пешаходнай! Як гэта зрабіць, захаваўшы парковачныя месцы

Некаторыя гродзенцы лічаць, што на месцы сквера лепш за ўсё зрабіць паркоўку. З гэтым згодны Канстанцін, які не знайшоў месца каб прыпаркаваць аўто. “Калі на месцы сквера пабудуюць гандлёва-офісны цэнтр, сітуацыя з паркоўкай толькі пагоршыцца”, – перакананы ён.

Офісы ў цэнтры – лагічна

Гродзенскі гісторык і краязнаўца Мечыслаў Супрон кажа, што ў межах гістарычнага цэнтра павінны існаваць гандлёва-офісныя цэнтры. Зрэшты, некалькі такіх будынкаў у старым горадзе ёсць. “На прыкладзе еўрапейскіх гарадоў гэта выглядае лагічна. Там большасць будынкаў у цэнтры – офісы, крамы і пункты грамадскага харчавання”.

Але да ідэі будаўніцтва на Замкавай Мечыслаў ставіцца вельмі асцярожна.

“Па-першае, гэта самае сэрца гістарычнага цэнтра і любое ўмяшанне ў архітэктурны воблік гэтай часткі мусіць быць узгодненае з грамадскасцю і спецыялістамі, а не прымацца наўздагад у кабінетах чыноўнікаў.

Па-другое, узвядзенне такога вялікага офіснага цэнтра ўскладніць транспартную сітуацыю ў без таго праблемным участку вуліц Вялікай Траецкай і Давыда Гарадзенскага”.

Сквер за “тэкстылямі” перажывае апошнюю восень: там пабудуюць офісны цэнтр. Што думаюць гродзенцы?

Мечыслаў кажа, што пры быдаўніцтве трэба абіраць паміж двух шляхоў: адбудовы страчаных аб’ёмаў, якія існавалі на гэтым месцы, або ўзвядзення новых аб’ёмаў, якія будуць максімальна гарманіраваць з існуючай забудовай.

Раскопкі – абавязкова

Археалагічныя раскопкі – неабходная мера, лічыць Супрон: “Гэты ўчастак мае выключную цікавасць для вывучэння і змяшчае не менш за сем стагоддзяў культурнага пласту”.

Чытайце яшчэ:  Зусім не камяніца Масальскіх. Дзе знайсці самы стары жылы дом у Гродне?

Да 1960-х тут знаходзілася гістарычная забудова, сярод якой быў самы стары вядомы жылы дом у горадзе – дом рыбацкага цэху 16 ст. Падчас нядаўніх прац па замене камунікацый рабочыя адкапалі падмуркі гэтага будынка, аднак спецыялісты іх не вывучалі.

Мечыслаў баіцца, што раскопак праводзіць не будуць, а будынак пабудуюць на ўбітых у зямлю палях. Гэта вельмі небяспечная тэндэнцыя, упэўнены Супрон. Гэтак быў збудаваны рэстаран “Бакст” у самым цэнтры горада.

Чытайце яшчэ:  Не дорага, але вельмі прэстыжна. Чаму Гродна патрэбна ўласная археалагічная экспедыцыя

Каб не атрымаўся чарговы Дом быту

Мечыслаў адзначае, што ёсць у Гродне даволі добры прыклад забудовы пустога месца ў гістарычным цэнтры – будынак АВС на вуглу Савецкай і Найдуса. Па першае, ён максімальна ўпісаўся ў забудову вуліцы, а па другое, сваімі абрысамі ён вельмі падобны да дома Чартка, які знаходзіўся на тым месцы раней.

Сквер за “тэкстылямі” перажывае апошнюю восень: там пабудуюць офісны цэнтр. Што думаюць гродзенцы?
Цэнтр ABC – не самы горшы прыклад новай забудовы ў цэнтры горада

З такім падыходам згодны і гродзенец Раман, якога мы сустрэлі на Замкавай. “Калі забудова будзе вытрымана ў тым жа стылі, як і дамы насупраць, і не будзе выглядаць як новабуд, то будзе прыгожа. Галоўнае, каб не атрымаўся другі дом быту”.

Чытайце яшчэ:  Вуліца Кляшторная, якую “дабіў” Дом быту: як выглядала, куды знікла і чаму яе трэба аднавіць

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.

Перадрук матэрыялаў Hrodna.life магчымы толькі з пісьмовага дазволу рэдакцыі. Звяртайцеся info@hrodna.life

Раім пачытаць

Каментары

comments powered by HyperComments

Spelling error report

The following text will be sent to our editors: