Каця (імя зменена) — студэнтка аднаго з гродзенскіх універсітэтаў. Ужо больш за год дзяўчына здымаецца ў стылі ню. Кажа, гэта дало ёй магчымасць палюбіць сваё цела. Здымка аголенай для яе — хобі, у будучыні гродзенка хоча вывучаць чалавечае цела і адносіны паміж людзьмі.
Першая фотасесія ў стылі ню была вясной мінулага года. Тады Каця нават не ўяўляла, што працягне здымацца ў гэтым жанры. Але адкрытасць да фатографа і гатовыя здымкі падштурхнулі займацца гэтым і далей.
«Я прыйшла на звычайную здымку, але ў нейкі момант мне захацелася пагуляць са сваім целам, фатограф быў не супраць. Менавіта тады я стала адкрываць часткі цела. Пачынала з плячэй і паступова пераходзіла да ніжніх частак. Тую здымку можна было назваць эротыкай, а не здымкай у стылі ню — я тады нават не была цалкам аголена. Але калі я паспрабавала здымку ўжо без адзежы, то зразумела, што мне так камфортней і зручней, чым здымацца ў вопратцы. Менавіта з-за гэтага я і стала здымацца аголенай».
Няма ідэальных целаў
Каця кажа, што фатаграфіі з аголенымі целамі нясуць эстэтычны характар. Для гэтага фатограф і герой падбіраюць сюжэт, у якім могуць паказаць прыгожае цела, бялізну, рамантычны пасыл або любоўную сцэну. Можна паказаць плямы на целе ці якія-небудзь іншыя асаблівасці чалавека.
«Для пасылу ў фатаграфіі ў стылі ню галоўным выступае не цела, а агульная кампазіцыя. Агулам гэта жанр мастацкі і не нясе ў сабе адкрытага ці значнага сэксуальнага кантэксту. Ён накіраваны на перадачу эстэтычнага настрою і сэнсавай нагрузкі. У такіх здымках ёсць пэўны сюжэт, як і ў любой іншай стылістыцы фатаграфіі. Няма ідэальных цел, ды і будзь яны ідэальныя, былі б не прыгожыя.
Кожная індывідуальная рыса, асаблівасць, шнары, тату, радзімкі і недахопы складаюць чалавека і паказваюць менавіта яго на фатаграфіі, паказваюць тое, што гэтая ўнікальнасць добрая, а не брыдка.
Мая мама, як даведалася пра адкрытыя фотасесіі, адразу стала лаяцца. Зараз жа яна хоча сама здымацца ў маіх фатографаў, таму што ў яе няма прыгожых фатаграфій. Але, натуральна, яна не хоча гэта рабіць у маім стылі. Так, яна ўбачыла, што аголенае цела — гэта эстэтычна прыгожа, прыняла і змірылася з тым, што мне гэта падабаецца. У адносінах з маладым чалавекам таксама былі нестыкоўкі, хлопец быў супраць такіх фотасесій, але калі я перастала яму паказваць свае фота, то ўсё сціхла і мы даволі хутка разышліся".
Мадэляў фатографы шукаюць самі
Першы фатограф, які спецыялізуецца на фотасесіях у стылі ню, сам знайшоў Кацю. Прапанаваў ёй здымку, дзяўчына пагадзілася. Супрацоўніцтва працягваецца дагэтуль.
«Ён убачыў мой профіль ў інстаграме, я яму спадабалася, ён прапанаваў здымку. Другі фатограф знайшоў мяне праз першага. Потым сталі заўважаць і іншыя. Але не з усімі камфортна працаваць, камусьці прыходзіцца адмаўляць. Ёсць такія фатографы, якія не ведаюць, чаго хочуць, і з-за гэтага з імі ўзнікаюць цяжкасці. А ёсць хлопцы, якія ведаюць сваю справу і з імі падчас здымкі можна дамаўляцца, абмяркоўваць і прыдумляць нешта новае. Менавіта тады атрымліваецца добры вынік».
