Скрэмбл, смёрэброд, крок-мадам – усё гэта назвы сняданкаў, якія прапануюць гродзенскія ўстановы. Што ўваходзіць у “Беларускі сняданак”? Дзе выпіць келіх віна ў 7.30 раніцы? Дзе можна паснедаць у 20.00? Рэдакцыя Hrodna.life прагледзела, дзе і чым можна паснедаць у Гродне.
UPD. Першы раз матэрыял абнаўлялі ў ліпені 2025 года. У параўнанні з нашым гайдам 2023 года, кошты выраслі ў 1,5-2 разы. Другое абнаўленне было ў сакавіку 2026 — у сярэднім сняданкі падаражэлі на 2-3 рублі за год, а ў некаторых установах кошт страў застаўся ранейшым.
Проста сняданкі
Рэстаран Marmo
Час сняданкаў: 9.00 – 12.00 у буднія і 9.00 – 14.00 у выходныя
Кошты: 12 – 39 рублёў
На сняданак наведвальнікам прапануюць грачаную або аўсяную кашы, боул з ласосем, некалькі відаў шакшук і дранікі. Ёсць асобная катэгорыя «сняданку на булцы», туды ўваходзяць сэндвіч з ростбіфам, яйкі бенедыкт з ласосем і тар-тар з ялавічыны. На дэсерт – сырнікі з салёнай карамеллю або маркоўны торт з вішняй.
Кафэ “Карчма”
Час сняданкаў: 9.00-12.00
Цэны: ад 10 да 22 рублёў
Што прапануюць:
- шакшука з печанай гароднінай,
- амлет з вяндлінай і сырам,
- аўсяная каша з маслам і напаўняльнікамі (напрыклад, арэхамі),
- кускус або булгур з маслам,
- пышныя аладкі са смятанай і варэннем,
- сырнікі са смятанай,
- наліснікі з тварагом,
- дранікі,
- сэндвічы.
Рэстаран «Кронан Парк Гатэль»
Час сняданкаў: 8.00 – 12.30
Цана: ад 6 да 33 рублёў
У рэстаране прапануюць ёгурты з джэмам і гранолай або з трускаўкай, дранікі з цукіні з крэветкамі і авакада, рысавую і аўсяную кашы, блінцы з маслам, з тварагом і разынкамі, чырвонай ікрой і крэм-чызам, з ласосем і крэм-чызам. Цэны ад 13 да 35 рублёў. Таксама можна замовіць сняданак у беларускім стылі, у склад якога ўваходзяць каўбаска на грылі з запечаным бульбай, яйкам пашот і маласольнымі агуркамі. Цана – 34 рублі. Яшчэ ў меню ёсць амлеты, круасаны, сырнікі, аладкі і яйкі, як напісана ў меню, “у любым выглядзе на ваш выбар” за 6 рублёў.
А вось амлет «Мікс» з усімі дадаткамі або амлет са страчатэлай і зялёнай гароднінай будуць каштаваць 31 рубль. Столькі ж каштуе бялковы амлет з сырам бры і таматамі.
Ёсць і дэсерты:
- Хатні кекс – 6 рублёў
- Фруктовая салата – 17 рублёў
- Французскі тост з кляновым сіропам і вяршкамі – 35 рублёў
- Бельгійскія вафлі з лаймавым крэмам – 27 рублёў
- Макава-чарнічны дэсерт – 26 рублёў
- Цёплы вішнёвы пірог – 26 рублёў
- Чызкейк – 26 рублёў
Кавярня «Джэзва»
Час сняданкаў: 8.00 – 00.00
Цана: ад 15 да 22 рублёў
Сняданкі ў кафэ, мяркуючы па сацсетках установы, падаюцца з 8 раніцы і да позняга вечара. У меню розныя круасаны, якія, праўда, выпякаюць толькі да 14.00. Але пазней можна замовіць, напрыклад, скрэмбл. Ёсць некалькі варыянтаў на выбар: і з ласосем-тэрыякі, і з барбеккю, вэнджанай курыцай і агурком, а таксама з тартарам з тунца і гуакамоле. Ёсць і іншыя варыянты: з крэветкай, з беконам і пармезанам, з ірванай свінінай і ананасам-грыль. Цана – 15-17 рублёў.
Можна замовіць дранікі з беконам, ласосем або крэветкамі. У меню таксама ёсць салаты, супы, грачаная і аўсяная кашы з дадаткамі і сырнікі ад 9 да 14 рублёў за порцыю.
Рэстабар «Pablo»
Час сняданкаў: 9.00 – 12.00 у буднія дні і 9.00 – 16.00 у выходныя
Кошт: ад 13 да 22 рублёў
У меню круасаны, панкейкі, аўсяная каша, а таксама “грэнкі ад мамы” з ласосем або крэветкамі.
