Два гады на Савецкай вуліцы не было чуваць жаласнай скрыпкі вулічнага музыканта Яўгена Кавалёва. У народзе пачалі пагаворваць, што артыст памёр. Але ў самым пачатку лютага скрыпач аб’явіўся і зноў пачаў граць у цэнтры Гродна. Дзе знікаў столькі часу музыка? Hrodna.life разабраўся.
Аказалася, вясной 2016 года гродзенец мэтанакіравана з’ехаў у Расію на заробкі каб пазбегнуць траплення ў ЛПП (лячэбна-працоўны прафілакторый). Граў Яўген (прадставіўся як Андрэй) у Смаленску, Маскве і Санкт-Пецярбурзе. Там ён крыху зарабіў грошай і забыўся аб праблемах у родным горадзе.
«Бацькі і таварышы рады, што я вярнуўся дадому. Цяпер я зноў на звыклым месцы і займаюся любімай справай у Гродне, — распавядае Яўген. — Некаторыя гараджане рады былі мяне зноў убачыць, нягледзячы на тое, што паспелі пахаваць. Уваскрэс! Шчыра, мне смешна. Як кажуць, калі жывым пахавалі, значыць даўжэй пражывеш.»
Андрэй з’язджаў, бо заяўся «загрымець» у ЛПП: кажа, што яго некалькі разоў затрымлівалі ў горадзе нецвярозым. «За глыток піва маглі забраць, а ў Расіі з гэтымі справамі прасцей. За год у паліцыю трапіў толькі адзін раз», — расказвае ён.
У Піцеры жыў у гатэлі
На думку Яўгена, на ўсходзе людзі лепш ставяцца да вулічных музыкаў і там можна зарабіць больш. Напрыклад, у Маскве за 1,5 гадзіны гродзенец мог зарабіць 1500 расійскіх рублёў - больш за 50 беларускіх.
«Граў у Маскве летам і жыў у намёце на беразе ракі, а ў халодны час быў у Піцеры, там таксама граў і здымаў нумар у гатэлі. Фінансы дазвалялі. За суткі плаціў тысячу рублёў. А ў дзень мог зарабіць 3−5 тысяч».
Яўген кажа, што ў Расіі гарадскія музыкі могуць нават на нешта сур’ёзнае назбіраць, граючы на вуліцы. У Беларусі складаней: яму расказвалі, што ў яго адсутнасць нібыта ў аднаго яго таварыша міліцыя забрала дарагі тэлефон з-за таго, што ён ішоў трохі п’яны, а ўзамен выдалі нейкую паперу.
[irp posts="30 250″ name=" Зямляк, ты перашкаджаеш працаваць". Адзін дзень з жыцця вулічных музыкаў на Савецкай"]
«Цэны на прадукты выраслі, а атрымліваеш заробак такі ж як раней. А на роднай Савецкай практычна нічога не змянілася — усё тыя ж людзі і музыкі».
Грае палову жыцця, але хоча знайсці іншую працу
У 2018 годзе Яўгену будзе 30 гадоў. Амаль палову жыцця ён грае на вуліцы. Так і зарабляе. Пачынаў з парку Жылібера і Фартоў, але самым папулярным месцам у Гродне застаецца вуліца Савецкая.
У бліжэйшых планах Яўгена — знайсці якую-небудзь працу. Фізічную — кшталту будаўніцтва, хоць ён і прафесійны музыка. Праўда, баіцца, што яго не возьмуць. Калі ж атрымаецца — ён хоча сумяшчаць звычайную працу і вулічную музыку.
