Пакуль праходзіць конкурс эскізных праектаў помніка Давыду Гарадзенскаму, Hrodna.life даведаўся, што думаюць мінакі на вуліцах горада пра меркаваную скульптуру. У якім вобразе яны хацелі б бачыць знакамітага гродзенскага старасту?

1

Любоў Міхайлаўна

— Першае, што прыходзіць у галаву — конная статуя. Давыд Гарадзескi быў воінам і кіраўніком войска, таму, мне здаецца, ён павінен быць на кані. Месца я б выбрала ў цэнтры горада — замест танка. Ваенная машына — гэта не помнік. Ёй не месца ў мірным горадзе.

7

Аляксандр

— Нядрэнныя прапановы былі не так даўно ў мастака Уладзіміра Качана. Гэта была фігура на кані, у баявых даспехах. Менавіта так павінен выглядаць Гарадзенскі. Помнік гэтаму чалавеку ў горадзе павінен быць, як экскурсавод я гэтаму буду вельмі рады. Пакуль жа пра Давыда Гарадзенскага я распавядаю ў Каложскім парку. Спадзяюся, хутка буду гэта рабіць каля замкаў.

6

Валянціна

— Для мяне конная статуя была б ідэальна, але, баюся, на гэта ніхто не дасць грошай. Ды і на проста фiгуру цяжка будзе знайсці. Але па маштабе асобы статуя павінна быць конная. Вобраз Гарадзенскага можна будзе ўзнавіць па старых дакументах і не трэба нічога выдумляць. Гэты помнік я б хацела ўбачыць у гiстарычным цэнтры Гродна — каля замкаў або ў скверы на месцы падарванай Фары Вітаўта.

2

Яўген

— Які помнік будзе, я яшчэ нават не задумваўся. Мне хацелася б у першую чаргу, каб гродзенцы ведалі гісторыю, каму і за якія заслугі ставіцца помнік. На жаль, гэтага многія не ведаюць. Я магу прадказаць, што Давіда Гарадзенскага адлюструюць у выглядзе ваяра сярэднявечча, можа нават на кані.

3

Любоў Уладзіміраўна

— Давыд Гарадзенскі павінен абавязкова быць у выглядзе ваяра таго часу, у якім ён жыў. Майстры павінны папрацаваць і знайсці максімум інфармацыі. Зараз у свеце адбываюцца сур’ёзныя канфлікты, а гэты помнік павінен паказаць, што мы таксама ў выпадку чаго можам абараняцца і нам ёсць на каго раўняцца. Так што баявыя элементы ў ім абавязкова павінны прысутнічаць. З сучасных беларусаў помнік Гарадзенскаму мог быць падобным да Віталя Гуркова, які ўжо даказаў сілу і моц беларусаў.

5

Аляксандр

— Мне здаецца, можна было б паспрабаваць зрабіць помнік чымсьці падобным да Пагоні. Калі на самай справе ў свой час Гарадзенскi так ганяў крыжакоў, як мы чытаем, то можна і зрабіць яго з мячом на кані. Можна будзе ў будучыні казаць: «Пагоня пачынаецца ў Гродне».

8

Дзмітрый Віктаравіч

— Калі грошай хопіць, то лепш на кані яго зрабіць. А калі не хопіць, то зрабіць фігуру са шчытом і мячом, можа і дзідай. Таксама калі грошай хопіць, то помнік павінен быць з бронзы і абавязкова падобны да ваяра ў даспехах, з вусамі і барадой. Добры прыклад Гарадзенскага быў у кнізе 1991 года «Гродзенскі замак», якую напісаў Алесь Краўцэвіч. А месцам для помнiка я б выбраў скрыжаванне Замкавай і Гарадзенскага.

4

Арына

— Давыд Гарадзенскi быў чалавекам статным, які абараняў наш горад, быў старастай. Я ўпэўнена, што помнік гэтай персоне павінен паказваць статнасць і дэманстраваць сілу. Мне здаецца, павінна быць цалкам постаць чалавека: высокая, са скіраванай уверх галавой, абавязкова з мячом. Галоўнае паказаць у помніку, што гродзенцы заўсёды могуць аказаць супраціў ворагам, якія захочуць напасці на нашыя землі.