Гродзенцы сталі першымі гледачамі “Беларускіх ўікэндаў”, кінапраекта з беларускамоўнай агучкай вядомых фільмаў, па-за межамі Мінска. З анімацыйнай стужкі “Маленькі прынц” і нашага горада пачалася падарожная гісторыя кіно, дзе гавораць па-беларуску, у рэгіёны. Паказаць ужо ёсць што – за час існавання праекта на роднай мове загучалі 20 фільмаў. Пры падтрымцы velсom і яго брэнда “Атлант Тэлекам” у Мінску за 4 апошніх месяцы зладзілі 14 паказаў, каторыя наведалі больш за 7,5 тысяч гледачоў.
Сто “Маленькіх прынцаў” застануцца ў Гродне
“Кожны раз на паказах у Мінску людзі цікавіліся, чаму фільмы па-беларуску ідуць толькі ў сталіцы, – распавёў кіраўнік праекта “Беларускія ўікэнды” Андрэй Кім. – Таму мы вельмі радыя, што дзякуючы падтрымцы velсom і “Атлант Тэлекам”, партнёраў, што падзяляюць нашы каштоўнасці і падтрымліваюць беларускую мову, мы здолелі гэта зрабіць”.
Пачаць падарожжа з “Маленькага прынца” вырашылі не выпадкова. Такім чынам уганаравалі дзень народзінаў Антуана дэ Сэнт Экзюперы. Да пачатку паказаў сумесна з кампаніяй velсom арганізатары перавыдалі кнігу “Маленькі прынц” у перакладзе Ніны Мацяш з арыгінальнымі малюнкамі аўтара. Набыць асобнік з новага тыражу можна было перад сеансам. Яшчэ сотню кніжак перадалі для школьных бібліятэк горада.
Упершыню на вялікіх экранах і па-беларуску
Стужка не проста пераказвае гісторыю з кнігі. Мультфільм распавядае гісторыю сяброўства дзяўчынкі і пастарэлага лётчыка з аповесці Экзюперы. Перапляценне двух сюжэтаў ператварае мультфільм у цікавую і захапляльную гісторыю.
“Ён вас не расчаруе. Гэта цудоўны мульцік з цудоўнай агучкай. Вы самі адчуеце, што ён варты, каб правесці з ім вечар выходнага дня”, – адзначыла Ірына Карэліна з кампаніі velсom.
Паглядзець фільм гродзенцы прыходзілі цэлымі сем’ямі. І не толькі таму, што нельга адпускаць дзяцей адных на вечаровы сеанс. Для многіх дарослых сама магчымасць паглядзець фільм у беларускай агучцы на вялікім экране стала падобнай да спраўджанай казкі – у беларускім кінапракаце такога яшчэ не было.
“Гэта сапраўды дзіўна. Можа, раней думка такая нікому не прыходзіла ў галаву, ці людзі, што за гэта браліся, не даводзілі справу да канца. А мы былі ўпартыя, змаглі атрымаць падтрымку і вывесці фільмы ў пракат. Да нас стужкі з беларускамоўнай агучкай былі толькі тэлевізійнымі ці аматарскімі”, – кажа Андрэй Кім.
Праўда, абмяжоўвацца толькі паказамі па ўікэндах арганізатары не збіраюцца. Пасля пракату фільмы ў беларускай агучцы абяцаюць заліць на серверы “Атлант Тэлекам”, каб паглядзець іх змаглі нават дома, незалежна ад месца жыхарства, усе прыхільнікі мовы – як у найменшых вёсачках Беларусі так і за мяжой. На думку арганізатараў, гэта таксама будзе запатрабавана, на тое паказвае прагляд трэйлераў, што ўжо зараз сягае за паўтары мільёны.
Да зорак з “Чырвонай зоркі”
Паказ стужкі прайшоў у “самым лепшым, гістарычным і атмасферным кінатэатры Гродна, дзе кожны глядач адчувае сябе VIP”, лічыць Андрэй Кім. Атрымалася нават сімвалічна – можна было адчуць сябе жыхаром зоркі, амаль як Маленькі прынц. Вольных месцаў у залі не засталося. Ахвотных патрапіць з “Зоркі” да зораў аказалася нямала.
З гэтай нагоды арганізатары разам з “Гроднааблкінавідэапракатам” вырашылі паўтарыць паказ “Маленькага прынца” і ў наступны ўікэнд – з пятніцы 4-га да нядзелі 6-га жніўня.
“З нашага пункту гледжання, шчаслівыя тыя людзі, якія адначасова займаюцца тым, ува што вераць, і могуць такім чынам зарабляць грошы. Наш праект “Беларускія ўікенды” такі. Нам не трэба выбіраць паміж асветніцтвам і камерцыяй. Прасоўванне беларускай мовы і культуры ў Беларусі можа быць камерцыйна паспяховым”, – лічыць Андрэй Кім.
Надалей супраца з гродзенскім кінапракатам мае працягвацца, а праводзіць паказы фільмаў у беларускай агучцы арганізатары плануюць прынамсі раз на месяц.
Інтэракцыя вітаецца
Падчас паказу кожны з гледачоў атрымаў ліст, каб скласці з яго самалёцік. Пасля прагляду арганізавалі флэш-моб па іх запуску да сцэны (на першым здымку публікацыі). Адзін з самалётаў выпадковым чынам выбралі, каб падарыць яго ўладальніку кніжку пра Маленькага прынца. А каб надаўжэй запомніць падзею, у фае кінатэатра можна было зрабіць фотаздымак з самалётам і лісам.
Працягваць інтэракцыю з камандай можна і надалей. Меркаванні і водгукі гледачоў “Беларускіх ўікэндаў” вельмі важныя для іх. Таму ахвотных распавесці пра свае ўражанні ў сацсетках просяць пазначаць допісы хэштэгам #belweekend, каб іх можна было знайсці і пачытаць. Дапаможа праекту і тое, што гледачы запоўняць анкету на сайце kinakong.by/poll і канечне, запросяць сяброў на наступныя паказы. Калі ёсць жаданне падтрымаць праект фінансава, можна скарыстацца з магчымасцяў краўдфандынгу на talaka.by/kino.