Круасаны ад 6 рублёў (звычайны без начыння) да 24 рублёў з яйкам пашот. Таксама прапануюць заходні сняданак “Менемен” з таматамі, зелянінай, крэмчызам і чыябатай за 21 рубль. Ёсць у меню і амлеты з рознымі дабаўкамі за 22 рублі за порцыю.
Рэстаран The Cult
Час сняданкаў: 8.00 – 12.00
Кошт: 15 – 39 рублёў
У рэстаране падаюць амлет з беконам за 25 рублёў, дранікі з рознымі дабаўкамі за 30 рублёў і тосты за 18 рублёў. Самая дарагая пазіцыя – бутэрброд з чырвонай ікрой, абыдзецца ў 39 рублёў.
З напояў можна замовіць свежавыжатыя сокі, ліманады і безалкагольныя кактэйлі. Кошт вар’іруецца ад 14 да 20 рублёў.
Кавярня «Поляна City»
Час сняданкаў: з 9.00 (да якой, не пазначана)
Кошт: 6 – 28 рублёў
У кавярні гатуюць розныя стравы з яек (скрэмблы, амлеты і яечню), коштам ад 21 да 24 рублёў. Таксама ёсць круасаны з рознымі начыннямі: з грыбамі, сырам, тунцом ці курыцай. Ёсць салаты з крэветкамі, ласосем, тунцом і курыцай — каштуе ад 24 да 28 рублёў.
Кафэ «Культура»
Час сняданкаў: 8.00 да 13.00
Кошт: 13 – 21 рубель.
У кафэ можна замовіць сырнікі з малінавым соусам — яны каштуюць 14 рублёў, «англійскі сняданак» з амлетам, вяндлінай і чыабатай за 21 рубель або равіолі з тварагом і ягадамі за 15 рублёў. Таксама ва ўстанове на сняданкі гатуюць дранікі, хашбраўны (аладкі з рознай гародніны) і фруктовы боул.
Кавярня «Тэмпл»
Час сняданкаў: 9.00 – 12.00
Кошт: 5 – 22 рублі
У “Тэмпл” ёсць некалькі відаў гатовых сняданкаў. Нарвежскі з ласосем, кантынентальны з глазунню і лісічкамі, а таксама дранікі з крэветкамі. Стравы каштуюць 15 рублёў.
Дапоўніць заказ можна сырнікамі або панкейкамі з салодкімі топінгамі, круасанамі або тостамі.
Сняданкі і бранчы с келіхам ігрыстага
Кавярня “Справа”
Час сняданкаў: 9.00-16.00
Цана: ад 15 да 22 рублёў
За 22 рублі можна паспрабаваць “беларускі” сняданак. У яго ўваходзяць яйкі, запечаная бульба, каўбаскі, бачковы агурок і гарчычны крэм чыз. Таксама прапануюць яйкі па-турэцку з грэцкім ёгуртам, авакада-тост з яйкам пашот. Можна замовіць і вялікі дранік са шпінатным крэм чызам, яйкам пашот. На выбар можна дадаць стронгу або бекон. Каштуе такі сняданак 22 рублі. За 15 рублёў у меню ёсць сырнікі з маскарпоне і варэннем.
Да сняданку прапануюць келіх ігрыстага за 10 і 14 рублёў.
Кавярня «Проходная»
Час сняданкаў: 9.00 – 16.00
Цана: ад 12 да 22 рублёў
У “Проходной” да сняданку таксама прапануюць келіх ігрыстага, коштам ад 10 да 14 рублёў.
У меню ёсць некалькі варыянтаў сняданкаў:
- “Вялікі сняданак”:
- “нарвежскі”,
- “дацкі”,
- “кантынентальны”.
- Сняданкі “на хлебе”:
- яйкі бенедыкт на булачцы брыёшь; да іх можна выбраць інгрэдыенты: ласось, авакада, крэветкі, бекон.
- Варыянты з тостамі:
- “крок-мадам” (французскі бутэрброд з яйкам, вяндлінай і сырам),
- ростбіф-сэндвіч,
- авакада-тост.
- “Іншыя сняданкі”:
- хумус,
- французскі амлет,
- скрэмбл (простай мовай – яечня-баўтушка на кавалку хлеба).
Рэстаран «Пешков»
Час сняданкаў: 7.30 – 11.00
Цана: ад 10 да 31 рубля
Тут да сняданку можна пакаштаваць Prosecco. Да келіха віна можаце замовіць “англійскі”, “беларускі” або “нарвежскі” сняданак за 31 рубль.
Таксама ёсць стандартныя стравы з яйкаў ад 8 да 20 рублёў.
Таксама на сняданак прапануюць дранікі з рознымі начыннямі, сэндвічы, сырнікі і аўсяную кашу на малацэ ці вадзе.
