Людзі і справы

Шчырая размова пра падарожжы і медыі. 34travel прыязджае ў Гродна з «адкрытай лятучкай»

Мы звязаліся з галоўным рэдактарам выдання Антонам Кашлікавым і папрасілі расказаць пра тое, што чакае гродзенцаў на сустрэчы і як падарожжы могуць мяняць людзей, краіну і ўвесь свет.

Калі ў некалькіх словах, што такое 34travel?

34travel.me — гэта сайт для незалежных падарожнікаў, але важна адразу разумець, што мы расказваем не толькі пра тое, як кудысьці танна даехаць і што там паглядзець. Мы — медыя пра тое, як жыць з адкрытымі вачыма, не баяцца змяняцца самому і змяняць рэчаіснасць вакол сябе. Падарожжы, у тым ліку па сваёй краіне, — гэта ўсяго толькі нагода станавіцца лепшым.

Антон Кашлікаў, галоўны рэдактар выдання 34travel.me

Якімі сваімі дасягненнямі вы можаце ганарыцца?

У гэтым чэрвені будзе два гады, як мы запусціліся. Галоўнае, што ў нас ёсць цяпер, — гэта кам’юніці чытачоў, што стабільна расце. Я называю людзей з гэтай суполкі словам «кам'юніці», таму што нашы чытачы даволі лёгка могуць стаць нашымі аўтарамі. Асабіста я цяпер вельмі ганаруся праектам Go to Belarus, які мы нядаўна запусцілі. Go to Belarus — гэта вялікі, жывы даведнік па Беларусі на рускай і англійскай мовах, які пастаянна абнаўляецца.

Навошта вы ўвогуле прыязджаеце ў Гродна? Навошта інтэрнэт-выданню ладзіць сустрэчы з чытачамі?

Гэта ўвогуле вельмі правільная традыцыя — час ад часу выбірацца з-за кампоў, каб ужывую пагутарыць з тымі, для каго ты і робіш сайт. Фідбэк — гэта важна. І мы стараемся ладзіць падобныя сустрэчы досыць рэгулярна. І - так! Мы не ўтойваем, нам хочацца, каб нас чыталі па ўсёй Беларусі, а не толькі ў Мінску. Таму 5 мая мы робім «адкрытую лятучку» ў Гродне, а 11 мая будзем сустракацца з чытачамі ў Брэсце.

А што гэта наогул за такі фармат — «адкрытая лятучка»? Гэта вы прыдумалі?

Не ўпэўнены, што гэта прыдумалі мы, але мне гэты фармат вельмі падабаецца. Па сутнасці, гэта даволі шчырая размова пра тое, як усё ўладкавана. З магчымасцю для тых, хто прыйшоў на сустрэчу, нічога не саромеючыся, крытыкаваць, прапаноўваць або ўступаць з намі ў дыскусію.

Хто ад рэдакцыі будзе на сустрэчы ў Гродне?

Будзе шэф-рэдактар ​​Наста Яроха, яна раскажа пра тое, што наогул зараз адбываецца ў індустрыі падарожжаў, як працаваць з трэвел-тэкстамі і як распавядаць пра свае паездкі так, каб гэта было цікава камусьці яшчэ, акрамя вашай мамы ці бабулі.

Наста Яроха, шэф-рэдактар выдання 34travel.me
Кася Сырамолат, наша арт-дырэктарка, раскажа аб стварэнні сайтаў і афармленні матэрыялаў з пункту гледжання візуальнага ўспрыняцця. Да таго ж Кася вельмі крутая фотографка, заўсёды і ўсім раю падпісвацца на яе Instagram.
Кася Сырамолат, арт-дырэктарка выдання 34travel.me
Ну і я распавяду пра тое, як і навошта рабіць медыя, як выбудоўваць стасункі з партнёрамі і рэкламадаўцамі, як ствараць каманду мары. І як пры гэтым захаваць сілы, аптымізм і разуменне таго, што твая праца — гэта бег на доўгую дыстанцыю.

Каму варта абавязкова прыйсці на сустрэчу?

Я б вельмі раіў прыйсці ўсім, хто любіць падарожжы, і тым, хто працуе або жадае працаваць у медыя. Ім гэта можа быць карысна ў першую чаргу. Мы з задавальненнем запрашаем мясцовых актывістаў і прадстаўнікоў бізнесу. Адна з задач нашага прыезду — новыя знаёмствы, і, вядома, было б крута, калі б у самых стромкіх і годных людзей Гродна ў пятніцу ўвечары знайшлася гадзіна-паўтары на сустрэчу з намі.


Сустрэча адбудзецца 5 мая, у 19.00, у памяшканні па адрасу вул. Будзёнага, 48а-86 (уваход з унутранага дворыка).

Падзяліцца

Апошнія запісы

З адной бярозы — да 200 літраў. Як беларусам здабыць бярозавы сок на радзіме і ў эміграцыі

Здабываць бярозавы сок вясной — беларуская традыцыя, у кожным лясніцтве яго можна купіць за капейкі.…

3 красавіка 2025

Тры Белавежскія пушчы. Як агароджы на мяжы змяняюць лес і жывёльны свет у Беларусі, Польшчы і паміж платамі

Белавежская пушча сёння раздзеленая не на дзве, а насамрэч на тры часткі: беларускую, польскую і…

31 сакавіка 2025

«Трэнд — мацоўня, здароўе». Задалі адны і тыя ж пытанні металістам з Беларусі і Польшчы

Ужо некалькі дзесяцігоддзяў метал-музыка аб'ядноўвае людзей не толькі адных музычных прыхільнасцяў, але і падобнага светапогляду.…

26 сакавіка 2025

У гродзенскім ГЦ развяліся прусакі. Куды звяртацца, калі заўважылі насякомых у кафэ ці ў сябе дома

У ГЗК Triniti гродзенцы заўважылі прусака — насякомае бегала па канапе ў зоне фуд-корту. Hrodna.life…

26 сакавіка 2025

«Магчыма, будзе і новы матэрыял». Вакаліст гурта Ulis Слава Корань расказаў, як эміграцыя не дае яму пісаць

Беларускі гурт Ulis праіснаваў больш за 20 гадоў. Яго спадчына жыве - музыканты робяць каверы,…

20 сакавіка 2025

«Мама выпісвала фальшывыя дакументы і дапамагала трапіць у Польшчу». Рэпатрыянтка — пра дзяцінства ў Гродне і эміграцыю ў 1946-м

Крысціна Мішчук (Пянткоўская) нарадзілася ў 1933 годзе ў Гродне ў сям'і мясцовай інтэлігенцыі. Каталічка. Тата…

18 сакавіка 2025