Нічога акрамя здымак
З-за адкрытых фотасесій праблем на вучобе не ўзнікае. Аднагрупнікі да яе хобі ставяцца нармальна. Ведае і адзін выкладчык: але не кажа дзяўчыне, што здымацца аголенай гэта дрэнна.
«У маіх здымках няма нічога забароненага, за што я магла б быць пакарана. Я не зарабляю на гэтым грошы, гэта маё хобі,
якое прыносіць мне задавальненне. Уся для сябе. Хто ведае пра маё хобі, тыя па большай частцы проста не звяртаюць на гэта ўвагі.
Аголеныя фатаграфіі я ў асноўным выкладаю ў закрытыя профілі. З фатографам ад сумеснай працы мы атрымліваем задавальненне. Нічога акрамя здымак. Нам проста падабаецца вынік. Хлопцы, з якімі я працую, калі яны сэксуальна ўзбуджаны, прыставаць не будуць — яны прафесіяналы. Вядома, бывае ўсякае і часам можа каго-небудзь занесці, усё-ткі гармоны гуляюць. Асабліва падчас здымкі эратычнага зместу, калі дзесьці хочаце, каб з’явілася, напрыклад рука іншага чалавека, але вы працуеце адзін, то тады ў гульню ўступае фатограф і яго можа занесці ад узбуджэння. Ён можа пачаць рабіць больш, чым меркавалася першапачаткова, але такое здаралася ўсяго пару разоў і тут галоўнае не баяцца фатографа спыніць. Пасля здымкі прапануюць выпіць чай, нічога большага. З фатографамі ў мяне адносіны на прафесійна-сяброўскім узроўні".
«Фатаграфія дапамагла палюбіць сваё цела»
У будучыні Каця хоча вывучаць чалавечае цела і адносіны людзей. Пакуль дзяўчына вучыцца на іншага спецыяліста.
«Не ведаю, наколькі атрымаецца ў мяне стаць тым, кім я хачу, але мара ёсць. У мяне былі здымкі з дзяўчатамі. Здымацца з некаторымі людзьмі досыць складана — чалавек на адной хвалі, ты на іншай. Была ў мяне цікавая сітуацыя з адной дзяўчынай — мы паказвалі каханне. Сапраўды лашчылі адна адну падчас здымак, у нас была эмацыйная сувязь. Пасля здымкі мы засталіся нядрэннымі сябрамі, нават трохі з эратычным кантэкстам.
Аголеная здымка дала магчымасць майму неідэальнаму целу стаць прыгожым. Ідэальнае цела для мяне — гэта худая і мініяцюрная дзяўчына. Я пад гэтыя крытэры ніяк не падыходжу, але фатаграфія ў жанры ню дала магчымасць мне палюбіць сваё цела і разняволіцца. Добры фатограф можа паказаць прыгажосць любога цела і людзі, гледзячы на яго здымкі, разумеюць, што чалавек не брыдкі, чалавек прыгожы".
Фатографы хочуць працаваць толькі з дзяўчатамі
Дзяўчына кажа, што сёння ў Гродне нямала добрых фатографаў, якія здымаюць у стылі ню. Дзяўчыны, якія да іх прыходзяць, — непрафесійныя мадэлі, усе яны здымаюцца для сябе.
«Я працягну здымацца, мне гэта падабаецца. Ёсць адзін фатограф у Гродне, з якім бы я хацела папрацаваць, але ён мяне пакуль не бачыць і плаціць вялікія грошы за яго фатаграфіі я не збіраюся. Аголеная здымка для мяне — хобі, я не збіраюся на гэтым зарабляць. У будучыні хацела б зняцца з хлопцамі, але ёсць праблема — у Гродне фатографы хочуць працаваць пакуль толькі з жаночым полам. У жанры ню хлопцам складана працаваць».