Рэстаран «Шервуд»
Час бранча: 08.00 – 11:30
Цана: ад 8 да 35 рублёў
У меню:
- “Беларускі сняданак” з дранікамі, глазунню і з шампіньёнамі,
- «Англійскі сняданак» з фасоллю, каўбаскамі і бульбянымі долькамі,
- «Скандынаўскі сняданак» з авакада, ласосем і булачкай,
- Амлет,
- Таксама ёсць сырнікі і аўсяная каша.
Рэстаран Boboli
Час сняданкаў: 9.00 – 12.00 у буднія і 9.00 – 14.00 у выхадныя
Кошт: 10 – 29 руб.
У рэстаране на сняданак падаюць бельгійскія вафлі з дадаткамі (бекон, крэветкі, ростфіб, сёмга) на выбар. Можна замовіць аўсяную кашу «Цірамісу», зялёную грэчку ці сырнікі. Да страў прапануюць алкагольныя кававыя напоі і кактэйлі – каштуюць 17 рублёў.
Сняданкі да вечара
Бар «Публіка»
Час сняданкаў: 12.00 — 16.00
Цана: ад 10 да 18 рублёў
Ва ўстанове падаюць як гатовыя сняданкі, так і сняданкі-канструктары коштам 10 рублёў. Можна паспрабаваць фірмовы сняданак «у Публіцы» за 18 рублёў, шакшуку за 15, дранікі з чырвонай рыбай і крэм-чызам, аўсяную кашу са шпінатам, грыбамі і яйкам пашот за 16 рублёў, а таксама прысмакі з ірванай ялавічынай, агурком і яечнай-цалкай за 15 рублёў. Ёсць і сырнікі з рыкоты за 12 рублёў.
«Крепкий белый»
Час сняданкаў: 8.00 — 20.00
Цана: ад 15 да 26 рублёў
Паснедаць у кавярні можна, выбраўшы:
- сырнікі з белай карамеллю і ягадамі за 15 рублёў,
- амлетны сэндвіч з беконам і інжырным джэмам за 19 рублёў,
- зялёную грэчу з міндальным песта і курыцай за 21 рубель,
- аўсяную каша з арахісавай пастай і бананам за 17 рублёў.
Таксама ў кавярні можна замовіць вялікі сняданак з крэветкамі або рыбай. Каштаваць ён будзе 24 – 26 рублёў.
«Lcoffee»
Час сняданкаў: 7.30-19.30
Цана: ад 6 да 20 рублёў
На сняданак прапануюць розныя круасаны, сырнікі, аўсяную кашу з рознымі дабаўкамі. Напрыклад, порцыя з бананам будзе каштаваць 9 рублёў. Таксама ў меню – яйкі пашот з беконам і брокалі, скрэмбл, гэта значыць амлет, з ласосем, або грэчка з беконам.
Чытайце таксама: Кофейня Lcoffee открылась в Гродно – что там интересного и вкусного?
Кавярня “Тепло”
Час сняданкаў: 9.00-21.00
Цэны: ад 14 да 22 рублёў
У меню:
- вялікі сняданак за 22 рублі,
- сэндвіч з мартадэлай і песта 19 рублёў,
- аўсянка карбанара за 15 рублёў,
- сырнікі з чарніцамі за 14 рублёў.
Кафе «Дюна»
Час сняданкаў: 10.00-23.00
Цэны: ад 6 да 17 рублёў
У кафэ прапануюць скрэмбл і бэнэдыкт з рознымі дапаўненнямі, булгур з ростбіфам і яйкам, веганскую аўсянку, вафлі і тосты. Таксама да сняданку можна дадаткова замовіць кубак класічнай або аўтарскай кавы ці гарбаты.
Кавярня «Доппио»
Час сняданкаў: 10.00 – 23.00
Цэны: ад 7 да 10 рублёў.
У «Доппио» на сняданак прапануюць:
- сырнікі з какосавай згушчонкай за 9,5 рублі,
- круасаны з рознымі дадаткамі за 6 – 15,5 рублёў,
- нарвежскі сняданак з чыабатай, фарэллю і грушай за 17 рублёў.
Кафэ «У Грушы»
Час сняданкаў: 7.30 – 16.00
Кошты: 8 – 22 рублі
Ёсць англійскі, беларускі, а таксама нарвежскі сняданкі за 22 рублі. Яшчэ ў кафэ падаюць аўсяную кашу, яечню-баўтушка і тварожныя аладкі з рознымі дабаўкамі.
Бранчы
Лаунж-кафэ “Барашка”
Час бранча: 12.00 – 17.00
Цэны: 5-42 рублёў
Па суботах і нядзелях можна паспрабаваць фрэш боўлы, а таксама турэцкі сіміт з камчацкім крабам па 42 рублі, з ростбіфам і таматамі па 22 рублі. Танней каштуе грачаная каша з грыбамі і пармезанам — 15 рублёў. Шакшука — 20 рублёў. У меню ёсць таксама дранікі, амлеты скрэмблы і салодкія сняданкі.
